जसलाई कांग्रेसले पार्टीबाट निकाल्याे उसकै दैलाेमा नेताहरूकाे जमघट

A+ A A-

नेपाली कांग्रेसबाट साधारण सदस्यसमेत नरहने गरी कारबाहीमा परेका पूर्वराज्यमन्त्री पुष्करनाथ ओझाले आफूलाई भेट्न पुगेका पार्टीका नेताहरूलाई कैलाली–५ बाट प्रतिनिधिसभाकाे निर्वाचन लड्ने इच्छा सुनाएका छन् । बुधबार कांग्रेसका नेताहरू ओझालाई भेट्न धनगढीस्थित उनकाे निवासमै पुगेका थिए ।

भेटका क्रममा ओझाले कांग्रेस आफ्नाे घर रहेकाेले कांग्रेसबाटै चुनाव लड्ने इच्छा प्रकट गरेका हुन् । कांग्रेसले टिकट नदिए स्वतन्त्र उम्मेदवारी दिने तयारी उनले गरिरहेकाे चर्चा छ । ‘कांग्रेस मेरो घर हो । म कांग्रेसबाटै चुनाव लड्छु । यदि पार्टी सभापति तथा प्रधानमन्त्री शेरबहादुर देउवा सकारात्मक देखिनुभयाे भने कांग्रेसबाटै चुनाव लड्ने तयारी छ,’ उनले आफूलाई भेट्न पुगेका केन्द्रीय सदस्य नृपबहादुर वड, जिल्ला सभापति नारायणदत्त भट्टसहितकाे टाेलीलाई भनेका छन् ।

२०७० सालमा भएकाे उपनिर्वाचनमा विजयी भएका ओझालाई कांग्रेसले २०७४ सालकाे चुनावमा टिकट दिएकाे थिएन । आफूले पाउनुपर्ने टिकट कांग्रेस नेतृ आरजु राणालाई दिइएकाे भन्दै रुष्ट बनेका ओझालाई अन्तर्घातकाे आराेपमा कांग्रेसले साधारण सदस्यसमेत नरहने गरी कारबाही गरेकाे थियाे । त्याे चुनावमा आरजु एमालेका नारदमुनि रानासँग भारी मतान्तरले पराजित भएकी थिइन् ।

त्यसपछि हालै भएकाे स्थानीय तहकाे चुनावमा पनि धनगढी उपमहानगरपालिकाकाे मेयरमा स्वतन्त्र उम्मेदवार गाेपाल हमाललाई सघाएकाे आराेप ओझामाथि लगाइएकाे छ । स्थानीय तहकाे चुनावमा कांग्रेसबाट उठेका नृप वडलाई हराउँदै हमाल विजयी भएका थिए ।

त्यतिबेला वडकाे चुनावी प्रचारका लागि धनगढी पुगेका प्रधानमन्त्री देउवासँग ओझाले भेट्न नमानेकाे चर्चा कांग्रेसीहरूबीच छ । अहिले भने ओझाले आफू जुनसुकै बेला पनि देउवासँग भेटघाटका लागि तयार रहेकाे बताएका छन् ।

ओझालाई फकाउन केन्द्रीय सदस्य तथा धनगढीका निवर्तमान मेयर वड, जिल्ला सभापति भट्टसहित सामाजिक विकास राज्यमन्त्री टेकबहादुर रैका, कांग्रेस सुदूरपश्चिम प्रदेशका कोषाअध्यक्ष उत्तम कठायत, जिल्ला सचिव नृप सुनारलगायत नेताहरू निवासमै पुगेका थिए । कैलाली–५ बाट यसपटक पनि प्रधानमन्त्री पत्नी आरजुले चुनाव लड्न खाेजेकी छन् । तर उनका लागि सिट खाली गर्न नसकिने अडान ओझाकाे छ । कांग्रेसले कारबाही गरेका ओझाकाे प्रभाव जनस्तरमा बलियाे छ ।

प्रकाशित मिति: बुधबार, भदौ १५, २०७९ १३:०८