भक्तपुर-१ : अरु दलले चुनावै लड्न नचाहने नेमकिपाको गढ

A+ A A-

१६५ निर्वाचन क्षेत्रमा सहज हुने ठाउँ आफ्नो भागमा पार्न प्रयास गरिरहेका सत्ता गठबन्धनमा रहेका दल भक्तपुर निर्वाचन क्षेत्र नम्बर १ को भने हिसाब किताब गर्न चाहँदैनन् । कारण हो जसको भागमा परे पनि जित हात पार्न सहज नहुनु । यो क्षेत्र नेपाल मजदुर किसान पार्टी (नेमकिपा)को गढ हो, जहाँ अन्य प्रतिस्पर्धीहरू आधा भन्दा कम मतले पराजित हुन्छन् । सोही कारणले गठबन्धनका दलहरू पनि आफ्नो भागमा सो क्षेत्र नपरोस् भन्ने चाहन्छन् ।

‘भक्तपुर १ को कुरा आउँदा कुनै पनि दलले त्यसमा बोल्नै नचाहने र सकेसम्म त्यो नपरोस् भन्ने चाहन्छन्,’ कार्यदलका एक सदस्यले भने, ‘उक्त क्षेत्र सकेसम्म अर्काको भागमा परोस् भन्ने चाहन्छन् ।' भक्तपुर नगरपालिका र चाँगुनारायण नगरपालिका रहेकाे याे क्षेत्रमा नेमकिपाले फराकिलो मतान्तरले जित्दै आएको छ ।

६ निर्वाचनमा नेमकिपा हारेकाे रेकर्ड छैन

नेमकिपाका अध्यक्ष नारायणमान बिजुक्छेले २०४८ सालको आमनिर्वाचन, २०५१ सालको मध्यावधि, २०५६ सालको आमनिर्वाचन जिते । ०६४ सालको पहिलो संविधानसभा र ०७० सालको दोस्रो संविधानसभाको निर्वाचनमा पनि बिजुक्छे निर्वाचित भए । ०७४ को प्रतिनिधिसभामा भने प्रेम सुवाल विजयी भए ।

०४८ सालको आम निर्वाचनमा बिजुक्छेले २० हजार १६३ मत ल्याएर विजयी हुँदा कांग्रेसका सुरेशमान जोन्चेले १३ हजार ७३२ मत ल्याएका थिए । ०५१ को आम निर्वाचनमा बिजुक्छे १६ हजार ७७० मतले विजयी हुँदा राप्रपाका सुरेन्द्र शाहले ९ हजार ४३८ मत ल्याएका थिए ।

०५६ को आम निर्वाचनमा बिजुक्छेले १६ हजार ५३३ मत ल्याएर विजयी हुँदा कांग्रेसका गणेशमान चक्रधरले १० हजार ३० मत ल्याएका थिए । ०६४ को पहिलो संविधानसभा निर्वाचनमा बिजुक्छेले १९ हजार ९७२ मत ल्याएर विजयी हुँदा माओवादीका देवेन्द्र श्रेष्ठले ११ हजार ५४८ मत ल्याएका थिए ।

०७० सालको दोस्रो संविधानसभा निर्वाचनमा बिजुक्छेले २० हजार ४४६ मत ल्याएर विजयी हुँदा कांग्रेसका कृष्णलाल भँडेलले १२ हजार ८२६ मत ल्याएका थिए । ०७४ को प्रतिनिधिसभा निर्वाचनमा नेमकिपाका प्रेम सुवालले ३३ हजार ७६ मत ल्याएर विजयी हुँदा कांग्रेसका बाबुराजा जोशीले १७ हजार ८१८ मत ल्याएका थिए ।

स्थानीय चुनावको अंक गणित

गएकाे वैशाख ३० मा सम्पन्न स्थानीय तह चुनावमा पनि नेमकिपाले ५० प्रतिशत मत पाएर लिड गरेको छ । एमाले, कांग्रेस, राप्रपा, माओवादी केन्द्र एकै ठाउँमा रहँदा मात्र नेमकिपाको हाराहारी मत रहेको देखिन्छ । नेमकिपाले ३३ हजार ८९५ मत गत स्थानीय तहमा वडाध्यक्षहरूको मतबाट ल्याएको देखिन्छ । एमाले १४ हजार ११९, कांग्रेसले १३ हजार ०१३, राप्रपाले ६ हजार २८६ र माओवादीले १ हजार ३८८ मत पाएको देखिन्छ ।

कांग्रेस, माओवादी, नेकपा एकीकृत समाजवादी सत्ता गठबन्धन दल सबैको मत जोड्दा सो क्षेत्रमा १५ हजार मात्रै पुग्छ । नेमकिपा गठबन्धन भन्दा १८ हजार बढी मतले लिड गरेको देखियो । नेमकिपालाई हराउन सत्ता गठबन्धनदेखि एमाले र राप्रपा सबै एक ठाउँमा भएमात्र सम्भव देखिन्छ ।

वैशाख ३० मा भएको स्थानीय तह निर्वाचनमा भक्तपुर नगरपालिकामा नेमकिपाले ‘क्लीन स्वीप’ गरेको थियो । नेमकिपाले उक्त नगरपालिकामा प्रमुख र उपप्रमुख तथा १०वटै वडाध्यक्षमा फराकिलो मतान्तरले जितेको थियो ।

नगर प्रमुखमा सुनिल प्रजापतिले २९ हजार २५२ र उपप्रमुखमा रजनी जोशीले २९ हजार ७५९ मत ल्याएका थिए । नगर प्रमुखका अन्य प्रतिस्पर्धीहरू एमालेका रवीन्द्र लाछिमस्युले २ हजार ८४१, कांग्रेसका रामप्रसाद कासुलाले ३ हजार ४०७ र माओवादीका तुल्सीभक्त सुवालले ७६१ मत ल्याएका थिए ।

चाँगुनारायण नगरपालिकाको प्रमुख भने कांग्रेसले जितेको थियो । कांग्रेसका जीवन खत्री ९ हजार ५५० मत ल्याएर विजयी भएका थिए । उपप्रमुखमा एमालेका रमेश बुढाथोकी ११ हजार १०७ मतका साथ विजयी भएका थिए । नेमकिपा दुवै पदमा चौथो स्थानमा देखिन्छ । ९ मध्ये चारवटा वडा कांग्रेस, दुईवटा वडा एमाले, दुईवटा वडा राप्रपा र एक वडा नेमकिपाले जितेको छ ।

मतदाताको हिसाबले भक्तपुरको हिसाब भेटाउन चाँगुनारायणलाई गाह्रो हुने देखिन्छ । चाँगुनारायणमा अन्य दलले लिड गरे पनि नेमकिपालाइ प्रभाव नपर्ने देखिन्छ । कांग्रेस एमाले लगायतका मुख्य दलका क्षेत्र र जिल्ला तहका नेताहरू औपचारिक कुरा गर्न समेत चाहँदैनन् । नतिजा प्रष्टै हुने र कुनै प्रभाव नपर्ने भन्दै उनीहरू पन्छिने गरेका छन् ।

जनहितमा काम गरेकाले जनताले रुचाएको नेमकिपाका सांसद प्रेम सुवाल बताउँछन् । ‘नेमकिपाले देश र जनताका हितमा इमानदारीपूर्वक काम गर्दै आएकाले हुनुपर्छ त्यसमा हामी तलमाथि गर्दैनौँ, सुवालले शिलापत्रसँग भने, ‘जनताको हितबाहेक अर्को काम हाम्रो छैन ।’

क्षेत्र नम्बर २ मा पनि ०५१ साल र ०६४ को निर्वाचन जितेको नेमकिपा पछिल्लो समय कमजोर बनेको छ । निर्वाचन क्षेत्र परिवर्तन भएर २ नम्बर क्षेत्रबाट हार ब्यहोर्नु परेको निष्कर्ष नेमपकिपाको छ । ‘२ नम्बर क्षेत्रको भूगोल परिवर्तन भयो त्यसकारण हामी कमजोर भयौँ,’ सुवालले भने ।

प्रकाशित मिति: शुक्रबार, भदौ २४, २०७९ ०७:३९