सफलताकाे उडानमा थिए सन्दीप, बलात्कारकाे आराेपपछि के हाेला भविष्य ?

A+ A A-

सन्दीप.. सन्दीप... भन्दै मैदान र सामाजिक सञ्जालमा घन्किने स्वरहरू एकाएक विरोधमा परिणत भएका छन् । त्यसको कारण हो, सन्दीप लामिछानेविरुद्ध प्रहरी वृत्त गौशालामा बलात्कार आरोपमा उजुरी पर्नु ।

भदौ ५ गते सन्दीपले होटलमा लगेर बलात्कार गरेको पीडितले बयान दिएकी छिन् । अनुसन्धान गरेपछि सत्यतथ्य बाहिर आऊला तर यो घटनाले सन्दीपको अबको क्रिकेट करिअर भने कस्तो रहला ? क्यारेवियन प्रिमियर लिग (सीपीएल) वेस्ट इन्डिजमा रहेका कप्तान सन्दीपको भनाइ आइसकेको छैन ।

यता, प्रहरीले विज्ञप्ति जारी गर्दै पीडितले दिएको उजुरीमा सूक्ष्म अनुसन्धान भइरहेको उल्लेख गरेको छ । ढिलोछिटो सन्दीपले आफूविरुद्ध लागेको आरोपबारे बोल्लान् । तर, उनीमाथि लागेको बलात्कारको मुद्दाले उनको क्रिकेट करिअरमा भने ठूलो धक्का लागेको छ ।

गत भदौ ५ गते सन्दीपले नाबालिकालाई पिंगलास्थानको काठमाडौं होटल इनमा राखेर बलात्कार गरेको उजुरी परेकाे छ । ५ गते दिउँसो सन्दीपले ती नाबालिकालाई घुम्नका लागि नगरकोट लगेका थिए । साँझ काठमाडौं फर्केर उनीहरू होटल इनमा बास बसेको र राति बलात्कार गरेको नाबालिकाले प्रहरीसामु बयान दिएकी छिन् ।

सन्दीपविरुद्ध लागेको बलात्कारको उजुरीले विश्व क्रिकेट जगत् नै हल्लिएको छ । हुन त यो आरोप मात्रै हो, प्रमाणित भइसकेको छैन । प्रमाणित भए नाबालिका बलात्कार गरेको मुद्दामा १२ वर्षसम्म जेल सजाय हुन सक्छ । सन्दीपले सफाइ पाए क्रिकेटमा फर्किन त फर्किएलान् तर पहिलेको जस्तो क्रेज नरहन सक्छ ।

अब रहला त्यो क्रेज ?

चितवनबाट क्रिकेट करिअर सुरु गरेका सन्दीप नेपाली राष्ट्रिय क्रिकेट टिमका कप्तान हुन् । तर, नेपाल क्रिकेट संघ (क्यान) ले बुधबार साँझ आकस्मिक बैठक राखेको छ । बैठकले उनलाई जिम्मेवारीबाट हटाउनेदेखि अनुसन्धान नसकिएसम्मका लागि प्रतिबन्ध लगाउन पनि सक्छ ।

यता, प्रहरीले पनि नगरकोट गएको सीसीटीभी फुटेजदेखि होटलको सीसीटीभी फुटेज हेर्दै अनुसन्धानलाई अगाडि बढाएको छ । सन्दीपलाई क्यानले मात्रै होइन, यो मुद्दामा मुछिएपछि अब उनलाई सीपीएल टिम जमैका तालावाजले पनि टिमबाट हटाउन सक्छ । र, उनी जोडिएका अन्य क्लबले पनि हटाउन सक्छन् ।

नेपालमा सन्दीपकै कारण धेरैले क्रिकेट खेल्न थाले, धेरैले क्रिकेट बुझे । र, सन्दीपलाई आइडल मान्दै उनकै पथमा हिँड्ने प्रयास धेरैले गरे । नेपालबाट अन्तर्राष्ट्रियस्तरमा सबै फ्रेन्चाइज लिग खेलेका सन्दीप सबैको प्रिय र आदर्श पात्र थिए । इन्डियन प्रिमियर लिग क्रिकेटमा दिल्ली क्यापिटल्समा अनुबन्धित भइसकेपछि उनले अन्य अन्तर्राष्ट्रिय फ्रेन्चाइज लिग खेले । उनको चर्चा विश्वभरि नै भयो । सबैको तारिफ पाए । प्रदर्शन पनि त्यहीअनुसारको गर्दै गए ।

१६ वर्षको उमेरमै राष्ट्रिय टिममा डेब्यु गर्दै सनसनी मच्चाएका उनले छोटो समयमा धेरै प्रगति गरे । तर, त्यो प्रगति र आफ्नो उचाइलाई उनले कायम राख्न सकेनन् । शून्यबाट सुरु भएको उनको करिअरले सगरमाथाको उचाइ चुमेको थियो । तर, अहिले फेरि शून्यमा झरेको छ । सन्दीपसामु ठूलो चुनौती पेस भएको छ, जुन आफ्नो चरित्रमै गम्भीर प्रश्न उठेको छ । यसबारे सन्दीप कसरी प्रस्तुत होलान् ? उनले यो आरोपको प्रस्टीकरण प्रहरीसामु मात्रै होइन, उनीमाथि विश्वास गर्ने, उनलाई आइडल मान्ने र समस्त क्रिकेट जगत्‌लाई वास्तविकता के हो, जानकारी दिनुपर्छ ।

आरोप पुष्टि भए सन्दीप लामो समय जेल जान सक्छन् । उनको करिअर नै समाप्त हुन्छ । आरोप प्रमाणित नभए सफाइ पाउँछन् । तर, आरोपसँगै गइसकेको इज्जत पहिलेकै जस्तो भने नहुन सक्छ । जसरी खेलिरहेका थिए, उनी त्यसरी खेल्न सक्दैनन् । बलात्कारीको ट्याग लागिसकेपछि सफाइ पाए पनि अन्तर्राष्ट्रिय फ्रेन्चाइज लिगमा टिममा अनुबन्धित हुने मौका उनले कमै पाउनेछन् ।

अब के ?

भदौ २१ गते मात्रै अभिनेता पल शाहविरुद्ध नाबालिका बलात्कार मुद्दाकाे फैसला भयो । अदालतको फैसलाअनुसार ‘बाल यौन दुरुपयोग मुद्दा’ मा उनी साढे दुई वर्ष चेल चलान भएका छन् । भदौ २१ गते नै क्रिकेट कप्तान सन्दीपविरुद्ध पनि एउटै प्रकृतिको उजुरी प्रहरीसामु पर्‍याे । शाह सुरुमा फरार भए पनि चार दिनपछि आफैँ प्रहरीसमक्ष उपस्थित भएका थिए ।

सन्दीप अहिले वेस्ट इन्डिजमा छन् । उनीमाथि बलात्कारको जाहेरी दर्तासँगै धेरैले सन्दीप स्वदेश नफर्किने, उतै बस्नेजस्ता आकलन गर्न थालेका छन् । तर, नेपाल प्रहरीले इन्टरपोलमार्फत उनलाई खोजी गर्ने अवस्थामा पुग्नुभन्दा अघि नै सन्दीप अनुसन्धानलाई सघाउन नेपाल आए राम्राे हुने उनका शुभचिन्तकहरूकाे राय छ ।

सम्बन्धित सामग्री:

५ भदाैमा टिमसँग थिएनन् कप्तान लामिछाने
बलात्कारकाे उजुरी दिने नाबालिकासँग सन्दीपकाे कसरी भएकाे थियाे चिनजान ?
क्यानको आकस्मिक बैठक बस्दै, सन्दीपलाई कप्तानबाट हटाउने

प्रकाशित मिति: बुधबार, भदौ २२, २०७९ १२:३२