प्रतिबन्ध र नगदमार्जिनले ६१ प्रतिशत घट्यो आयात कर्जा, कसको कति ऋण ?

A+ A A-

गत आर्थिक वर्षमा बैंक तथा वित्तीय संस्थाबाट दिइने आयात कर्जामा उल्लेख्य कमी आएको छ । आयातका लागि दिइने ट्रष्ट रिसिप्ट र इम्पोर्ट लोन' आर्थकि वर्ष २०७७/७८ को तुलनामा ६१ दशमलव ८६ प्रतिशतले घटेको छ ।

आर्थिक वर्ष २०७७/७८मा २ खर्ब ५ अर्ब ६३ करोड ८० लाख रुपैयाँको आयात कर्जा रहेकोमा गत आर्थिक वर्षमा जम्मा ७८ अर्ब ४३ करोड २० लाख रुपैयाँको मात्रै कर्जा दिइएको छ ।

नेपाल राष्ट्र बैंकको तथ्यांकअनुसार गत आर्थिक वर्षमा आयातमा भएको कर्जा पछिल्लो ५ वर्ष यताकै न्यून हो । ट्रष्ट रिसिप्ट कर्जा आयातपछिको खर्च व्यहोर्न दिइने कर्जा हो। प्रतितपत्रको कारोबारमा सम्पूर्ण कागजात मिलाई सामान छुटाउँदा ग्राहकले सुरुमा नै सम्पूर्ण रकम चुक्ता गर्न नसक्ने अवस्थामा ग्राहकको चालु खर्च धान्नका लागि बैंकहरूले ट्रष्ट रिसिप्ट कर्जा दिने गर्दछन्।

यस्ताे कर्जा आर्थिक वर्ष २०७६/७७ मा १ खर्ब ३८ अर्ब ३१ करोड ६० लाख रहेको थियो । त्यस्तै आर्थिक वर्ष २०७५/७६ मा १ खर्ब २७ अर्ब २१ करोड ६० लाख रहेको थियो ।

यसरी आयात कर्जा न्यून हुनुमा सरकारले विलासी बस्तुमा आर्थिक वर्षको अन्तिम त्रैमासिकबाट लगाएको प्रतिबन्ध तथा नेपाल राष्ट्र बैंकले नगद मार्जिन राख्नु प्रमुख कारण देखिएको छ ।
'एकातर्फ सरकारले नै कतिपय बस्तुमा आयात प्रतिबन्ध लगायो, राष्ट्र बैंकले ४७ बस्तुमा नगद मार्जिन लगाएर निरुत्साहित गर्‍यो', एक बैंकरले भने, 'हामीले बैंकर्स संघबाट पनि अत्यावश्‍यकबाहेकका आयात कर्जा स्वविवेकबाट कडाइ गर्न भन्यौँ ।'

गत आर्थिक वर्षमा ठूलो प्रभाव नपरे पनि त्यस्तो कर्जा कडाइको चालु आर्थिक वर्षको पहिलो महिना भने देखिएको छ । साउनमा आयात मात्रै १२ प्रतिशतले घटेको छ भने परिमाणात्मक रूपमा आयात २० प्रतिशतले कमी आएको छ ।

नेपाल राष्ट्र बैंकको तथ्यांकअनुसार २६ वाणिज्य बैंक र २ विकास बैंकले आयात कर्जा दिएका छन् । विकास बैंकहरूमा कामना विकास बैंकले ४ करोड १७ लाख र महालक्ष्मी विकास बैंकले ११ लाख रुपैयाँ आयात कर्जा दिएको पाइएकाे छ ।

सबैभन्दा बढी नविल बैंकको आयात कर्जा देखिएको छ । नविल बैंकले ११ अर्ब ४७ करोड ५६ लाख रुपैयाँको आयात कर्जा दिएको छ ।

त्यस्तै दोस्रोमा नेपाल इन्भेष्टमेन्ट बैंकले ८ अर्ब ९१ करोड ३५ लाख, तेस्रामा हिमालयन बैंकले ८ अर्ब ४८ करोड ३२ लाख, चौथोमा सिद्धार्थ बैंकले ७ अर्ब ३३ करोड ९० लाखका साथै पाँचौमा ग्लोबल बैंकले ५ अर्ब ५४ करोड ९१ लाख रुपैयाँको आयात कर्जा दिएको छ ।

आयातमा कुन बैंकको कति कर्जा ?

बैंकको नाम	रकम १० लाखमा
नविल	11,475.64
नेपाल इन्भेष्टमेन्ट	8,913.59
हिमालयन	8,483.27
स्ट्यान्डर्ड	7,339.03
ग्लोवल	5,549.19
नेपाल बैंक	5,103.62
एभरेष्ट	3,947.56
सिद्धार्थ	3,786.94
लक्ष्मी	3,394.86
प्रभु	2,613.52
एनएमबी	2,440.70
सानिमा	1,945.97
माछापुच्छ्रे	1,875.43
कुमारी	1,799.05
नेपाल एसबीआई	1,452.46
सनराइज	1,411.40
मेघा	1,349.29
एनसीसी	1,214.93
बिओके	1,212.81
सिटिजन	1,073.93
राष्ट्रिय वाणिज्य	837
सेञ्चुरी	380.4
प्राइम	325.55
सिभिल बैंक	293.72
एनआइसी	90.12
कृषि विकास	78.69
कामना	41.73
महालक्ष्मी	1.19