मकवानपुरबाट काे–काे भिड्दैछन् संघीय चुनाव ? चर्चाको रहरले सिफारिसमा पर्न हानथाप

मकवानपुरबाट काे–काे भिड्दैछन् संघीय चुनाव ? चर्चाको रहरले सिफारिसमा पर्न हानथाप

A+ A A-

आगामी ४ मंसिरमा हुने प्रतिनिधिसभा र प्रदेशसभा सदस्य निर्वाचनका लागि मकवानपुरका ठूला राजनीतिक दलहरूले सम्भावित उम्मेदवारहरूको नाम टुंगो लगाएको छन् । संघीय निर्वाचनका लागि सत्तारुढ गठबन्धनका तीन शीर्ष दल नेपाली कांग्रेस, नेकपा माओवादी केन्द्र र नेकपा (एकीकृत समाजवादी) तथा नेकपा एमाले, राजेन्द्र लिङ्देन नेतृत्वको राष्ट्रिय प्रजातन्त्र पार्टी (राप्रपा), कमल थापा नेतृत्वको राप्रपा नेपालले सम्भावित उम्मेदवारहरूको नाम माथिल्लो कमिटीमा सिफारिस गरिसकेका छन् ।

मकवानपुरको १ र २ नम्बर निर्वाचन क्षेत्रबाट स्वतन्त्र उम्मेदवारी पर्ने देखिन्छ । कांग्रेस मकवानपुरले प्रतिनिधिसभा निर्वाचनका लागि प्रत्यक्षमा चार जनाको नाम सिफारिस गरेको छ । केन्द्रीय सहमहामन्त्री महालक्ष्मी उपाध्याय ‘डीना’, कांग्रेस बागमती प्रदेश सभापति इन्द्रबहादुर बानियाँ, पूर्वजिल्ला सभापति रामचन्द्र अर्याल माइकल र महासमिति सदस्य जयराम लामिछानेको नाम दुई क्षेत्रका लागि सिफारिस गरेको हो । डीनाको नाम १ र २ नम्बर क्षेत्रीय समितिहरूले जिल्लामा सिफारिस गरेर पठाएका थिए । २ नम्बर क्षेत्रबाट डीना एकल सिफारिसमा परेकी थिइन् ।

प्रतिनिधिसभाका लागि १ नम्बर क्षेत्रबाट डीनासहित बानियाँ, माइकल र लामिछानेको नाम सिफारिस भएको थियो । यसैगरी, एमाले मकवानपुरले दुई वटा प्रतिनिधिसभा क्षेत्रमा आठ जना प्रत्यक्षतर्फका उम्मेदवारहरूको नाम सिफारिस गरेको थियो । प्रतिनिधिसभा क्षेत्र नम्बर १ का रामेश्वर राना, कृष्णप्रसाद दाहाल, मदनकुमार दाहाल, नरहरि महत र रमिला सापकोटाको नाम सिफारिस भएको छ । जसमध्ये बामगठबन्धनबाट उम्मेदवार बनेका दाहाल अघिल्लो निर्वाचनमा १ नम्बर क्षेत्रबाट निर्वाचित भएका थिए ।

प्रतिनिधिसभा क्षेत्र नम्बर २ का लागि तीन जनाको नाम एमालेले सिफारिस गरेको छ । जसमा एमाले बागमती प्रदेश कमिटीका उपमहासचिव महेशकुमार बर्तौला, संविधानसभा सदस्य सुवासचन्द्र ठकुरी र बुद्धरत्न मानन्धरको नाम सिफारिस भएको थियो । गठबन्धनको दोस्रो ठूलो दल नेकपा (माओवादी केन्द्र) जिल्ला समन्वय समिति मकवानपुरले सम्भावित उम्मेदवारहरूको नाम टुंगो लगाएर पठाइएको छ ।

प्रतिनिधिसभा निर्वाचन क्षेत्र नम्बर १ का लागि संविधानसभा सदस्य प्रल्हाद लामिछाने र जीवन गोलेलाई सिफारिस गरेको छ । क्षेत्र नम्बर २ का लागि पार्टी केन्द्रीय सदस्य रामनारायण विडारीको एकल नाम सिफारिस भएको छ ।

गठबन्धनको तेस्रो ठूलो दल नेकपा (एकीकृत समाजवादी)बाट प्रतिनिधिसभा क्षेत्र नम्बर २ का लागि विरोध खतिवडाको एकल नाम सिफारिस भएको छ । एकीकृत समाजवादीले क्षेत्र नम्बर १ का लागि धनप्रसाद गौतम, यादव गजुरेल र विशभ अधिकारीको नाम सिफारिस गरेको छ ।

राष्ट्रिय प्रजातन्त्र पार्टी (राप्रपा) नेपाल मकवानपुरले केन्द्रीय अध्यक्ष कमल थापाको नाम १ नम्बर क्षेत्रका लागि सिफारिस गरेको छ । २ नम्बर क्षेत्रमा पार्टी महामन्त्री राजाराम बर्तौलाको एकल नाम छ । राष्ट्रिय प्रजातन्त्र पार्टी (राप्रपा)बाट प्रतिनिधिसभा क्षेत्र नम्बर १ का लागि दीपक सिंहको नाम सिफारिस भएको छ ।

मकवानपुरको गठबन्धनभित्र संघीय निर्वाचनका लागि नेकपा माओवादी केन्द्र र नेकपा (एकीकृत समाजवादी)बीच प्रतिष्ठानको लडाइ बनेको छ । प्रतिनिधिसभा क्षेत्र नम्बर २ मा एकीकृत समाजवादीका खतिवडाले दाबी गरिरहँदा माओवादीका विडारीले कुनै हालतमा नछोड्ने बताउँदै आएका छन् । विडारीले दुईवटा संघीय क्षेत्रमध्ये एउटा कुनै हालतमा माओवादी केन्द्रले पाउनुपर्ने र २ नम्बर क्षेत्रबाट आफ्नो उम्मेदवारी रहने बताउँदै आएका छन् ।

मकवानपुरमा प्रतिनिधिसभाको दुईवटा क्षेत्र र प्रदेशसभा सदस्य निर्वाचनका लागि ६ वटा क्षेत्र छन् । तर, यी सबै दलबाट प्रतिनिधिसभा र प्रदेशसभामा गरेर करिब डेढ सय जनाको नाम सिफारिस भएको छ । सबैभन्दा धेरै प्रत्यक्ष र समानुपातिक गरेर नेपाली कांग्रेसबाट १ सय १४ जना, नेकपा एमालेबाट २२, माओवादी केन्द्रबाट १४ जना सम्भावित उम्मेदवारहरूको नाम माथिल्लो कमिटीमा सिफारिस भइसकेको छ । ठूला राजनीतिक दलमध्ये सबैभन्दा ढिला गरी नेकपा माओवादी केन्द्रले विवादकाबीच नाम टुंग्याएको हो ।

चर्चामा आउने रहरले उम्मेदवार सिफारिस !

मकवानपुरमा दुईवटा प्रतिनिधिसभा क्षेत्र र चारवटा प्रदेश निर्वाचन क्षेत्र छन् । आगामी ४ मंसिरमा हुने प्रतिनिधिसभा र प्रदेश निर्वाचनका लागि सबै पार्टीका ६ जना उम्मेदवार भए पुग्छ । निर्वाचन आयोगमा दर्ता भएका करिब ८० वटा दलहरूमध्ये नेकपा एमाले, नेपाली कांग्रेस, नेकपा माओवादी केन्द्र, नेकपा (एकीकृत समाजवादी), राप्रपा र जतना समाजवादी पार्टी (जसपा)लगायतका थोरै दलहरूले मात्रै सबै क्षेत्रमा उम्मेदवार उठाउँछन् । तर, हालसम्मको अवस्थामा आगामी निर्वाचनमा सत्तारुढ गठबन्धन एकातर्फ, एमाले र राप्रपा अर्कोतर्फ भिड्ने सम्भावना बढेको देखिन्छ । गठबन्धनसँग अन्य दलहरू भिड्दा मकवानपुरमा झन थोरै उम्मेदवारहरू मैदानमा हुन्छन् ।

तर, ६ सिटका लागि दलहरूबाट मात्रै डेढ सय जनाको हाराहारीमा उम्मेदवारहरू आएका छन् । कतिपयले सामाजिक सञ्जालमा बधाई खान र समाचारमा फोटो आउने रहरले नै नाम सिफारिसमा पारेको टिप्पणी भइरहेको छ । ‘सिनियर नेताहरू मैदानमा छन् भन्ने थाहा हुँदाहुँदै वडास्तरको नेताले नाम सिफारिस गराउन मरिहत्ते गर्नुको पछाडि चर्चाको रहरले नै हो’, नेपाली कांग्रेसका एक नेताले भने, ‘उम्मेदवारको नाम सिफारिस हुँदैमा बधाईको ओइरो आउने भएपछि सबैलाई रहर लाग्दो रहेछ क्यार ।,’

उम्मेदवारको नाम सिफारिस गराउन गठबन्धनभित्र मारामार छ । संघीय र प्रदेश निर्वाचनको ६ सिटमा कांग्रेसमा मात्रै १ सय १४ जना इच्छुक देखिए । ६ सिट पनि गठबन्धनमा भाग लगाउनुपर्ने हुन्छ । नेकपा माओवादी केन्द्रमा आफ्नो नाम सिफारिसमा नपरेको भन्दै विज्ञप्ति नै जारी भयो । नेताहरू सन्तोष बिष्ट, विष्णुहरि ढकालले अवैधानिक निर्णयबाट उम्मेदवारहरूको नाम सिफारिस भएको भन्दै मान्यता नदिने भन्दै पार्टी अध्यक्षलाई ध्यानाकर्षण गराएका छन् ।

प्रकाशित मिति: बिहीबार, भदौ २३, २०७९ १२:१७