अनुशासन सिकाउने मार्सल आर्ट खेलभित्रको दर्दनाक कथा, गुरुबाटै चेली बलात्कृत

अनुशासन सिकाउने मार्सल आर्ट खेलभित्रको दर्दनाक कथा, गुरुबाटै चेली बलात्कृत

A+ A A-

घटना १

८ साउन २०७९ मा विराटनगरका कराँते प्रशिक्षक विनोद राउत र सुरज सुवेदी पक्राउ परे । विराट हेल्थ कलेजमा नर्सिङ पढिरहेकी १९ वर्षीया युवतीलाई पटक–पटक बलात्कार गरेको उजुरी प्रहरीमा पुुगेपछि उनीहरू पक्राउ परेका थिए ।

प्रहरीका अनुसार उनीहरूले सुरुमा ती युवतीलाई नशालु पदार्थ खुवाएर बलात्कार गरेका थिए । सोही क्रममा उनीहरूले भिडियोसमेत खिचे । पछि त्यही भिडियो देखाएर ब्ल्याकमेलिङ गर्दै पटक–पटक बलात्कार गरेको आरोप उनीहरूमाथि छ । सुदेवी हेल्थ कलेजकै अनुशासन इन्चार्जसमेत हुन् ।

८ साउनमा पक्राउ परेका उनीहरूलाई जिल्ला अदालत मोरङले ६ भदौमा पुर्पक्षका लागि जेल चलान गर्ने आदेश दिएकाे छ । कराँते प्रशिक्षक राउत र सुवेदी हाल विराटनगरको झुुम्का कारागारभित्र कैदी जीवन बिताइरहेका छन् ।

आराेपित राउत कराँते मोरङका सहायक प्रशिक्षक र मोरङ तालिम विभागको उपनिर्देशकसमेत हुन् । राष्ट्रिय खेलकुद परिषद्‌मा २०५१ सालमा करार प्रशिक्षक नियुक्त भएका राउत र सुवेदी दुवै जना २०६१ सालबाट स्थायी प्रशिक्षकको भूमिकामा रहँदै आएका थिए ।

त्यसबाहेक राउत विराटनगरका विभिन्न सामाजिक संघसंगठनमा आबद्ध छन् । सुवेदी भने विराटनगर अस्पतालको सुरक्षा विभागमा समेत कार्यरत छन् । त्यस्तै, राउत नेकपा एमालेनिकट नेपाल खेलकुद महासंघका सचिव हुन् भने सुवेदी केन्द्रीय सदस्य ।

घटना २

२९ चैत २०७८ मा कराँतेकै अर्का प्रशिक सागर शाहीविरुद्ध प्रहरीमा बलात्कारको उजुरी परेको थियो । थानकोट नागढुंगा बस्दै आएका कैलाली लम्कीचुहाका शाहीमाथि आफैँले भाडामा लिएको टहरामा बस्दै आएकी एक महिलालाई बलात्कार गरेको उजुरी प्रहरीमा परेको थियो ।

उसो त शाहीमाथि आफैँले प्रशिक्षण गराउँदै आएको काठमाडौंको टेकुुस्थित पचलीभैरव कराँते डोजोकी एक नाबालिकालाई बलात्कार गरेको अभियोग छ । नाबालिका बलात्कार अभियोगमा जिल्ला अदालत काठमाडौंले उनलाई ६ वर्ष कैद सजायको फैसला गरेको छ । आफैँले ट्रेनिङ गराउँदै आएको डोजोकी बालिकालाई मोटरसाइकलमा घर पुर्‍याइदिने बहानामा घरमा कोही नभएको मौकामा बलात्कार गरेको पीडितको आरोप थियो ।

त्यसपछिसमेत विभिन्न मितिमा काठमाडौंबाहिर हुने खेलमा आफूमाथि गुरु शाहीले बलात्कार गरेको ती खेलाडीले अदालतमा बयान दिएकी थिइन् । जिल्ला अदालत काठमाडौंले शाहीलाई १० जेठ २०७५ मा ६ वर्ष जेल सजाय हुने फैसला गरेको थियो ।

उनको बलात्कारको शृंखला भने यतिमै सीमित थिएन । अदालतको फैसलापछि भाग्दै आएका उनको गत वर्ष चैतमा काठमाडौं बस्दै आएकी आफ्नै मितकी श्रीमतीलाई समेत बलात्कार गरेको उजुरी प्रहरीमा परेको थियो । सोही घटनापछि उनी पक्राउ परेका हुन् । हाल उनी जेल जीवन भोगिरहेका छन् ।

कठोर मिहिनेत र अनुशासनमा सिकाइने खेल ‘मार्सल आर्ट’ सिकेर ‘गुरु’को भूमिकामा रहेका गुरुबाट बलात्कारजस्तो जघन्य अपराधको घटनाको शृंखला यतिमै सीमित छैन ।

गत वर्ष आफैँले ट्रेनिङ गराउँदै आएकी एक नाबालिका खेलाडीलाई बलात्कार गरेको आरोपमा भक्तपुर सल्लाघारी तेक्वान्दो डोजाङका प्रशिक्षक चुलाई मुखिया पनि पक्राउ परे । उनलाई हाल जिल्ला अदालत भक्तपुरले धरौटीमा रिहा गरेको छ ।

यद्यपि मुद्दा भने विचाराधीन छ । प्रशिक्षक मुखियाले भने आफूलाई फसाउने योजनासहित बलात्कारको आरोप लगाएको बताए । ‘म गुरु हो । त्यस्तो गर्ने कुरा नै हुँँदैन । आर्थिक कारण मलाई फसाउन खोजिएको हो । पछि अदालतमा आफूमाथि बलात्कार भएको होइन भनेर ती खेलाडीले नै बयान दिएकी छिन्,’ आरोपी मुखियाले भने ।

प्रहरी प्रवक्ता डीआईजी टेकप्रसाद राईकाे भनाइमा धर्मगुरुले धर्मको नाममा गुरुको इच्छा पूरा गर्दा पुण्य हुन्छ भन्ने अन्धविश्वास र कतिपय शिक्षक प्रशिक्षकले यौन चाहना पूरा गर्न आफ्नो जिम्मेवारी भुलेका हुन् । । आफ्ना बालबालिकाबारे समय–समयमा घरपरिवारले चासो दिनुपर्ने उनी बताउँछन् ।

कर्म दिने गुरुबाट नै जघन्य अपराध हुनु दु:खद भएको जुडोका मुख्य प्रशिक्षक चन्द्र डंगोल बताउँछन् । ‘आफूले ट्रेनिङ गराउने चेला/चेली आफ्नै सन्तानबराबर हुन् । त्यस्तो आपराधिक सोच राख्नु नहुने हो । यसबारेमा त मलाई जानकारी नै छैन । तर, त्यस्तो भएको हो भने दु:खद हो,’ डंगोल भन्छन् ।

राई भने पछिल्लो समय बलात्कारको आरोपमा शिक्षक, गुरुहरूमाथि नै लाग्नु दु:खद भएको बताउँछन् । ‘बलात्कारका अधिकांश घटना आफन्तबाटै हुने गरेको तथ्यांक प्रहरीमा छ । अझ शिक्षक गुरुहरूबाट नै यस्तो प्रकारको घटना हुनु दु:खद छ,’ डीआईजी राईले भने ।

प्रकाशित मिति: सोमबार, भदौ १३, २०७९ १६:०२