विवादपछि एन्फाका एथ्लेटिक प्रशिक्षक बर्खास्त, गोलकिपर किरणलाई चेतावनी

A+ A A-

खेलाडीसँगको विवादपछि अखिल नेपाल फुटबल संघ (एन्फा)ले राष्ट्रिय फुटबल टिमका एथ्लेटिक प्रशिक्षक विवेक विक्रान्त अधिकारीलाई बर्खास्त गरेको छ ।

एन्फाले गोलकिपर किरण चेम्जोङलगायत विवादमा नाम मुछिएका अन्य खेलाडीलाई अनुशासनमा रहन चेतावनी दिनेसमेत निर्णय गरेको छ ।

एन्फा कार्यसमितिको आकस्मिक बैठकले प्रशिक्षक विवेकलाई बर्खास्त गर्ने निर्णय गरेको थियो । साथै, नाम नखुलाई केही खेलाडीलाई अनुशासनको चेतावनी दिने निर्णय पनि गरेको थियो ।

९ असारमा राष्ट्रिय टिमका पहिलो रोजाइका गोलकिपर किरण र विवेकबीच विवाद भएकाले सो चेतावनी किरणसहित केही खेलाडीप्रति लक्षित रहेको स्पष्ट छ ।

विवादपछि विवेकले किरणलाई पछ्याएर अनुहारमा चिया खन्याइदिएपछि त्यसको समाधानका लागि एन्फाले आकस्मिक बैठक बोलाएको थियो ।

विवादलाई कार्यसमितिमार्फत सम्बोधन गर्नुअघि एन्फाले केन्द्रीय सदस्य मधुसूदन उपाध्यायको संयोजकत्वमा छानबिन समिति गठन गर्दै कारबाही अघि बढाएको थियो ।

छानबिन समितिले ट्रेनरलाई बर्खास्त गर्दै किरणसहित अन्य खेलाडीलाई अनुशासनको चेतावनी दिने सुझाव दिएपछि एन्फा कार्यसमितिले सो निर्णय गरेको थियो ।

‘विवादको घटनामा विवेक र किरणको प्रत्यक्ष संलग्नता देखिए पनि अन्य खेलाडीको पनि नाम मुछिएको छ त्यसैले प्रशिक्षकलाई बर्खास्त गर्दै नाम नखुलाई संलग्न सबै खेलाडीलाई चेतावनी दिइनुपर्ने सुझावअनुसार हामीले कारबाही अघि बढाएका हौं,’ एन्फाका प्रवक्ता किरण राईले भने ।

विवादअघि पनि राष्ट्रिय टिमका खेलाडी प्रशिक्षणलाई लिएर सन्तुष्ट थिएनन् । किरण त्यसअघि नै खेलाडीको हस्ताक्षर संकलन गर्दै प्रशिक्षण पक्षको विरोधमा उत्रिएका थिए । तर, एन्फाले त्यो हस्ताक्षर बुझ्न नसक्ने बताउँदै त्यस्ता कदम अनुशासनहीनताको उदाहरण रहेको बताएको छ ।

‘प्रशिक्षक चित्त बुझेन भन्दैमा खेलाडीले त्यसको विरोधमा हस्ताक्षर संकलन गर्दै हिँड्नु न्यायसंगत होइन । आज प्रशिक्षक चित्त बुझेन भन्दै हिँड्नले भोलि अध्यक्ष नै चित्त बुझेन भन्न सक्छन् । चित्त नबुझेका कुरा सम्बोधन गर्ने हामीसँग एउटा माध्यम छ । त्यसको अधीनमा रहेर खेलाडी र पदाधिकारी सबैले आफ्नो कारबाही अघि बढाउनुपर्छ । यसले एउटा नियमसंगत अघि बढ्ने संस्कृतिको विकासमा पनि मद्दत गर्छ,’ एन्फाका एक पदाधिकारीले भनेका छन् ।

किरणलाई इन्डियन सुपर लिगमा खेल्न भारतीय क्लब मिनेर्वा पन्जाबले अनुबन्ध गरिसकेको छ । राष्ट्रिय टिमका अलावा किरणसँग भारतीय र माल्दिभ्सका टिमको पोस्ट सम्हालेको अनुभव पनि छ ।

प्रकाशित मिति: बुधबार, साउन १५, २०७६ १८:५५