ठेकेदारले ढुवानी नगर्दा मुगुमा चामलको अभाव, सर्वसाधारण महँगोमा किन्न बाध्य

ठेकेदारले ढुवानी नगर्दा मुगुमा चामलको अभाव, सर्वसाधारण महँगोमा किन्न बाध्य

A+ A A-

हिमाली जिल्ला मुगुमा खाद्य गोदाम खाली भएपछि खाद्य व्यवस्था तथा व्यापार कम्पनी लिमिटेड शाखा कार्यालयले चामलको दैनिक बिक्रीवितरण बन्द गरेको छ ।

ठेकेदारले समयमै ढुवानी नगर्दा मौज्दातमा भएको चामल सकिएपछि भदौ ५ गतेदेखि चामल बिक्रीवितरण बन्द गरिएको हो । जिल्ला शाखाको खाद्य गोदाममा ६ सय ३२ क्विन्टल मात्रै चामल मौज्दात रहेकाले तत्काल जिल्ला खाद्य सुरक्षाको बैठक बसी नयाँ चामल ढुवानी नहुञ्जेलसम्मका लागि चामल बिक्रीवितरण बन्द गरिएको जिल्ला खाद्य व्यवस्था तथा व्यापार कम्पनी लिमिटेड शाखा कार्यालय मुगुका प्रमुख भुष्कर भामले जानकारी दिए ।

मौज्दातमा रहेको चामल जिल्लामा भैपरी आउने आकस्मिक कामका लागि, दैवी प्रकोप, सुत्केरी र क्रियामा बसेकाहरूका लागि मात्रै उपलब्ध गराइने उनको भनाइ छ ।

यो आर्थिक वर्षका लागि चामल ढुवानीको ठेक्का आह्वान भइसकेको र केन्द्रीय कार्यालयमा मूल्यांकन सुरु गरिएको भन्दै सम्भवतः यो महिनाभित्रै चामल आइपुग्ने उनले बताए । नयाँ चामल आइपुगेपछि मात्रै यस शाखाबाट बिक्रीवितरण सुरु गरिने उनले जनाए ।

आर्थिक वर्ष २०७८/०८९ मा खाद्यान्न ढुवानीको जिम्मा पाएको खड्का निर्माण सेवा जुम्लाले ९ हजार क्विन्टलमध्ये ६ हजार २ सय क्विन्टल मात्रै ढुवानी गरेको र बाँकी २ हजार ८ सय क्विन्टल तेलको मूल्यवृद्धि भएको कारण देखाई ढुवानी नगरेको खाद्य शाखाले जनाएको छ ।

उता खड्का निर्माण सेवाकी सञ्चालक रामदेवी खड्कालाई सम्पर्क गर्दा पेट्रोलियम पदार्थको मूल्यवृद्धि हुँदा ढुवानी भाडा बढ्न गएकाले महँगोमा ढुवानी गर्न नसकिएको बताइन् । आफूले सम्झौता गर्दा बीचमा पेट्रोलियम पदार्थको मूल्यवृद्धि भएमा १५ प्रतिशत ढुवानी भाडा बढाउने सम्झौता गरिए पनि खाद्य व्यवस्था लिमिटेडले उक्त कुराको कार्यान्वयन नगरेकाले आफूले बाँकी चामल ढुवानी नगरेको उनले बताइन् ।

तेलको मूल्यवृद्धि भई सम्झौताअनुसारभन्दा ढुवानीको मूल्य बढ्न गएकाले आफूले थप चामल ढुवानी गर्न नसकेको भन्दै उनले सबै दोष खाद्य व्यवस्था कम्पनीलाई लगाइन् । ढुवानीको ठेक्का पाएको कम्पनीकी सञ्चालक जुम्लाको चन्दननाथ नगरपालिकाकी उपमेयरसमेत हुन् ।

गत आर्थिक वर्षमा मुगुका लागि ११ हजार क्विन्टल चामल कोटा स्वीकृत भएको थियो । उक्त चामलमध्ये ९ हजार क्विन्टल चामल ढुवानीको जिम्मा खड्का निर्माण सेवाले पाएको थियो । २ हजार क्विन्टल चामल ढुवानीको जिम्मा बराल ढुवानी सेवाले पाएको थियो ।

बराल ढुवानी सेवाले आफ्नो जिम्माको सबै चामल ढुवानी गरेको खाद्य शाखा प्रमुख भामको भनाइ छ । खड्का निर्माण सेवाको जिम्मामा रहेको ९ हजार क्विन्टलमा ६ हजार २ सय क्विन्टल चामल मात्र ढुवानी गरिएको उनले बताए । ढुवानी गर्न बाँकी २ हजार ८ सय क्विन्टल चामल फ्रिज गएको उनले बताए ।

गोदाममा चामल सकिएसँगै खाद्य शाखाले बिक्रीवितरणसमेत बन्द गरेपछि यहाँका स्थानीय नागरिकलाई सास्ती भएको छ । जिल्ला सदरमुकाम गमगढी बजारका पसलहरूमा चामल पाइने भए पनि २५ किलोको प्याकमा २ सयदेखि ४ सय रुपैयाँ सस्तो पाइने भएपछि सर्वसाधारण खाद्य व्यवस्था तथा व्यापार कम्पनी लिमिटेडमै पुग्ने गरेका थिए ।

खाद्य शाखामा खाद्यान्न बिक्रीवितरण बन्द भएपछि बजारमा महँगो मूल्यमा चामल किन्नुपर्ने बाध्यता भएको छायाँनाथ रारा नगरपालिका– ५ की मायादेवी सुनारले दुखेसो सुनाइन् । उनी मात्रै होइन, मुगुका अन्य सर्वसाधारण बजारको महँगो चामल किनेर खान बाध्य छन् ।

जिल्लामा फागुन, चैत, साउन, भदौ, असोज महिनामा बालीनाली नपाकेको समय हुँदा भोकमरीको समस्या हुने गरेको स्थानीय बताउँछन् । यो समयमा खाद्यमा चामल सकिनु यहाँका जनताका लागि दु:खद भएको स्थानीय धर्मसिंह कामीले दु:खेसो गरे ।

डिपो कार्यालय र बिक्री केन्द्र पनि रित्तै

जिल्लामा सदरमुकामबाहिर रहेका सोरुकोट खाद्य डिपो, श्रीकोट डिपो, पुलु डिपो, रातापानी बिक्री केन्द्र र कालै बिक्री केन्द्र गरी पाँचवटा डिपो तथा बिक्री केन्द्र विगत ४–५ महिनादेखि रित्तै छन् । डिपो तथा केन्द्रहरूमा कोटाअनुसारको खाद्यान्न ढुवानी नभएको जनाइएको छ ।

डिपोबाट वितरण भइरहेको चामल सकिएर शाखा कार्यालयसमेत रित्तै भएकाले बिक्री वितरण बन्द गर्नुपरेको खाद्य शाखा कार्यालयका प्रमुख भामले बताए ।

प्रकाशित मिति: बिहीबार, भदौ १६, २०७९ १८:१६