प्रदेश ५ को बजेट खर्च ७४ दशमवल ६ प्रतिशत

A+ A A-

प्रदेश ५ का मुख्यमन्त्री शंकर पोखरेलले प्रदेश ५ सरकारले ७४ दशमवल ६ प्रतिशत बजेट खर्च गरेको दावी गरेका छन् ।

मंगलबार पत्रकार सम्मेलनको आयोजना गर्दै उनले प्रदेश सरकारले प्रदेश कोष तथा लेखा नियन्त्रण कार्यालयले सार्वजनिक गरेको प्रदेश सरकारले गरेको खर्चको तथ्याङक भन्दा ११ प्रतिशत बढी खर्च गरेको दाबी गरे । मुख्यमन्त्री पोखरेलले प्रदेश सरकारले गत आर्थिक बर्ष २०७५/०७६ मा ७४.६ प्रतिशत खर्च गरेको दाबी गरेका हुन् ।

यसअघि प्रदेश कोष तथा लेखा नियन्त्रण कार्यालयले प्रदेश सरकारको खर्च ६३.४६ प्रतिशत खर्च गरेको बिवरण सार्बजनिक गरेको थियो ।

प्रदेश सरकारले संघबाट प्राप्त सशर्त तर्फका आयोजनामा थप काम गरी संघीय सरकारबाट सिधै भुक्तानी भएको २ अर्ब २५ करोड रुपैयां समेत जोडेर खर्च प्रतिसत बढाएको हो ।

यद्यपि सो रकम प्रदेश संचित कोषमा नआई संघबाटै भुक्तानी हुने भएकाले त्यसको हिसाव प्रदेश कोलेनिकामा हुदैन । संगठन संरचना ढिलो प्राप्त हुनु,कानूनी अस्पष्टता,संघबाट प्राप्त हुने आयोजना समयमै नआउनु र प्राप्त भएका आयोजनाका फाइल र वजेट सुनिश्चितता पनि ढिलो भएको, विषयगत जनशक्ति अभाावले लक्ष्य अनुसार वजेट खर्च नसकेको पनि मुख्यमन्त्री पोखरेलले बताए ।

यसैगरी प्रदेश ५ सरकारले प्रदेश भित्र अर्थतन्त्रमा सकारात्मक परिवर्तनका संकेतहरु देखापर्न थालेको निष्कर्ष निकालेको छ । तिन दिन सम्म बसेको प्रदेशको प्रदेश विकास समस्या समाधान समितिको बैठकले सो निष्कर्ष निकालेको हो ।

बैठकले प्रदेश भित्र संघीय,प्रदेश स्थानीय सरकारहरुले लिएका आर्थिक नीति एवं कार्यक्रमहरुबाट अर्थतन्त्रमा सकारात्मक परिवतनका संकेतहरु देखापर्न थालेको निष्कर्ष निकालेको हो ।

आन्तरिक राजस्व संकलनतर्फ विभिन्न शीर्षकमा कूल रु. २ अर्ब ४० करोड राजस्व संकलन गर्ने लक्ष्य रहेकोमा रु. २ अर्ब ८० करोड २८ लाख राजस्व संकलन भई लक्ष्यको तुलनामा १ सय १६.७८५ प्रगति हासिल भएको सरकारका उपलब्धीमा उल्लेख छ ।

प्रदेश विकासका लागि लगानीकर्ताहरुलाई उत्प्रेरित गर्ने, लगानीका सम्भावनाहरु पहिचान गर्ने,सामाजिक सांस्कृतिक सम्बन्ध विस्तार गर्ने उदेश्य सहित मुख्यमन्त्री शंकर पोखरेलको नेतृत्वमा चीनको भ्रमण भएको र भ्रमणका क्रममा चीनको सिचुवान प्रान्तसँग भगिनी सम्बन्ध विस्तार हुनुकासाथै गान्सु प्रान्तसँग सम्बन्ध विस्तारका लागि छलफल भएकोलाई पनि प्रदेश सरकारले उपलब्धिको रुपमा लिएको छ ।

यसैगरी प्रदेश सरकारले १ सय १६ कि.मि. सडकको नयाँ ट्रयाक खोलेको, ५ सय १५ कि.मि. सडक चौडा गरेको, २ सय ४८ कि.मि. सडक ग्राभेल गरेको, २ सय २ कि.मि. सडक कालोपत्रे गर्नुका साथै ७१ कि.मि.सडक कालोपत्रेका लागि तयारी अवस्थामा रहेको जनाइएको छ ।

प्रकाशित मिति: बुधबार, साउन १५, २०७६ ०५:३७