कतारसँग सम्बन्ध बिग्रिने डरले बर्खास्त हुनबाट जोगिएका अल्मुताइरी

A+ A A-

एकपछि अर्को विवादमा तानिएका अब्दुल्लाह अल्मुताइरी अझै नेपाली राष्ट्रिय फुटबल टिमको मुख्य प्रशिक्षकमा छन् । टिममा निकालेको विवाद, खेलाडीलाई गर्ने व्यवहार, समर्थकको उक्साहट र मैदानमा देखाउने अनैतिक कार्यले उनी यसअघि नै बर्खास्तीमा परिसक्नुपर्ने प्रशिक्षक हुन् ।

अखिल नेपाल फुटबल संघ (एन्फा) का लागि प्रशिक्षक अल्मुताइरी ‘घाँडो’ जस्तै भएका छन् । अल्मुताइरीले नै जुहारी खोजेका वरिष्ठ उपाध्यक्ष पंकजविक्रम नेम्वाङ एन्फाको अध्यक्ष निर्वाचित भए । तर, अल्मुताइरीलाई तत्काल बर्खास्त गर्न एन्फाको अहिलेको कार्यसमिति पनि डराउँछ । कारण, कतार फुटबल संघ । कतारको अनुदानमा अल्मुताइरी नेपालको प्रशिक्षक बनेका हुन् । तत्काल बर्खास्त गरे कतार फुटबलसँगको सम्बन्ध बिग्रिन्छ र नेपाल–कतार सम्बन्धमा चिसोपना आउने र बेलामौकाको सहयोग रोकिन्छ भन्ने एन्फालाई त्रास छ ।

छानबिन समितिले अल्मुताइरीको विकल्प खोज्न भनेर सुझाव दिइसकेको छ । तर, विभिन्न विवाद र समस्या सिर्जना गर्ने अल्मुताइरीलाई बर्खास्त गर्दै हटाउनुपर्ने कारणहरूको फेहरिस्त हटायौँ भनेर कारणसहित कतार फुटबल संघलाई पत्र काट्न एन्फा सक्दैन ।

बंगलादेशविरुद्धको मैत्रीपूर्ण खेलका लागि बन्द प्रशिक्षणमा रहेका कप्तान किरण चेम्जोङ प्रशिक्षक अल्मुताइरीले टिम बिगारेकोमा आफू दुःखी रहेको बताए । ‘प्रशिक्षक त आउने जाने गर्छ । तर, टिम बिगारेको देख्दा दुःख लाग्छ’, उनले भने ।

अल्मुताइरीको अस्त्र
‘हाम्रो राष्ट्र
हाम्रो राष्ट्रिय गान
हाम्रो शान’

यस्तै, ‘स्लोगन’ सहित सुरुवाती चरणबाट नै उनले सामाजिक सञ्जालमा पोस्ट गरेर नेपाली फुटबल समर्थकलाई प्रभावित पार्न थालेका थिए । मुख्य प्रशिक्षकमा नियुक्त भइसकेपछि सामाजिक सञ्जालमा सक्रिय भएका अल्मुताइरीले नेपाली फुटबल समर्थकलाई आफ्नो पक्षमा पार्न धेरै किसिमका रणनीति अख्तियार गरे ।

पहिले त अल्मुताइरीले नेपाली फुटबलको राम्रो अध्ययन गरे । राम्रो पक्ष, नराम्रो पक्ष, कहाँ के कमजोरी, हरेक कोणबाट उनले नेपाली फुटबलको सूक्ष्म अध्ययन गरे । त्यसपछि उनको पहिलो प्राथमिकता थियो, समर्थक आफूतिर तान्नु ।

फुटबल समर्थकले गरेको कमेन्टमा उनी रिप्लाई दिँदै आफू नेपाली फुटबल विकासको ‘भगवान्’ भएको दर्शक र समर्थकलाई विश्वास दिलाउने प्रयासमा सक्रिय देखिए । यो उनको पहिलो रणनीति थियो । र, उनी सफल पनि भए ।

समर्थकलाई आफूतिर तानिसकेपछि उनी खेलाडीलाई पनि आफ्नो पक्षमा पार्नका लागि यस्तो अस्त्र प्रहार गरे, जसबाट प्रसन्न हुँदै खेलाडीहरू पनि प्रशिक्षकको पक्षमा भए । त्यो अस्त्र थियो, ‘खेलाडीलाई गाली नगर्नु, नतिजा राम्रो नआए मेरो दोष ।’

सुरुमा खेलाडीप्रति अधिक माया र सम्मान गरे । खेलमा नराम्रो नतिजा आए खेलाडीको दोष नहुने तर्क गर्दै सबै गल्तीहरू आफू लिन तयार भए । सामाजिक सञ्जालमा उनले यस्तै प्रकृतिका र समर्थकलाई उत्तेजना बनाउने स्टाटसहरू लेखिरहे ।

सञ्चारकर्मी–अल्मुताइरी– पंकज विवाद

गत वर्षको ८ साउनमा अल्मुताइरी र सञ्चारकर्मीबीच विवाद भयो । विवादको कारण थियो, अल्मुताइरीले एन्फा परिसरमा चुरोट पिएको विषय । पछि प्रशिक्षक अल्मुताइरीले यही विषयलाई लिएर वरिष्ठ उपाध्यक्ष पंकजविक्रम नेम्वाङलाई मुछिदिए ।

अल्मुताइरीले सामाजिक सञ्जालमा १० साउन राजीनामा नै घोषणा गरे । उनले लेखेका थिए, ‘डियर नेपाली फ्यान्स राजीनामा दिन एन्फा जाँदैछु । मेरो राजीनामा वरिष्ठ उपाध्यक्षका कारण हो । पछिल्लो तीन हप्तादेखि उनले ममाथि नाटक गरिरहेको छ । अब खुसी होलान् ।’

तर, एन्फामा उनले आधिकारिक राजीनामा भने दिएनन् ।

यसपछि त झनै विवाद मच्चियो । यसअघिसम्म सञ्चारकर्मीलाई गाली गरिरहने फुटबल समर्थक अब वरिष्ठ उपाध्यक्ष नेम्वाङविरुद्ध खनिए । यसरी खनिए उनलाई नेपाली फुटबलको ‘भिलेन’ नै बनाइयो । यहाँ अल्मुताइरीले सुरुमै प्रहार गरेको अस्त्रले राम्रो काम गर्‍यो ।

त्यसपछि उनले एन्फालाई ठूलै चेतावनी दिए । सञ्चारकर्मीले अन्यायपूर्ण समाचार छापेको र पंकजसँग जोडिएको विवादको विषय २६ साउनभित्र नसकिए आफू राजीनामा दिएर तत्काल देश छाड्ने भन्दै अल्मुताइरीले एन्फामा निवेदन दिए । तर, २६ साउनभित्र विवाद समाधान भएन । न उनले राजीनामा नै दिए, न देश नै छाडे ।

यता, तत्कालीन वरिष्ठ उपाध्यक्ष नेम्वाङले पनि आफूलाई लगाइएको झुटा आरोपको छानबिन गर्न एन्फामा निवेदन दिए । त्यसपछि एन्फाको आकस्मिक बैठकले वरिष्ठ उपाध्यक्ष नेम्वाङ र अल्मुताइरीको विवादको विषयमा छानबिन गर्न युवा तथा खेलकुद मन्त्रालयलाई पत्र पठायो । मन्त्रालयले छानबिनको जिम्मा राष्ट्रिय खेलकुद परिषद् (राखेप) लाई जिम्मा दियो । त्यसपछि १९ साउनमा राखेपले बोर्ड सदस्य पुरेन्द्रविक्रम लाखेको संयोजकत्वमा सातसदस्यीय विवाद छानबिन समिति गठन गर्‍यो ।

समीतिले सबैको बयान लिइसकेपछि प्रतिवेदन बुझाइएको थियो । राखेप सदस्यसचिव रमेश सिलवाललाई बुझाएको प्रतिवेदनमा अल्मुताइरीले व्यक्तिगत आचरण सुधार गर्नुपर्नेसहित ११ बुँदे प्रतिवेदन पेस गरेको थियो । सामाजिक सञ्जालमा अनावश्यक नलेख्ने, पाएको जिम्मेवारीअनुसार मात्रै काम गर्नुपर्ने र विवाद सिर्जना हुने कुनै पनि गतिविधि गर्न नपाउनेलगायतका सुझाव थिए । तर, अल्मुताइरी रोकिएनन् । न त उनले छानबिन समितिको सुझाव नै टेरे ।

अल्मुताइरीको नाटक

२०७८ साल असोजमा माल्दिभ्समा साफ च्याम्पियनसिपमा नेपाल इतिहास रच्दै पहिलोपटक फाइनलमा पुग्यो । पहिलोपटक फाइनल पुगेको जस खेलाडीले भन्दा प्रशिक्षकले पाए । कारण उनकै प्रशिक्षणमा नेपाल पहिलोपटक साफ च्याम्पियनसिपको फाइनल पुग्नु थियो ।

समर्थकहरू अल्मुताइरीकै पछि लागे । अल्मुताइरीकै कारण नेपाल पहिलोपटक फाइनलमा पुग्यो भन्दै विश्लेषणहरू पनि आए ।

२०७८ मै उनको करार अवधि सकिँदै थियो । अल्मुताइरीले माल्दिभ्समा साफ च्याम्पियनसिपमा भारतविरुद्धको फाइनलअघि अब नेपाल नफर्किने घोषणा गरे । यो उनको घोषणा साँच्चिकै नभएर नाटक मात्र थियो । समर्थकको मन जित्नु थियो । एन्फालाई नराम्रो देखाउनु थियो । फाइनलमा नेपाल भारतसँग ३–० ले हार्‍यो । नेपाल उपाधि जित्न चुक्यो । नेपाली टिम स्वदेश फर्किए, अल्मुताइरी कतार ।

अल्मुताइरीलाई स्वेदश फर्काउन एन्फा अध्यक्ष कर्माछिरिङ शेर्पा पूरै लागिपरे । अन्ततः नेपाल नआउने घोषणा गरेका अल्मुताइरी फेरि नेपाली टिम सम्हाल्न फर्किए । त्यो पनि तीन वर्षको अवधि थपेर ।

रोहित– अल्मुताइरी फ्याक्टर

राष्ट्रिय टिमका खेलाडी र मुख्य प्रशिक्षकबीच पहिलोपटक यति ठूलो विवाद भयो । जुन विवादले नेपाली खेलकुदमा ठूलै कम्पन ल्यायो । जसको कारण सिनियर १० खेलाडी पहिलोपटक राष्ट्रिय टिमबाहिर रहेर अन्याय भयो भन्दै गुहारिरहे । यता, प्रशिक्षक भने झनै कठोर बन्दै अन्य नयाँ खेलाडी बटुलेर एसियन कप छनोट खेल्न कुवेत प्रस्थान गरे ।

गत वैशाखको दोस्रो हप्ता रोहित चन्दले होस्टलमा सामान्य सुविधाहरू पनि नभएको भन्दै खेलाडीलाई होटलमा राख्नुपर्ने माग राखे ।

यो कुरा राख्न अन्य खेलाडीले नै रोहितलाई अगाडि सारेका थिए । तर, प्रशिक्षक अल्मुताइरी रिसाए । 'होस्टलमा कि होटलमा ?' भन्दै खेलाडीलाई उठाउन लगाए । होटलमा बस्नेमा रोहितले हात उठाए । तर, डरले अन्य खेलाडीले भने रोहितसँगै हात उठाएनन् । यसपछि रोहितलाई क्याम्प छाड्न बाध्य बनाइयो ।

रोहितले क्लोज क्याम्प छाडेपछि उनलाई न्याय नभएको भन्दै अन्य नौ खेलाडी प्रशिक्षकसामु गए । तर, प्रशिक्षक अल्मुताइरी रिसाउँदै रोहितको टिमबाट खेल्ने कि मेरो टिमबाट भन्दै धम्क्याए । यसपछि अञ्जन विष्ट, विमल घर्ती मगर, अनन्त तामाङ, विशाल राई, सुजल श्रेष्ठ, तेज तामाङ, दिनेश राजवंशी, सुमन लामा र विशाल श्रेष्ठ गरी नौ जना खेलाडीले पनि १३ वैशाखमा क्लोज क्याम्प छाडे । आफूले आफूलाई ‘खेलाडीको पिता’ भन्ने अल्मुताइरीको कार्यशैली र व्यवहारप्रति खेलाडीको असन्तुष्टि थियो ।

विवाद सामान्य थियो । यो विवाद खेलाडी र प्रशिक्षकलाई राखेर एन्फाले तत्काल समाधान गर्न सक्नुपर्थ्यो । तर, यहाँ अखिल नेपाल फुटबल संघ (एन्फा) मुकदर्शक बन्यो । अझ भनौँ, प्रशिक्षक अल्मुताइरीलाई झनै खेल्ने ठाउँ दिइयो ।

खेलाडीलाई निकालिएको सम्बन्धमा माल्दिभ्समा लिग खेलिरहेका कप्तान किरण चेम्जोङले सामाजिक सञ्जालमा स्टाटस लेख्दै प्रशिक्षकको कार्यशैलीप्रति असन्तुष्टि जनाए । जसको कारण उनी पनि टिमबाट बाहिर हुनुपर्‍यो ।

कप्तान किरणले लेखेका थिए, ‘राष्ट्रिय टोलीको प्रशिक्षणमा खेलाडीप्रति प्रशिक्षकबाट गरिएको व्यवहारप्रति मेरो असन्तुष्टि छ । राष्ट्रिय टोलीको क्याम्पमा जायज विषय उठाउँदा खेलाडीलाई क्याम्प नै छोड्न लगाउनु पक्कै सही होइन । टोलीको कप्तान र एक सदस्यको हिसाबले म सधैँ खेलाडीको पक्षमा छु ।’

यस्तो विवाद भइरहँदा नयाँ खेलाडी लिएर प्रशिक्षक अल्मुताइरी कुवेत उडे । तर, १० खेलाडी भने मैदान बाहिर नै रहिरहे । चौतर्फी विरोधपछि एन्फाले भिक्टर राणाको संयोजकत्वमा छानबिन समिति बनाएको थियो । समितिले बुझाएको प्रतिवेदनमा अल्मुताइरीको विकल्प खोज्न सुझाव दिएको थियो । यसको अर्थ अल्मुताइरीलाई हटाएर अर्को प्रशिक्षक ल्याउनु ।

प्रतिवेदनमा अल्मुताइरीले एन्फा सचिवालयसँग समन्वयन नगरी एकलौटी र स्वेच्छाचारी ढंगले काम गरेको, खेलाडीको छनोट र प्रशिक्षणबाहेक अन्य कार्यमा समेत हस्तक्षेप गरेको निष्कर्ष समितिको थियो । खेलाडीले क्याम्प छोडेर गएको भन्दा पनि प्रशिक्षकले नौ जना खेलाडीलाई बारम्बार अमर्यादित भाषामा निस्केर जानू भनेपछि बाध्य भएर खेलाडी निस्किएको प्रतिवेदनमा उल्लेख छ ।

अल्मुताइरी फन्डा

एएफसी एसियन कप छनोटपछि अल्मुताइरी तीनमहिने लामो बिदामा छन् । उनी नेपाल आएका छैनन् । एकदमै रिसाहा प्रशिक्षक मानिन्छन् अल्मुताइरी । कुवेती नागरिक अल्मुताइरी प्रो लाइसेन्स भएका प्रशिक्षक हुन् । उनले नेपाली टिमबाट यस्तो घटनाहरू घटाएका छन्, जसले देश लज्जित हुनुपरेको छ । एसियन कप छनोटमा उनले नियमविपरीत गतिविधि गरेको कारणले एसियन फुटबल महासंघ (एएफसी) ले नेपाललाई ७ हजार अमेरिकी डलर जरिवाना गर्‍यो ।

कुवेत र जोर्डनविरुद्धका दुवै खेलमा नेपालका मुख्य प्रशिक्षक अल्मुताइरीले पहेँलो कार्ड खाँदै निलम्बनमा परेका थिए । निलम्बनमा परेका अल्मुताइरी प्रशिक्षकको रूपमा मैदानमा प्रवेश गर्न नपाउने भए । अन्तिम खेल इन्डोनेसियासँग थियो । तर, उनी खेलअघि ड्रेसिङ रुममा प्रवेश गरे भने एक्रिडिटेसन कार्ड लिएर मैदानमै छिरे । यति मात्रै होइन, उनकै कारण पहिलो हाफ केही मिनेट ढिलो सुरु भएको थियो । आचारसंहिता उल्लंघन गरेको भन्दै उनकै कारण एन्फा कारबाहीमा परेको हो ।

एसियन कप छनोटको पहिलो खेलमा जोर्डनसँग २–० ले हारेको नेपाल दोस्रो खेलमा कुवेतसँग ४–१ ले हारेको थियो । अन्तिम खेलमा भने इन्डोनेसियासँग ७–० ले हार्न पुग्यो । सरसर्ती हेर्ने हो भने खेलाडी विवादका कारणले नतिजामा धेरै असर परेको देखिन्छ ।

नेपाली टिम सम्हालेदेखि नै अल्मुताइरी अटेरी खालका थिए । मैत्रीपूर्ण खेलहरूमा पनि उनको हाउभाउ अलिक नसुहाउने हुन्थ्यो । नेपालमै भएको मौरिसियसविरुद्धको मैत्रीपूर्ण खेलमा पनि उनको गतविधि दर्शकलाई उत्तेजित बनाउने खालको थियो ।

प्रशिक्षक एक, विवाद अनेक

उनी निहुँ निकाल्न निकै सिपालु छन् । आफ्नो निर्णयमा उनी कहिल्यै अडिग हुँदैनन् । मौखिक राजीनामा मात्रै तीनपटक दिए । तर, अहिले पनि उनी नै हुन् नेपालको मुख्य प्रशिक्षक ।

कतारमा रहँदा बन्द प्रशिक्षणका क्रममा नेपालले ओमानसँग मैत्रीपूर्ण खेल खेलेको थियो । जुन खेलमा नेपाल २–० ले हार्न पुग्यो । नतिजा बाहिर आयो र आफूले भनेजति खेलाडी लैजान नपाएको भन्दै अल्मुताइरीले एन्फालाई धम्कीपूर्ण मेल पठाए ।

खेलाडीलाई आफूले भनेअनुसार गर्न लगाउँथे उनी । बाहिर नआए पनि उनले खेलाडीले मिडियासामु के बोल्ने, नबोल्ने तय गर्थे । खेलाडीको ड्रेसअप, हेयर स्टाइलदेखि हरेक कुरामा नियन्त्रण गर्थे ।

नयाँ खेलाडीलाई ‘मेरोबारे राम्रो भनिदे, तँलाई टिममा डेब्यु गराउँछु’ सम्म भनेको बाहिर आएको छ । खेलाडीले पनि यो विषयमा बोलेका छैनन, यद्यपि, उनकै कार्यकालमा धेरै खेलाडीले डेब्यु गरेका छन् । एउटा खेलमा डेब्यु गरेका खेलाडी अर्को प्रतियोगिता आउँदा प्रारम्भिक छनोटमै नपरेका पनि छन् । यसले गर्दा खेलाडी छनोटमा उनीमाथि प्रश्न उठाउने ठाउँ प्रशस्तै छ ।

उनको व्यवहार मात्रै होइन, कार्यशैलीमा पनि प्रश्न उठ्ने गरेको छ । जस्तो, संकटा क्लबका प्रशिक्षक विष्णु गुरुङलाई सहायक प्रशिक्षकको रूपमा उनले ल्याए । गुरुङ धेरै राम्रो प्रशिक्षक भन्दै उनले तारिफ गरेका थिए । तर, एक सातापछि नै उनले सहायक प्रशिक्षक विष्णु गुरुङलाई हटाए । यही निर्णयले पनि प्रस्ट पार्छ– अल्मुताइरी आफ्नै निर्णयमा स्थिर छैनन् । अपरिपक्व छन् ।

प्रकाशित मिति: बिहीबार, भदौ १६, २०७९ १९:२६