सन्दीपमाथि लागेको आरोप पुष्टि हुने प्रमाण भेटिएको प्रहरीको दाबी (भिडियो)

A+ A A-

नेपाली राष्ट्रिय क्रिकेट टिमका कप्तान सन्दीप लामिछानेविरुद्ध बलात्कार आरोप पुष्टि हुने केही तथ्य फेला पारेको दाबी प्रहरीले गरेको छ । मंगलबार साँझ प्रहरी वृत्त गौशलामा लामिछानेविरुद्ध एक १७ वर्षीया नाबालिकाले बलात्कार गरेको किटानी जाहेरी दिएकी थिइन् ।

नाबालिकाको उजुरीपछि अनुसन्धानमा खटिएको प्रहरीले लामिछाने बसेको भनिएको होटलको दृश्य क्लोज सर्किट (सीसी) क्यामेरामा देखिएको एक प्रहरी अधिकारीले शिलापत्रलाई बताए । त्यो बाहेक प्रहरीले नगरकोट जाने बाटोकाे समेत सीसीटीभी अध्ययन गरेको छ ।

होटलको दृश्यमा सन्दीप र पीडित युवती ५ भदौ राति ११ बजे होटल पुगेका देखिएकाे प्रहरी दाबी छ । उनीहरू दुवै जना होटलको कोठा नम्बर ३०५ मा बसेको खुलेको उपत्यका प्रहरी कार्यालय प्रमुख एआईजी रविन्द्र धानुकले जानकारी दिए । होटलमा भने उनीहरूको परिचयपत्र नराखेको प्रहरीको भनाइ छ ।

एआईजी धानुकका अनुसार पीडित नाबालिकासँग सन्दीपको सम्बन्ध उनकै एक साथीमार्फत भएको हो । त्यसयता भने उनीहरू नियमित सम्पर्कमा रहेको प्रहरीको अनुसन्धानले देखाएको छ ।

हाल लामिछाने क्यारेवियन प्रिमियर लिग खेल्न वेष्ट इन्डिज गएका छन् । उनी ६ भदौमा वेष्ट इन्डिज गएका हुन् । वेष्ट इन्डिज जानु एक दिनअघि ५ भदौमा पिंगलास्थानको काठमाडौं होटल इनमा राखेर ती नाबालिकालाई बलात्कार गरेको आरोप लागेको हो ।

प्रहरी उच्च स्रोतका अनुसार नुवाकोट स्थायी घर भएका पीडित नाबालिका बानेश्वरको एक गर्ल्स होस्टेलमा बस्दै आएकी थिइन् ।

वेष्ट इन्डिज जानुअघि सन्दीपको कप्तानीमा नेपालले केन्यासँग पाँच खेलको टी–२० अन्तर्राष्ट्रिय क्रिकेट सिरिज खेलेको थियो । केन्याविरुद्धको सिरिज नेपालले ३–२ ले जितेको थियो ।

सन्दीप भारतीय प्रिमियर लिग आईपीएल खेल्ने एक मात्रै नेपाली खेलाडी हुन् । आफूमाथि लागेको आरोपबारे लामिछाने यो समाचार तयार पार्दासम्म मौन छन् ।