सुरक्षा संयन्त्रको विश्लेषणः विप्लव समूह कमजोर

A+ A A-

प्रतिबन्धित नेत्रविक्रम चन्द ‘विप्लव’ नेकपा समूहको गतिविधिबारे सरकारले पछिल्लो समय गम्भीर विश्लेषण गर्दै उसका कार्यकर्ता पक्राउको अभियान तीव्र पारेको छ । केही दिनअघि विप्लव समूहका उपत्यका ब्युरो प्रमुख माइला लामा पक्राउ गरेको प्रहरीले मंगलबार साँझ काठमाडौं जिल्ला सेक्रेटरी धीरेन्द्रा उपाध्यायलाई पक्राउ गरेको छ ।

उनलाई लामा पक्राउको विरोधमा बन्दको प्रचार गर्दै गर्दा पक्राउ गरिएको प्रहरी प्रधान कार्यालयले जनाएको छ । उपाध्यायलाई प्रहरीले बूढानीलकण्ठबाट पक्राउ गरेको हो । सरकारले विप्लव नेकपा विभिन्न विध्वंसात्मक गतिविधिमा संलग्न रहेको भन्दै २८ फागुनमा उसका राजनीतिक गतिविधिमा प्रतिबन्ध लगाएको थियो ।

त्यसयता प्रहरीले विप्लव नेकपाका नेता कार्यकर्ता गरी ६ सय बढीलाई पक्राउ गरेर विभिन्न मुद्दा चलाएको छ । पछिल्लो समय सरकार र विप्लव समूहबीच वार्ताको हल्ला चलिरहेकै बेला माइला लामा पक्राउ परेपछि भने वार्ताको सम्भावना करिब सकिएको आँकलन गर्न थालिएको छ ।

गृह मन्त्रालय स्रोत वार्ताभन्दा कार्यकर्ता पक्राउ गरी विप्लव समूहलाई गलाएर वार्ताको बाटोमा आउन बाध्य पार्ने मनस्थितिमा सरकार रहेको बताउँछ । प्रहरी प्रधान कार्यालयको तथ्यांकअनुसार सरकारले प्रतिबन्ध लगाएयता विप्लव नेकपाका नेतृत्व तहकै १ सय ५० जना बढी पक्राउ परिसकेका छन् ।

विप्लव समूहका स्थायी समिति सदस्य हेमन्त प्रकाश वली ‘सुदर्शन’लाई हाल नख्खु कारागारमा राखिएको छ । उनीमाथि नख्खुकै एनसेल टावर अगाडि ११ फागुनमा बम विस्फोट गरेको अभियोग छ ।

त्यस्तै, पक्राउ पर्नेमा विभागीय प्रमुख, पोलिटब्युरो सदस्य, केन्द्रीय सदस्य, केही भ्रातृ संगठन प्रमुख र जिल्ला इन्चार्ज तथा सेक्रेटरी छन् । उनीहरुविरुद्ध चन्दा आतंक, बम विस्फोट आदि घटनाको अभियोग लगाइएकाे छ ।

सुरक्षा संयन्त्रको विश्लेषणमा विप्लव

सुरक्षा संयन्त्रको विश्लेषणअनुसार विप्लव नेकपा कमजोर बन्दै गएको छ । विप्लव नेकपाले उपत्यकामा बुधबार गरेको बन्दको प्रभाव केही नदेखिनु, अघिल्ला बन्दकाे समयमा आफैंले बोकेकाे बम विस्फोट हुँदा आफ्नै कायकर्ताको ज्यान जानुले उनीहरुको मनोबल खस्किँदै गएको हो ।

प्रहरी उच्च स्रोतका अनुसार विप्लव नेकपाका कार्यकर्तामा पछिल्लो समय निराशा बढ्दै गएको पाइएको छ ।

‘चन्दाबाट संकलन गरेको रकम नेतृत्व तहमा पुग्ने र कार्यकर्ता तहमा पैसाकै संकट देखिन्छ, उनीहरुको परिवारमा समेत आर्थिक अवस्थाकै कारण फाटो आउँदै गरेको पाइयो,’ एक उच्च प्रहरी अधिकारीले भने ।

त्यस्तै, विप्लव समूहसँग माओवादी युद्धको बेला कब्जा गरिएका केही थान हतियार भए पनि अधिकांश काम नलाग्ने अवस्थामा पुगेको हुन सक्ने सुरक्षा निकायको विश्लेषण छ ।

नेपाल प्रहरी, सशस्त्र प्रहरी बल, नेपाली सेना र राष्ट्रिय अनुसन्धान विभागका अनुसार विप्लव नेकपाले अहिलेकै अवस्थामा कुनै पनि हालतमा सुरक्षा निकायमाथि नै आक्रमण गर्न सक्ने अवस्था नरहेको जनाएको छ ।

‘एकातिर प्रविधिले फड्को मारेको छ । को कहाँ छ ? के भइरहेको छ ? एकछिनमै जानकारी हुन्छ, पहिलाको जस्तो सूचना नै नपुग्ने भन्ने छैन । यस्तो अवस्थामा सुरक्षाकर्मीमाथि लक्षित कुनै आक्रमण गर्नु विप्लवका लागि घातक हुन्छ,’ राष्ट्रिय अनुसन्धान विभागका एक अधिकारीले भने ।

यद्यपि, सुरक्षा सतर्कता भने अपनाउन आफू मातहतका निकायलाई निर्देशन दिएकाे ती अधिकारीको भनाइ छ ।

विप्लव नेकपासँग तालिमप्राप्त जनशक्तिको संख्यासमेत अत्यन्त कम रहेको सुरक्षा निकायको अनुमान छ । अहिले विप्लव नेकपाले जनसेनाका लागि भनेर भर्ती खोलिरहेको सूचना सुरक्षा निकायसम्म पुगेको छ ।

यसरी सुरक्षा निकायले विप्लव नेकपाबाट आन्तरिक सुरक्षामा केही असर पारे पनि खतरा नरहेको निष्कर्ष निकालेका छन् ।

२४ थान हतियार बरामद

सरकारले विप्लव नेकपालाई प्रतिबन्ध लगाएयता प्रहरीले २४ थान अत्याधुनिक हतियार बरामद गरेको छ । प्रहरीले देशका विभिन्न जिल्लाबाट सो हतियार बरामद गरेको हो । बरामद हतियारमध्ये एक थान नेपाली सेनाले बोक्दै आएको एलएमजीसमेत छ । त्यस्तै, एसएमजी, नेपाल प्रहरीले बोक्दै आएको एम १६ राइफल, एसएलआर राइफल र अटोमेटिक पेस्तोल बरामद गरेको छ । बरामद गरिएको हतियारको प्रकृति हेर्दा विप्लव नेकपासँग केही थान अत्याधुनिक हतियार रहेको प्रहरीको अनुमान छ ।

विप्लव नेकपाले निर्माण गरेका चार कम्पनी जनसेनामध्ये विप्लवको सुरक्षाका लागि खटिएका जनसेनासँग केही मात्रामा अत्याधुनिक हतियार रहेको प्रहरीको अनुमान छ । सो टिमसँग नेपाली सेनाले बोक्ने हतियार रहेको अनुमान प्रहरीको छ ।

प्रतिबन्धयता ८ जनाको मृत्यु

सरकारले प्रतिबन्ध लगाएयता विप्लव नेकपाका ८ जना कार्यकताले ज्यान गुमाएका छन् । यसमध्ये दुई जनाले प्रहरीको गोली लागेर ज्यान गुमाएका हुन् ।

अन्य ६ जनाले भने आफैंले बोकेको बम विस्फोट हुँदा ज्यान गुमाएका हुन् । ज्यान गुमाउनेहरुमा काठमाडौंका चार, भोजपुरका दुई , कैलालीका एक र सर्लाहीका एक जना छन् ।

त्यस्तै, एक प्रहरी जवानले विप्लव समूहको गोली लागेर ज्यान गुमाइसकेका छन् ।

प्रकाशित मिति: बुधबार, साउन १५, २०७६ २२:३२