हेटौँडामा कानुनविपरीत सटर बनाउने विद्यालयका अध्यक्ष नै अवैध संरचना हटाउने कार्यदलका संयोजक !

हेटौँडामा कानुनविपरीत सटर बनाउने विद्यालयका अध्यक्ष नै अवैध संरचना हटाउने कार्यदलका संयोजक !

A+ A A-

व्यापारिक दृष्टिकोणले हेटौँडाको मुटु मानिने पारिजातपथ र भैरव रोडतर्फ अवैध रूपमा सटर निर्माण गर्ने विद्यालयका अध्यक्षलाई उपमहानगरपालिकाले अवैध संरचना हटाउने कार्यदलकै संयोजक बनाएको छ ।

हेटौँडा उपमहानगरपालिकाको बुधबार बसेको कार्यपालिका बैठलले १० नम्बरका वडाध्यक्ष फुर्वा दोर्जे लामालाई अवैध संरचना हटाउने कार्यदलको संयोजक बनाउने निर्णय गरेको हो । उनी हेटौँडा–४, स्थित जिल्लाकै पुरानो भुटनदेवि माध्यमिक विद्यालय व्यवस्थापन समितिका अध्यक्षसमेत हुन् ।

अवैध संरचना हटाउने कार्यमा सामूहिक सहमति खोज्न मेयर मिनाकुमारी लामाले एमालेबाट निर्वाचित वडाध्यक्ष लामालाई उक्त जिम्मेवारी दिएकी हुन् ।

कार्यपालिकामा अल्पमतमा रहेकी मेयर लामालाई सबैको सामूहिक सहमतिमा काम गर्नुपर्ने बाध्यता छ । जसका कारण २०६० सालदेखि कानुनविपरीत नक्सा पास नै नगरी निर्माण गरिएको व्यावसायिक सटरबाट भाडा उठाउँदै आएको भुटनदेवि माविका अध्यक्षसमेत रहेका वडाध्यक्ष लामालाई कार्यदलको संयोजक बनाइएको हो ।

हेटौँडामा सरकारी विद्यालयकै कानुनविपरीत व्यवसायिक सटर, उपमहानगरले चलाउला डोजर ?

हेटौँडामा खुला मैदानलाई मासेर भुटनदेवि स्कुलले वर्षौंदेखि अवैध रूपमा निर्माण गरेको सटर भत्काउनुपर्ने दबाब मेयर लामामाथि छ । तर, वडाध्यक्ष लामालाई नै कार्यदलको जिम्मेवारी सुम्पिएपछि कानुनविपरीत निर्माण भएका संरचना भत्किनेमा नगरवासीले आशंका व्यक्त गरेका छन् ।

अव्यवस्थित संरचना व्यवस्थापन कार्यदलले नगरका १९ वटै वडामा कानुनविपरीत बनेका संरचनाहरूको मूल्यांकन र अनुगमन गर्ने जनाइएको छ । बैठकले ३५ दिने सूचना जारी गरी काम अघि बढाउने निर्णय गरेको मेयर लामाका प्रेस संयोजक राजन दहालले जानकारी दिए ।

भुटनदेवी माध्यमिक विद्यालय ।

कार्यदलले बजार क्षेत्रका अव्यवस्थित र अतिक्रमण गरी निर्माण भएका संरचनाको अवस्था र लगत संकलन गरी कार्यान्वयनका लागि प्रतिवेदन तयार पार्ने जनाइएको छ । नगरक्षेत्रमा नक्सा पास नभई बनेका साना ठूला टहराहरू स्वःस्फुर्त हटाउन ३५ दिने सूचना प्रकाशन गरेसँगै कार्यदलको काम सुरु हुने बताइएको छ ।

कार्यपालिकाबाट उपमहानगरपालिका क्षेत्रमा पर्ने राजमार्गभन्दा बाहेकका स्थान मात्रै अतिक्रमण गरी बनाइएका संरचना हटाउने ‘भद्र सहमति’ गरेको एक वडाध्यक्षले शिलापत्रलाई जानकारी दिए ।

विशेषतः हेटौँडाको राजमार्ग क्षेत्र साँघुरो भएर ट्राफिक व्यवस्थानमा कठिनाई हुनुका साथै सडक दुर्घटना पनि निम्त्याइरहेको छ । तर, राजमार्ग क्षेत्रका व्यापारीहरूलाई छुट दिने अभिप्रायले उपमहानगरले भित्री क्षेत्रमा मात्रै अवैध संरचना हटाउने गरी काम गर्ने तयारी गरेको छ । उपमहानगरले राजमार्ग क्षेत्र आफ्नो कार्यक्षेत्रभित्र नपरेको भन्दै पन्छिन खोजेको छ ।

यसैगरी उपमहानगरले फोहोरमैला व्यवस्थापन कार्यदल पनि गठन गरेको छ । देशकै सफा सहरका रूपमा यसअघि पुरस्कृत भएको हेटौँडालाई पुरानै स्थितिमा राख्न फोहोरमैला व्यवस्थापनलाई जोड दिने नीति उपमहानगरले लिएको हो ।

उपमेयर राजेश बानियाँको संयोजकत्वमा फोहोरमैला व्यवस्थापन कार्यदल गठन भएको छ । कार्यदलले नगर क्षेत्रबाट निस्किएका फोहोरलाई एकै ठाउँ डम्पिङ गर्ने भन्दा पनि फरक-फरक ठाउँहरूमा फोहर व्यवस्थापनका लागि सम्भाव्यता अध्ययन गर्ने तयारी गरिएको हो ।

प्रकाशित मिति: बुधबार, भदौ १५, २०७९ १४:४६