केन्यासँगको सिरिज जिते पनि पाँच खेलमा जम्मा एक अर्धशतक बनाउनुले के देखाउँछ ?

केन्यासँगको सिरिज जिते पनि पाँच खेलमा जम्मा एक अर्धशतक बनाउनुले के देखाउँछ ?

A+ A A-

अन्तिम खेलमा केन्यालाई ३१ रनले हराउँदै नेपालले टी–२० क्रिकेट सिरिज जित्यो । तर, सिरिज जित्यो भन्दै धेरै खुसी हुनु पर्ने ठाउँ रहेन । आफूभन्दा कमजोर मानिएको केन्यासँग नेपालको प्रदर्शन उतारचढाव नै रह्यो ।

केन्या नेपालभन्दा कमजोर टिम हो । टी–२० क्रिकेटमा खेल कसको पोल्टामा जान्छ त्यो यकिन हुन्न । नेपालले केन्यासँगको पाँच खेलको टी–२० अन्तर्राष्ट्रिय क्रिकेट सिरिज जितेको छ । ३–२ ले सिरिज जिते पनि यो शृंखलामा वाह ! भन्ने खालको नेपालको प्रदर्शन भएन । ज्ञानेन्द्र मल्लको ५९ रन र कप्तान सन्दीपको एकै खेलमा पाँच विकेटलाई बिर्सिने हो भने खेलाडीको प्रदर्शनमा चित्त बुझाउने ठाउँ छैन ।

पहिलो खेलमा पाँच विकेटको जित निकालेको नेपालले दोस्रो खेलमा १८ रनको हार ब्यहोरेको थियो । तेस्रो खेलमा चार विकेटको जित निकालेको नेपाल चौथो खेलमा केन्यासँग सात रनले हारेको थियो ।

अस्थिर ब्याटिङ, पाँच खेलमा जम्मा एक अर्धशतक

केन्यासँगको टी–२० क्रिकेट सिरिजमा नेपालको ब्याटिङ अस्थिर रह्यो । यसले के प्रष्ट पार्छ भने नेपाली ब्याटरमा आत्मविश्वासको अझै अभाव छ ।

नेपालले केन्यासँग खेलको पाँच खेलमा जम्मा एउटा अर्धशतक बनायो । ज्ञानेन्द्र मल्लले पाँचौँ खेलमा केन्याविरुद्ध ५९ रन बनाए । केन्याविरुद्धको सिरिजमा यो नै एक मात्र अर्धशतक हो । केन्यासँग पनि खुलेर ब्याटिङ गर्न नसक्नु नेपाली ब्याटरको समस्या हो ।

पहिलो खेलमा १३१ रनको लक्ष्य नेपालले पाँच विकेटको क्षतिमा भेट्टायो । तेस्रो खेलमा पनि १५७ रनको लक्ष्य नेपालले ६ विकेटको क्षतिमा भेट्टाएको थियो । पाँचौँ खेलमा नेपालले सात विकेटको क्षतिमा १७५ रन बनाएको छ ।

यो तीन खेललाई हेर्ने हो भने नेपाली खेलाडीको ब्याटिङ राम्रै छ । तर, दोस्रो र चौथो खेललाई हेर्ने हो भने नेपाली ब्याटरको आलोचना गर्ने ठाउँ धेरै छ । दोस्रो खेलमा १३३ र चौथो खेलमा १०२ रनको सामान्य लक्ष्य नेपालले पाएको थियो । तर, यो लक्ष्य पनि भेट्टाउन नसक्दा नेपालले मुस्किलले ३-२ ले सिरिज आफ्नो पोल्टामा पारेको हो ।

सामान्य लक्ष्य पाउँदा पनि नेपालले किन जित्न सकेन ? नेपाली ब्याटरलाई तेर्सिने मुख्य प्रश्न हो यो । दोस्रो खेलमा ११४ र चौथो खेलमा ९४ रनमा अलआउट हुनुले नेपाली ब्याटिङमा अझै समस्या नै छ भन्ने प्रस्ट देखाउँछ ।

केन्यासँगको पहिलो हारमा नेपालका चार ब्याटरले मात्रै दोहोरो अंक बनाएका थिए । आरिफ शेखले २५, आदिल आलम र रोहित कुमार पौडेलले समान २०–२० रन बनाउँदा पवन सर्राफले १९ रन बनाए । आशिफ शेख, ज्ञानेन्द्र मल्ल, दीपेन्द्रसिंह ऐरी, करण केसी, सन्दीप लामिछाने, सोमपाल कामी र बासिर अहमदले दोहोरो अंक पनि छुन सकेनन् । त्यस्तै, दोस्रो हारमा नेपालका रोहित कुमार पौडेलले ४७ रन बनाए पनि अन्य ९ ब्याटरले दोहोरो अंक पनि बनाएनन् ।

नेपाली ब्याटरले राम्रो प्रदर्शन गर्न नसक्दा औषत मानिएका केन्याका बलरले पनि निकै दबाबमा पारे । जसका कारण दुई खेलमा पाएको सामान्य चुनौती भेट्टाउन पनि नेपाल चुकेको हो ।

नेपालले आफ्नो स्तरअनुसार खेलेको भए केन्यासँगको पाँच खेलको सिरिज क्लिन स्वीप गर्नुपर्ने हो । तर यो राम्रो अवसर नेपालले गुमाइसकेको छ ।

बरियता घटे नेपालले विश्वकप खेल्ने अवसर गुमाउँछ ?

पछिल्लो समय नेपाली क्रिकेटको प्रदर्शन सन्तोषजनक छैन । त्यो कुरा अन्तर्राष्ट्रिय क्रिकेट परिषद् (आईसीसी) ले सार्वजनिक गर्ने बरियताले पनि प्रस्ट पार्दै गएको छ । यसरी नै बरियता घट्दै गए नेपालले टी–२० विश्वकप २०२४ गुमाउने छ ।

सन् २०१४ बंगलादेशमा भएको टी–२० विश्वकप क्रिकेट नेपालका लागि निकै महत्त्वपूर्ण थियो । त्यो यादगार पल क्रिकेटका हस्तीहरूले भुलेका छैनन् । खेलाडीको त अविस्मरणीय पल नै त्यही हो । नेपालले पाएको उपलब्धी पनि त्यही थियो । त्यसपछि नेपाल लगातार तीन वटा विश्वकपमा छनोट भएको छैन ।

आउँदो असोज ३० गतेदेखि अस्ट्रेलियामा टी–२० विश्वकप क्रिकेट हुँदैछ । जहाँ १६ टिममध्ये चार राष्ट्र भने एसोसिएट छन् । एसोसिएट राष्ट्रहरूमध्ये नेपाल माथिल्लो स्तरको टिम हो । तर, नामिविया, यूएई, नेदरल्यान्ड्स र स्कटल्यान्डले विश्वकप खेल्दा नेपाल भने मैदान बाहिरको दर्शक मात्रै बन्ने छ ।

किन त ?

२०१४ मा विश्वकप खेल्दाको जस्तो नेपालको टिम छैन । अफगानिस्तानलाई पनि पराजित गरेको त्यो टिम र अहिलेको टिममा धेरै अन्तर छ । खेलाडीको स्तर बढेको छ । खेल्ने प्रतियोगिताहरू पाएका छन् । एक्सपोजरको कमी भएको छैन । तर, टिममा त्यो एकता छैन । अरु देश बलियो हुँदै गए हामी कमजोर हुँदै गयौँ । नेपालले विश्वकप खेल्न नपाउनुको मुख्य कारण नै यही हो ।

यस्तै प्रदर्शन र खराब नतिजा निकाल्दै गए नेपालले टी–२० विश्वकप २०२४ पनि गुमाउने छ । तर, यसबाट जोगिन नेपाल क्रिकेट संघ (क्यान) ले एउटा बृहत् योजना बनाउनु आवश्यक छ ।

सिधै विश्वकप खेल्ने लक्ष्य

नोभेम्बर १४ तारिखसम्म नेपालले जादु नै गर्नुपर्छ २०२४ को विश्वकपमा सिधै छनोट हुनलाई । क्यान तात्यो र खेलाडीलाई नियमित अभ्यासमा राख्दै अन्य टी–२० अन्तर्राष्ट्रिय क्रिकेट सिरिज गरेमा यो सम्भव पनि छ ।

सोमबार आईसीसीले टी–२० बरियता सार्वजनिक गर्‍यो । जहाँ नेपालको स्तर झनै घटेको छ । १४ बाट नेपाल १५औँ स्थानमा झर्दा नामिवियाले पनि उछिनेको छ । यसरी नै बरियता खस्किँदै गए नेपाल विश्वकपमा सिधै छनोट नहुन सक्छ ।

क्यानले आफूभन्दा कमजोर मानिएको केन्यासँग पाँच खेलको टी–२० क्रिकेट सिरिज खेल्न टिमलाई पठाउनुको मुख्य कारण पनि बरियतामा सुधार नै हो । यसबारे क्यानका अध्यक्ष चतुरबहादुर चन्दले पनि प्रस्ट पारिसकेका छन् । उनले टिम केन्या प्रस्थान गर्नुअघि नै भनेका थिए, ‘बरियतामा सुधार गर्दै विश्वकपमा सिधै छनोट हुनको लागि पनि हो केन्या भ्रमण ।’

तर, शतप्रतिशत जित निकाल्ने लक्ष्यसहित गएको नेपालले सिरिज जिते पनि सन्तोष मान्ने ठाउँ छैन । यो नतिजाले विश्व वरियतामा नेपालको खासै सुधार भने हुने छैन ।

नेपाल यसरी पनि छनोट हुन सक्छ विश्वकपमा

२०२४ को टी–२० विश्वकप क्रिकेट अमेरिका र वेष्ट इन्डिजमा संयुक्त रूपमा हुँदैछ । यी दुवै टिम विश्वकपमा आयोजक भएको हैसियतले सिधै छनोट भइसकेका छन् ।

अस्ट्रेलियामा असोज ३० देखि सुरु हुने विश्वकपको प्रदर्शनको आधारमा बरियताको शीर्ष आठ टिमले २०२४ को विश्वकपमा सिधै प्रवेश गर्नेछन् । त्यसपछि शीर्ष आठ राष्ट्रबाहेक कात्तिक २८ गतेसम्म आईसीसीको बरियतामा परेका उत्कृष्ट दुई देशले पनि विश्वकपमा सिधै स्थान बनाउने छन् ।

यसरी आईसीसीले तयार पारेको रोडम्यापमा विश्वकपमा स्थान बनाउने राष्ट्र १२ हुनेछन् । तर, २०२४ को विश्वकपमा भने सहभागी राष्ट्र २० हुने छन् । अब बाँकी रहेको आठ टिमले भने छनोट प्रतियोगिता खेलेर विश्वकपमा स्थान बनाउने छन् ।

जहाँ अफ्रिका, युरोप र एसियाबाट समान २–२ राष्ट्र छनोट हुँदा अमेरिका र इष्ट एसिया प्यासिफिकबाट समान १–१ टिमले विश्वकप खेल्नेछन् । विश्वकपमा सिधै स्थान बनाउन नसके नेपालले विश्वकप छनोट खेल्दै पुग्न पनि सक्छ । २०१४ को टी–२० विश्वकपमा पनि नेपाल छनोट प्रतियोगिता खेल्दै विश्वकप खेलेको थियो ।

प्रकाशित मिति: मंगलबार, भदौ १४, २०७९ २०:४२