जसपालाई दिएको ‘धोका’ आफूतिर फर्कने डरले हच्किएका विमलेन्द्र

A+ A A-

२०७४ को प्रतिनिधिसभा चुनावअघि कांग्रेस नेता विमलेन्द्र निधिले भनेका थिए, ‘मिथिलाको राजधानी जनकपुर मेरो घर हो । यहाँ मैले बामे सर्न सिकेँ, पढेँ, हुर्किएँ । मेरो राजनीति धनुषाबाट सुरु भएर राष्ट्रिय भयो ...।’

उक्त चुनावमा निधि तत्कालीन राष्ट्रिय जनता पार्टीका का नेता राजेन्द्र महतोसँग पराजित भए । महतो हाल लोकतान्त्रिक समाजवादी पार्टीका नेता छन् । ०७४ मा महतोले ३० हजार ७२५ मत ल्याएर विजयी हुँदा निधिले २७ हजार ८४७ मत ल्याएका थिए ।

विद्यार्थी राजनीतिबाट आएका निधिले ०५१ को मध्यावधि चुनाव जिते । ०५६ मा कृष्ण मल्लसँग पराजित भए । ०६४ र ७० को संविधानसभामा चुनावमा पनि उनले जित निकालेका थिए ।

तर, ०७९ सालको प्रतिनिधिसभा चुनावसम्म आइपुग्दा भने निधिले धनुषा- ३ मा आफ्नो पक्षमा माहोल बिग्रिएको भेउ पाइसकेका छन् । अघिल्लोपटक महतोसँग पराजित भएका निधिले यसपटक महतोसँगको भिडन्त रुचाएका छैनन्, बरु समानुपातिकमा रुचि देखाएका छन् ।

पार्टी सभापति शेरबहादुर देउवको इच्छामा ‘ब्याक’ हुने मनस्थितिमा पुगेका निधिले बुधबार स्थानीय कार्यकर्तामाझ भनेको थिए, ‘समानुपातिक सांसद भए पनि अन्यथा नबुझ्न धनुषा क्षेत्र नं. ३ का नेता कार्यकर्तालाई आग्रह गर्दछु ।’ धनुषा- ३ बाट क्षेत्रीय समितिले निधिको नाम प्रतिनिधिसभाको समानुपातिकतर्फ सिफारिस गरेको छ ।

किन बिग्रियो माहोल ?

गत स्थानीय चुनावमा पाँचदलीय गठबन्धनले चुनावी तालमेल गर्‍यो । महानगर र उपमहानगरमा भने कुन पार्टीले उम्मेदवार उठाउने भनेर शीर्ष नेताहरूले नै निर्णय गरे ।

उक्त निर्णयअनुसार धनुषाको जनकपुरधाम उपमहानगरपालिकामा गठबन्धनको तर्फबाट जनता समाजवादी पार्टीले उम्मेदवार उठायो । तर, त्यसप्रति असन्तुष्टि जनाउँदै निधिनिकट मनोजकुमार साहले स्वतन्त्र उम्मेदवारी दिएर जिते ।

यो परिणामलाई जसपाले निधिले दिएको धोकाको रूपमा बुझेको छ । अहिले आफू प्रतिनिधिसभाको उम्मेदवार बन्दा धनुषामा त्यही धोका आफूतिर फर्किने डरमा निधि छन् । जसका कारण उनले यसपटक समानुपातिक रोजेको बुझ्न गाह्रो छैन ।

अर्काेतर्फ देउवालाई लामो समय साथ दिएका निधिले कांग्रेसको १४ औँ महाधिवेशनमा देउवालाई टक्कर दिँदै सभापतिमा उम्मेदवारी दिए । दोस्रो चरणमा देउवालाई नै साथ दिएको भए पनि पार्टीभित्र देउवा समूहमै उनको पक्कड पहिलेजस्तै छैन ।

जसका कारण एकातर्फ पार्टीभित्रकै विश्वास जित्नु र अर्कातर्फ गठबन्धनलाई विश्वासमा लिनु दोहोरो चुनौती निधिका सामुन्ने छ । यी चुनौती सहजै पार लागिहाल्ने खालका नरहेको कांग्रेसकै नेताहरू बताउँछन् ।

निधि स्वयंले भने यस विषयमा खुलेर कुरा गर्न चाहेनन् । प्रत्यक्षमा बस्ने वा समानुपातिक स्वीकार गर्ने भन्नेमा निधिले स्पष्ट खुलाएनन् । ‘सिफारिस भइसकेको छैन । प्रस्ताव मात्र गरेको हो,’ निधिले शिलापत्रसँग भने, ‘पहिले समानुपातिक सिफारिस हुन त दिनु त्यसपछि कुरा गरौँला ।’

लोसपामाथि सद्भाव !

आफू समानुपातिकमा बसेर लोसपाका राजेन्द्र महतोलाई सहयोग गर्ने निधिको चाहना देखिन्छ । देउवा पनि लोसपालाई गठबन्धनमा सहभागी गराउन प्रयासरत छन् । लोसपा पनि गठबन्धनमा सहभागी हुन प्रयासरत छ ।

यस विषयमा लोसपाका शीर्ष नेता र देउवाबीच बालुवाटारमा पटक-पटक वार्ता भएको छ । पार्टीको बैठकदेखि गठबन्धनको बैठकसम्म देउवाले लोसपालाई सरकारमा ल्याउनु पर्छ भन्दै आएका छन् । बाहिरबाट भए पनि लोसपालाइ सहयोग गर्नुपर्ने उनको आसय देखिन्छ ।

बिहीबारको सिट बाँडफाँट कार्यदल र शीर्ष नेताको बैठकमा पनि देउवाले सो कुरा उठाए । निधि प्रत्यक्ष लड्दा महतोलाई अप्ठेरो पर्न सक्छ । लोसपा गठबन्धनमा सहभागी बने महतोले उक्त क्षेत्र दाबी गरेमा निधिलाई अप्ठेरो पर्ने छ भने गठबन्धन बाहिर रहेमा पनि उनको चुनौती सामना गर्नुपर्ने हुनसक्छ ।

बालुवाटारमा पनि निधिलाई समानुपातिक उम्मेदवार बनाउने सहमति पहिल्यै भएको थियो । ‘पटक–पटकको छलफलमा निधिलाई समानुपातिक उम्मेदवार बनाउने कुरा भएको हो,’ बालुवाटार स्रोतले शिलापत्रसँग भन्यो, ‘राजेन्द्र महतोलाई सहज रूपमा संसद प्रवेशका लागि त्यो कदम चाल्न प्रधानमन्त्रीले पहल लिनुभएको हो ।’

महतोको संकेत

राजेन्द्र महतो भने अवस्था नियालिरहेका छन् । उम्मेदवारीका बारेमा महतोले प्रतिक्रिया दिइसकेका छैनन् । लोसपाका नेताहरूका अनुसार महतो अघिल्लो पटक जितेको क्षेत्र छाड्ने पक्षमा छैनन् ।

‘राजेन्द्रजी निर्वाचित माननीय हुनुहुन्छ । अहिले क्षेत्र छाड्ने कुनै कुरा छैन,’ लोसपाका नेता डा. सुरेन्द्र झाले शिलापत्रसँग भने, ‘उहाँले घोषणा पनि गर्नुभएको छैन । पार्टीले पनि निर्णय लिएको छैन । उहाँ ३ नं बाटै निर्वाचन लड्नुहुन्छ ।’

तर, निधिले निर्णय नगरिसकेको भन्दै लोसपाका नेताहरू अहिलेसम्म ढुक्क भने भइसकेका देखिँदैनन् । ‘निधिजी आफैँ ब्याक भएका होइनन् । परिस्थिति हेरेर ब्याक भएको भन्नुभएको छ,’ लोसपाका एक नेताले शिलापत्रसँग भने, ‘कांग्रेसले पनि निर्णय गर्छ । उहाँका कार्यकर्ताले तपाईं नै लड्नुपर्छ भनिरहेका छन् ।’

प्रकाशित मिति: शुक्रबार, भदौ १७, २०७९ १९:०६