रवीन्द्र मिश्रको राप्रपा प्रवेशमा बुद्धिमान बाधक

A+ A A-

विवेकशील साझाको नेतृत्व छाडेर संवैधानिक राजतन्त्रको वकालत गरिरहेका रवीन्द्र मिश्र राप्रपा प्रवेश गर्ने र एमालेको सहयोग लिएर निर्वाचन जित्ने रणनीतिमा छन् । राप्रपामा प्रवेश गर्न उनले सहअध्यक्ष दाबी गरे पनि सहमति हुन सकेको छैन ।

स्रोतका अनुसार राप्रपामा मिश्रले राजेन्द्र लिङ्देन पछिको हैसियतमा आफू आउन तयार रहेको बताएका छन् । तर, यसबारेमा राप्रपामा निर्णय भइनसकेको एक पदाधिकारीले शिलापत्रलाई बताए । स्थानीय तह निर्वाचमा राप्रपासँग तालमेलका लागि छलफल गरेका मिश्र पार्टीमा विरोध भएपछि ब्याक भएका थिए ।

स्थानीय तहमा एक पालिका अध्यक्षसहित ११ जनप्रतिनिधिमा सीमित भएपछि राम्रो नतिजा दिन नसकेको भन्दै जेठ ११ मा नैतिकताका आधारमा उनले पार्टी सदस्यमात्र रहेन गरी राजीनामा गरे । सामाजिक सञ्जालमा राजीनामा दिएका उनले लामो समयसम्म औपचारिक रूपमा पार्टीमा जानकारी गराएनन् । पछि मेल लेखेर बसे । एकल नेतृत्वमा रहेको पार्टीले अर्को नेतृत्व चयन नगरेपछि उनले आफ्नै नेतृत्वमा निर्वाचन आयोगमा जान समेत अनुरोध गरे ।

विवेकशील साझाभित्रै खेल्दै मिश्र

मिश्रले विवेकशील साझाभित्र पनि आफ्नो पक्षमा कार्यकर्ता तान्ने प्रयास गरिरहेका छन् । उनी राप्रपामा प्रवेश गर्दा आफू र तत्कालीन प्रवक्ता शरदराज पाठकमात्र होइन, कार्यकर्ता पंक्ति पनि लिएर जान चाहन्छन् । जसले गर्दा उनलाई नयाँ पार्टीमा सहज हुनेछ । राजीनामा डेढ महिनामा पनि स्वीकृत नहुने र निर्वाचन आयोगमा दल दर्ताको समय नजिकिँदै जाँदा उनले पार्टीको वैधानिक अध्यक्ष आफैँ रहेको र नयाँ नेतृत्व दिन नसक्ने हो भने आफ्नो विकल्प नरहेको भन्दै पार्टी सदस्यहरूलाई मेल लेखेका थिए । पछि विवेकशील साझाको बैठकले मिश्रको राजीनामा स्वीकृत गर्दै अध्यक्षमा समीक्षा बाँस्कोटालाई चयन गरेको थियो । नयाँ पार्टीमा जाँदा समूह नै लिएर जाने विषयमा मिश्र पहिलेदेखि नै छलफलमा रहेको विवेकशील साझाका एक नेताले बताए ।

राप्रपा इन्ट्रीमा बुद्धिमान बाधक

स्रोतका अनुसार राप्रपा पदाधिकारीहरूको अनौपचारिक बैठकले मिश्रलाई पार्टीमा स्वागत गर्ने निर्णय गरिसकेको छ । विवेकशील साझाबाट आउँदा मिश्रलाई सहअध्यक्ष र शरद पाठकलाई महामन्त्रीसहित केही पदाधिकारी दिने सहमति पनि भएको थियो । तर, उपाध्यक्षहरू बुद्धिमान तामाङ र विक्रम पाण्डेबीच को सिनियर भन्ने विवाद रहिरहँदा मिश्रको प्रवेशलाई तामाङले रुचाएनन् । उनी अध्यक्ष लिङ्देनपछिको वरीयतामा आफ्नो दाबी गर्छन् । पपुलर मतका आधारमा निर्वाचित भएकाले पाण्डेले आफूलाई सिनियर भन्न रुचाउँछन् ।

पार्टीमा आफूभन्दा लामो समयदेखि सक्रिय रहेकाले उपाध्यक्ष तामाङको कुरा काट्न सक्दैनन् अध्यक्ष लिङ्देन । तामाङ बाधक भएपछि लिङ्देनले उनैलाई मिश्रसँग डिल गर्ने जिम्मा दिए । वार्ता गरेर निष्कर्षमा पुग्नुपर्ने जिम्मा पाएका तामाङले अनिच्छा देखाएपछि मिश्रसँग संवाद अघि बढ्न सकेको छैन । ‘राप्रपा र विवेकशीलबीच एकता गर्नुपर्छ भन्ने सेन्टिमेन्ट भए पनि कतिपय व्यक्तिले एकता भएको खण्डमा म पछाडि पर्छु भनेर एकताको वार्ता गर्नै नरुचाएको हाम्रो बुझाइ छ,’ मिश्रनिकट एक नेताले शिलापत्रसँग भने ।

काठमाडौं क्षेत्र नम्बर १ मा एमालेको साथ खोजिरहेका मिश्रले आइतबार पहिलो पटक बालकोट छिरेर एमाले अध्यक्ष केपी शर्मा ओलीसँग १५० मिनेट वान टू वान वार्ता गरे । मिश्रले आगामी निर्वाचनमा एमाले र विवेकशीलबीच तालमेलको अनौपचारिक प्रस्ताव राखे । गठबन्धनका कारण देशको दलीय प्रणालीमै आघात परिरहेको भन्दै ओलीले आगामी चुनावमा आफ्नो पार्टी स्थानीयस्तरमा तालमेलका लागि खुला रहेको सकारात्मक संकेत गरे । मिश्रको बालकोट प्रवेश राप्रपासँगको मौनतापछिको थियो ।

‘ठूला भनिएका दलहरूले तालमेल र गठबन्धन भनिरहँदा हामीले विचार मिल्नेसँग छलफल नगर्ने भन्ने कुरै हुन्न,’ राप्रपाका प्रवक्ता मोहन श्रेष्ठले शिलापत्रसँग भने, ‘छलफल भए पनि निष्कर्षमा पुगिएको छैन ।’

प्रकाशित मिति: बुधबार, भदौ १५, २०७९ १४:४७