विद्युतीय सवारीः एक रुपैयाँमा एक किलोमिटर यात्रा, एपबाटै हुन्छ चार्जिङको बुक (भिडियो)

विद्युतीय सवारीः एक रुपैयाँमा एक किलोमिटर यात्रा, एपबाटै हुन्छ चार्जिङको बुक (भिडियो)

A+ A A-

नेपाल विद्युत् प्राधिकरणले विद्युतीय सवारीको प्रयोगलाई प्रोत्साहन गर्न ‘इलेक्ट्रिक भेइकल’ अर्थात् ‘ईभी चार्जिङ स्टेसन’ सञ्चालनमा ल्याएको छ । वार्षिक २ खर्बभन्दा बढीको पेट्रोलियम पदार्थ आयातका कारण व्यापारघाटा उच्च हुँदै गएका बेला प्राधिकरणले विद्युतीय सवारीसाधनको प्रयोगमा प्रोत्साहन गर्न यस्तो कदम चालेको हो ।

प्राधिकरणका अनुसार विद्युतीय सवारीका लागि ‘स्लो’ र ‘फास्ट’ चार्ज हुने चार्जिङ स्टेसन छन् । घरमै पनि १६ एम्पियरको ‘प्लग’बाट स्लो चार्ज गर्न सकिन्छ । तर, कम समयमा होस् वा यात्रामा रहँदा चिया/खाजा खाने बेला चार्ज गर्न ‘फास्ट’ चार्जरको प्रयोग गर्न सकिने प्राधिकरणले जनाएको छ ।

फुल चार्ज गर्न कति समय लाग्छ ?

विद्युतीय सवारीमा भएको ब्याट्री ७० किलोवाटको भए फुल चार्ज हुन १ घण्टा समय लाग्छ । तर, ९० किलोवाटको ब्याट्री भए डेढ घण्टामा फुल हुन्छ । चार्जिङ स्टेसनमा भने १० किलोवाटदेखि १२० किलोवाटसम्मका सवारीसाधन पनि चार्ज गर्न मिल्छ ।

ईभी चार्जिङ स्टेसनका प्रोजेक्ट म्यानेजर सागर भण्डारी आगामी दुई महिनासम्ममा देशका मुख्य राजमार्गहरूमा पनि चार्जिङ स्टेसन स्थापना गरिने बताउँछन् ।

‘रेन्ज इन्जाईटी नहोस् भनेर प्रत्येक मुख्य राजमार्गमा ६०–७० किलोमिटरको दूरीमा यस किसिमका डीसी फास्ट चार्जर राख्छौँ । मोबाइल एपमार्फत कहाँ चार्जर स्टेसन छ ? थाहा पाउन सकिन्छ,’ भण्डारीले शिलापत्रसँग भने, ‘साथै एपमार्फत् नै चार्जिङका लागि बुक गर्न सकिन्छ ।’

प्रोजेक्टका इलेक्ट्रिकल इन्जिनियर विवश आचार्यले चार्ज गरेबापत खपत भएको विद्युत्‌को महसुललाई आधार मान्दा एक किलोमिटर बराबर एक रुपैयाँ खर्च हुने बताए । पेट्रोल भने एक किलोमिटर दूरीमा कम्तीमा चार रूपैयाँको खर्च हुने गरेको छ ।

हेर्नुस् भिडियो: