ला लिगालाई बार्सा र रियलको खेल सार्न दबाब

A+ A A-

स्पेनिस फुटबल हेर्ने संगठन रोयल स्पेनिस फुटबल फेडेरेसन (आरएफईएफ)ले आगामी सिजनको ला लिगाअन्तर्गत बार्सिलोना, रियल मड्रिडलगायत अन्य केही क्लबका थुप्रै खेलको सेड्युल परिवर्तन गर्न दबाब दिएको छ । दबाबपछि अहिले ला लिगाको व्यवस्थापन पक्ष र आरएफईएफबीचको सम्बन्ध चिसिएको छ ।

डिफेन्डिङ च्याम्पियन बार्साले १६ अगस्टमा एथ्लेटिक क्लबको मैदानमा पहिलो खेल खेल्दै लिगको सुरुवात गर्ने प्रारम्भिक योजना थियो । तर, शुक्रबारको सो खेल सारेर शनिबार (१७ अगस्टमा) राख्न आरएफईएफले दबाब दिइरहेको छ ।

आरएफईएफले यो एउटा खेल मात्र नभएर शुक्रबार र सोमबार हुने बार्सा, रियल मड्रिडसहित सबैका खेल सारेर शनिबार र आइतबार खेलाउन ला लिगालाई दबाब दिइरहेको छ । दुई पक्षबीच समझदारी नभएपछि यो मुद्दा अदालतसम्म पुगेको छ ।

‘स्पेनका फुटबल समर्थकहरु शुक्रबार र सोमबार खेल नहोस् भन्ने चाहँदैनन् । विशेषगरी, सोमबार हुने खेल त कसैले पनि रुचाउँदैनन्,’ आरएफईएफले भनेकाे छ ।

आरएफईएफका अध्यक्ष लुइस रुबेल्सले ट्वीटरमा स्पेनिस फुटबल फ्यानहरुले सोमबारका खेलको विरोध गर्दै प्ले कार्ड र ब्यानर बोकेको फोटो राखेर ‘नो फुटबल अन मन्डे’ अर्थात् सोमबार फुटबल खेलिनेछैन भन्दै ट्वीट गरेका छन् । मुद्दा सुनुवाइको दिन नजिकिँदै गर्दा उनले न्यायको पक्षमा निर्णय हुनेमा विश्वस्त रहेको पनि ट्वीट गरेका छन् ।

तर, ला लिगाले भने सेड्युल परिवर्तनले प्रसारण सम्झौतामा विश्वव्यापी रुपमा असर गर्ने बताउँदै विरोध गर्दै आएको छ । ‘आरएफईएफको यो कदम गैरकानुनी छ । यसले राष्ट्रिय तथा अन्तर्राष्ट्रिय प्रसारण अधिकार बिक्रीमा गम्भीर प्रभाव पार्दै त्यसबाट ला लिगाले गर्ने २ बिलियन युरो बराबरको वार्षिक आम्दानीमा पनि असर गर्छ,’ ला लिगा अध्यक्ष जेभियर टेबासले भने ।

‘आरएफईएफका अधिकारीलाई यो कदमले निम्त्याउने अस्तव्यस्तता र असमझदारीको कुनै हेक्का छैन । यसले न केही प्रतिफल न त केही फरक नै पर्छ, यसले सबैथोकमा गडबड मात्र बनाउँछ । र, आरएफईएफले गर्न जानेको पनि त्यत्ति मात्र हो,’ टेबासले असन्तुष्टि पोखेका छन् ।

यो असमझदारीले स्पनेको शीर्ष डिभिजनको लिगमा ठूलो संकटको संकेत गरेको छ । सिजन सुरु हुने समय नजिकिँदै गर्दा व्यवस्थापकीय संगठनबीचको आपसी मतभेदले अन्तर्राष्ट्रिय समुदायमा लिगको छवि र विश्वसनीयतामा पनि प्रश्न उठ्न सक्ने खतरा छ । अदालतमा ७ अगस्टमा मुद्दाको सुनुवाइ हुँदै छ । ला लिगाको फिक्स्चरअनुसार त्यसको ९ दिनमा बार्साले सिजनको सुरुवाती खेल्नेछ त्यसैले त्यही दिन मुद्दा टुंगो नलागेमा यो सिजनको ला लिगा अनिश्चिततामा फस्ने खतरा रहन्छ ।

ला लिगाले आरएफईएफको यो हस्तक्षेप गैरकानुनी भएको बताउँदै आएको छ । स्पेनको शीर्ष लिगको फिक्स्चर र सेड्युल निर्धारणको अधिकार आफूमा निहित रहेकाले आरएफईएफको यो हस्तक्षेपलाई ला लिगाले आफ्नो अधिकारमाथिको ‘आक्रमण’ भन्दै अदालतसम्म पुगेको हो ।

ला लिगा र आरएफईएफबीच पहिल्यैदेखि मनमुटाव रहँदै आएको छ । सेड्युलमा असमझदारी त्यसको ताजा उदाहरण मात्र हो । गत सिजन ला लिगाले आगामी सिजनका केही खेल विदेशमा खेलाउने प्रस्ताव गरेको थियो । तर, आरएफईएफले सो प्रस्ताव स्पेनका फ्यानहरुको भावनाविपरीत रहेको भन्दै चर्को विरोध गरेपछि सिजनभर स्पेनिस फुटबलमा शीतयुद्ध नै चलेको थियो ।

ला लिगा आफ्नो बढ्दो अन्तर्राष्ट्रिय बजार विस्तार गर्न चाहन्थ्यो भने आरएफईएफ घरेलु लिग आफ्नै घरमा खेलाउनुपर्नेमा कटिबद्ध थियो । ला लिगा जिरोनाको घरेलु मैदानमा हुने भनिएको बार्सिलोनाविरुद्धको खेल अमेरिकाको मायामीमा खेलाउन चाहन्थ्यो । ला लिगाले खेलकुद प्रचार कम्पनी रेलिभेन्टसँग हरेक सिजन एउटा खेल अमेरिकामा खेलाउने सम्झौता पनि गरिसकेको थियो ।

‘स्पेनिस फुटबलका खेलाडी, व्यवस्थापक, कोच र समर्थकका लागि यो खुसीको कुरा हुनेछ कि हाम्रो ला लिगा स्पेनमा मात्र होइन, विश्वभर रुचाइन्छ । अमेरिकाले वर्षको एउटा खेल आफ्नो देशमा आयोजना गर्न देखाएको इच्छाले हाम्रो लिग विश्वको उत्कृष्ट लिग भएको साबित गर्दछ । ला लिगाको विश्वव्यापी विस्तारमा यो धेरै सहयोगी हुनेछ । केही समर्थकहरु यसबाट निराश हुनुहोला, यो विषयमा हामी सचेत छौं । सुरुमा आफ्नो प्रिय टिमको खेल मैदानमै गएर हेर्न नपाउँदा दुःख लागे पनि समग्रमा यो स्पेनिस फुटबलका लागि गर्वको विषय हो,’ ला लिगाका विदेश विकास निर्देशक ओस्कार मायोले घोषणा गर्दै भनेका थिए ।

तर, त्यसरी स्पेनिस लिग अमेरिकामा आयोजना गर्न आरएफईएफ, फिफा, अमेरिकी फुटबल संगठन र उत्तर अमेरिकी फुटबल संगठन (कोनकाकाफ)को सहमति चाहिन्छ । तर, रुबेल्सले सो कदमलाई ‘वाहियात’ भन्दै आरएफईफको तर्फबाट सहमति दिएनन् । त्यो घटनाले दुई संगठनबीचको सम्बन्धमा ठूलो दरार उत्पन्न गराएको थियो । त्यो क्रम अहिलेसम्म पनि जारी रहेर ला लिगा आयोजनामा नै अन्योल सिर्जना भएको हो ।

प्रकाशित मिति: बिहीबार, साउन १६, २०७६ ०५:१४