सूदुरपश्चिममा एसका दुई सांसद एमाले फर्किए, फेरियाे संसदीय अंकगणित

A+ A A-

पूर्व मन्त्रीसहित नेकपा (एकीकृत समाजवादी) सुदूरपश्चिमका नेताहरू नेकपा एमालेमा प्रवेश गरेका छन् । सुदूरपश्चिम प्रदेशमा मन्त्रीबाट हटाइएका भौतिक पूर्वाधार राज्यमन्त्री कुलवीर चौधरीसहितका नेताहरू नेकपा एमालेमा प्रवेश गरेका हुन् । चुनावकाे मुखमा नेकपा एसबाट नेताहरू एमाले फर्किएसँगै सुदूरपश्चिममा कमजाेर देखिएकाे एमालेले शक्ति आर्जन गरेकाे छ ।

सुदूरपश्चिम प्रदेशका पूर्वअर्थमन्त्री तारा लामा तामाङ, समाजवादीका प्रदेश अध्यक्ष बिक्रम शाही, कञ्चनपुर वेदकोट नगरपालिकाका पूर्वमेयर अशोक चन्दलगायतका नेताहरू बुधबार एमाले प्रवेश गरेका छन् । बुधबार कञ्चनपुर पुगेका नेकपा एमालेका पार्टी अध्यक्ष प्रधानमन्त्री केपी शर्मा ओलीले उनीहरूलाई पार्टीमा स्वागत गरेका छन् । योसँगै सुदूरपश्चिम प्रदेशमा एकीकृत समाजवादी पार्टीलाई झट्का लागेको छ।

यस्तै माओवादी केन्द्रबाट शंकरदत्त जोशी, मोहन गिरिलगायतका नेताहरू एमाले प्रवेश गरेका छन् । योसँगै अन्य विभिन्न पार्टी सयौँ कार्यकर्ताहरू एमाले प्रवेश गरेका छन् ।

सुदूरपश्चिममा पहिलो दल बन्यो माओवादी
एमाले विभाजन भएर नेकपा (एस) गठन भएपछि दल रोज्ने क्रममा सुदूरपश्चिम प्रदेशसभामा नेकपा (एस) १४ सदस्यसहित सबैभन्दा ठूलो दल बनेको थियो । तर, अब प्रदेशसभामा सो पार्टीका १२ सदस्य मात्रै बाँकी रहेका छन् ।

प्रदेशसभामा अब नेकपा माओवादी केन्द्र १३ सदस्यसहित सबैभन्दा ठूलो दल बनेको छ । यस्तै कांग्रेस ११ र एमालेमा १० जना प्रदेश सदस्य रहेका छन् । यस्तै जसपा र लोसपाका एक/एक जना प्रदेश सदस्य रहेका छन् । नेकपा एसका २ जना एमालेतर्फ लागेपछि सुदूरपश्चिम प्रदेश सरकारमा माओवादी केन्द्र पहिलो पटक ठूलो दल बनेको हो ।

हाल प्रदेशसभामा ठूलो दल रहेको एकीकृत समाजवादीका दुई प्रदेशसभा सदस्य (तारा लामा तामाङ र कुलवीर चौधरी) एमाले प्रवेश गरेसँगै उनीहरू निलम्बनमा पर्ने छन् ।

१४ प्रदेशसभा सदस्यसहित ठूलो पार्टी बनेको नेकपा एसका २ सदस्य निलम्बनमा परेमा अब एससँग १२ प्रदेश सभा सदस्य मात्रै हुने छन् । २०७४ मा सम्पन्न प्रदेश निर्वाचनमा १४ सांसद जितेको माओवादीबाट एकजना (झपट बोहरा) एमालेमा गएसँगै माओवादीसँग १३ जना मात्रै थिए ।

२०७४ को निर्वाचनपछि २४ प्रदेशसभा सदस्यसहित ठूलो दल बनेको एमाले विभाजित हुँदा १४ प्रदेशसभा सदस्यसहित नेकपा एस प्रदेशसभाको ठूलो दल बनेको थियो ।

५३ प्रदेश सदस्य रहेको प्रदेशसभामा थप दुईजना निलम्बन हुँदा ४७ सदस्य रहने छन् । ५३ मध्ये एकजना सभामुख र एकजना उपसभामुख रहेका छन् । हाल नेपाली कांग्रेसबाट डडेल्धुराका कर्ण मल्ल, माओवादीबाट अछामका झपट बोहरा निलम्बनमा परेका छन् ।

प्रकाशित मिति: बुधबार, भदौ १५, २०७९ १७:५१