कर्मचारीकाे भत्ता माेह : फर्जी रिर्पोट बनाएर बाेर्डमा पेस

A+ A A-

सरकारले कर्मचारी समायोजन गरेपछि वीर अस्पतालका कर्मचारीले केन्द्रमै बस्न फर्जी रिर्पोट बनाएर पेस गर्न थालेका छन् । राेग लागेकाे र चिकित्सकको निगरानीमा बस्नुपर्ने भनी रिर्पोट बनाएर मेडिकल बोर्डबाट पास गराई मन्त्रालयमा पेस गर्ने कर्मचारी बढेका हुन् ।

अस्पताल स्राेतका अनुसार शारीरिक रुपमा केही नभएका कर्मचारी दैनिक ४/५ किलोमिटर मोटरसाइकल चढेर आउने र भर्‍याङबाट तलमाथि गर्ने कर्मचारीलाई पनि कडा रोग भएका र गम्भीर प्रकृतिको रोग लागेकाे बिरामी भन्दै सिफारिस गरिएको छ ।

स्वास्थ्य मन्त्रालयले समायोजनको सूचना प्रकाशित गरेसँगै कर्मचारीले आफ्नो नजिक रहेका चिकित्सकको रिर्पोटका आधारमा मेडिकल बोर्डको सिफारिस लिएका छन् ।

कर्मचारी समायोजन ऐनको दफा ८ को उपदफा ४ मा प्रचलित कानूनले निर्धारण गरेको कडा रोग लागेको वा शारीरिक रूपमा अशक्त व्यक्तिले रोजेको ठाउँमा समायोजन हुन पाउने उल्लेख छ ।

नेपाल सरकारले गठन गरेको मेडिकल बोर्डले प्रमाणित गरेपछि मन्त्रालयले कर्मचारीलाई चाहेको स्थानमा समायोजन गर्ने व्यवस्था छ । सो दफालाई दुरुपयोग गर्दै वीर अस्पतालका १२ बढी कर्मचारीले मेडिकल बोर्डबाट कडा रोग भनी सिफारिस बनाएको अस्पताल स्रोतकाे भनाइ छ ।

दैनिक बाइकमा आउन सक्ने र अस्पतालको चौथो तलासम्म ओहोरदोहोर गर्न सक्ने कर्मचारीलाई सिफारिसमा भने उकालो ओरालो गर्नै नहुने भनी सिफारिस गरिएको छ ।

निजामती सेवा नियमावली २०५० का अनुसार कडा रोग भन्नाले मिर्गौला, मुटु र क्यान्सरसम्बन्धी रोगलाई जनाउँछ । तर, कर्मचारीको सिफारिसमा भने उच्च रक्तचाप, ढाडको दुखाइ, बाथजस्ता रोग भनी सिफारिस गरिएको छ ।

वीर अस्पतालमा तलबबाहेक ५० प्रतिशत भत्ता पाइने लोभमा दरबन्दी नै नभएको ठाउँमा पनि बोर्डको सिफारिस बनाएर उनीहरु बस्न खोजेको स्रोतको दाबी छ । कर्मचारी र चिकित्सकको मिलेमतोमा तयार पारिएका रिर्पोट मेडिकल बोर्डले पनि धमाधम स्वीकार गरिरहेको छ । यसमा पनि पैसाकाे चलखेल भएकाे शंका गरिएकाे छ ।

अस्पतालमा कार्यरत डिल्लीराम खनाल, डिल्लीराम आचार्य, युवराज सुवेदी, जीवनकुमार श्रेष्ठलगायतका कर्मचारीलाई मेडिकल बोर्डले बिरामी भनी सिफारिस गरेको छ ।

झुटा मेडिकल रिर्पोटको विषयमा मन्त्रालयका सचिव रामप्रसाद थपलियाले भने, ‘मेडिकल बोर्डबाट सिफारिस भएको छ तर फर्जी रिर्पोट म भन्न सक्दिनँ । मन्त्रालयमा पनि यस विषयमा अनौपचारिक छलफल भएको छ । सम्बन्धित व्यक्तिसँग छलफल गरी कारबाही अगाडि बढाइनेछ ।’

प्रकाशित मिति: बिहीबार, साउन १६, २०७६ ०१:०१