चितवन- १ को उम्मेदवार बन्न स्वर्णिम वाग्ले र विश्व पौडेलको प्रतिस्पर्धा, दुवैले दिए आवेदन

चितवन- १ को उम्मेदवार बन्न स्वर्णिम वाग्ले र विश्व पौडेलको प्रतिस्पर्धा, दुवैले दिए आवेदन

A+ A A-

दुई अर्थशास्त्रीले आगामी प्रतिनिधिसभा निर्वाचनमा चितवन १ बाट निर्वाचन लड्न इच्छा देखाएका छन् ।

चितवन कांग्रेसले उम्मेदवार बन्न इच्छुकहरूको आवेदनमा माग गरेको थियो । त्यसमा राष्ट्रिय योजना आयोगका उपाध्यक्षसमेत रहेका डा. विश्‍वनाथ पौडेल र पूर्वउपाध्यक्ष डा. स्वर्णिम वाग्लेलगायत छ जनाले निवेदन दिएको चितवन क्षेत्र नम्बर १ का क्षेत्रीय सभापति किरणभुषण ओलीले शिलापत्रलाई जानकारी दिए ।

अहिले वाग्ले शेखर गगन गुटमा भएको बताइन्छ भने पौडेल देउवा गुटमा छन् । पौडेल चितवन रत्नगरका मतदाता हुन् भने स्थायी घर गोरखा भएका वाग्ले पनि चितवनमा बस्दै आएका छन् ।

यही क्षेत्रबाट त्रिभुवन विश्वविद्यालयका पूर्वउपकुलपति तीर्थराज खनियाँ, नेता राजेन्द्रप्रसाद बुर्लाकोटी र भीमप्रसाद थपलियाले पनि प्रत्यक्षतर्फ उम्मेदवार बन्न आवेदन दिएको ओलीले जानकारी दिए ।

सभापति ओलीका अनुसार सोमबार सूचना जारी गर्दै आज बेलुका ५ बजेसम्म आवेदन माग गरिएको थियो । उम्मेदवार छनोटमा राम्रा मान्छे ल्याउन यसो गरिएको उनको तर्क छ ।

समानुपातिकतर्फ जोखाप्रसाद चौधरी, वासुदेव चौधरी, सावित्रीदेवी चौधरी, टंकप्रसाद उप्रेती, सूर्य अर्याल र मानबहादुर थापा, सुशीलादेवी उप्रेती, सावित्री बोगटी पाठकले निवेदन दिएको ओलीले बताए ।

'हामीले स्वस्थ प्रतिस्पर्धा होस् भनेर निवेदन माग गरेका हौँ,' ओलीले भने, 'तोकिएकै समयमा १५ जनाले निवेदन दिनुभएको छ । यसलाई खुला छलफलबाट सहमति गराउनेछौँ ।' भोलि बिहान ८ बजेदेखि उम्मेदवारहरूबीच छलफल बोलाइएको छ ।

को हुन् वाग्ले र पौडेल ?

स्वर्णिम यसअघि यूएनडीपी एसिया प्यासिफिकको प्रमुख आर्थिक सल्लाहकार थिए । उनी त्यो पदबाट राजीनामा दिएर चुनाव लड्न आएका हुन् ।

सुशील कोइरालाको प्रधानमन्त्रीकालमा उनलाई अमेरिकाबाट बोलाएर योजना आयोगको सदस्यमा नियुक्त गरिएको थियो । तत्कालीन अर्थमन्त्री रामशरण महत र तत्कालीन सचिव रामेश्वर खनालले समेत आग्रह गरेपछि अमेरिकाको जागिर छोडेर नेपाल आई उनले योजना आयोगको सदस्य भएर काम गरेका थिए ।

पुष्पकमल दाहाल प्रचण्डको पालामा उनी दोस्रोपटक योजना आयोगको सदस्य बनेका थिए भने अघिल्लोपटक शेरबहादुर देउवा प्रधानमन्त्री हुँदा वाग्लेले योजना आयोगको उपाध्यक्ष भएर काम गरेका थिए ।

१३औँ महाधिवेशनबाट सभापतिमा निर्वाचित भएपछि देउवाले वाग्लेलाई महासमिति सदस्यमा समेत मनोनीत गरेका थिए । वाग्लेले बूढानीलकण्ठ स्कुलहुँदै लण्डन स्कुल अफ इकोनोमिक्स, हार्वर्ड विश्वविद्यालयमा अध्ययन गरेका छन् ।

वाग्ले कांग्रेसको राजनीतिमा विभिन्न लेखरचनामार्फत पार्टीले अघि सारेका अर्थराजनीति र नीतिका विषयको वकालत गर्नुका साथै प्रशिक्षण र दस्तावेज लेखनमा सक्रिय रहँदै आएका छन् । उनले कांग्रेसले अघि सारेको र सार्नुपर्ने अर्थ राजनीतिबारे नेता/कार्यकर्तालाई प्रशिक्षण दिँदै आएका छन् ।

त्यस्तै, २०७०, २०७४ को निर्वाचन र २०७९ को स्थानीय तहको निर्वाचनका क्रममा पार्टीको घोषणापत्र तयार गर्न पनि वाग्ले सक्रिय थिए । पार्टीमा विकास र आर्थिक परिदृश्यको उजागर तथा पार्टीले अघि सार्नुपर्ने मुद्दाका विषयमा पनि उनले परामर्श दिँदै आएका छन् ।

पौडेल हाल राष्ट्रिय योजना आयोगका उपाध्यक्ष छन् । अहिले प्रधानमन्त्रीसँग नजिकको सम्बन्ध बनाएको पात्रको रूपमा चिनिने उनले अमेरिकाको बर्कलीस्थित युनिभर्सिटी अफ क्यालिफोर्नियाबाट एग्रिकल्चरल एन्ड रिसोर्स इकोनोमिक्समा विद्यावारिधि गरेका छन् ।

काठमाडौं युनिभर्सिटी स्कुल अफ म्यानेजमेन्टमा भिजिटिङ एसोसिएट प्रोफेसरका रूपमा काम गरिसकेका पौडेलले मध्यतमोर हाइड्रोपावर कम्पनीको बोर्डमा बसेर काम गरेका थिए । अन्तर्राष्ट्रिय श्रम संगठन (आईएलओ) को आर्थिक सल्लाहकारको रूपमा पनि काम गरेका छन् पौडेलले । मिलेनियम च्यालेन्ज नेपालमा अर्थशास्त्रीको भूमिका निभाइसकेका उनी राष्ट्रिय योजना आयोगकै उपाध्यक्षका विज्ञ सल्लाहकारसमेत रहिसकेका छन् ।

प्रकाशित मिति: मंगलबार, भदौ १४, २०७९ १८:२४