मुगुकाे १ सय ५९ क्वीन्टल अनुदानको नुन कहाँ हरायाे? डिपाे र ठेकेदारकाे जुहारीमै बित्याे महिना दिन

मुगुकाे १ सय ५९ क्वीन्टल अनुदानको नुन कहाँ हरायाे? डिपाे र ठेकेदारकाे जुहारीमै बित्याे महिना दिन

A+ A A-

सरकारले पठाएको अनुदानकाे नुन वितरण नहुँदै हराएको झण्डै महिना दिन बित्दा पनि भेटिएकाे छैन । मुगुका लागि रारा छायाँनाथ एयर काग्रो एण्ड ढुवानी सेवाले ढुवानीको जिम्मा लिएको २ हजार ७ सय क्वीन्टल नुनमध्ये १ सय ५९ क्वीन्टल सदरमुकाम गमगढीस्थित साल्ट ट्रेडिङ कर्पोरेसन लिमिटेड डिपो कार्यालय मुगुबाट हराएको थियाे ।

सरकारले सुगममा प्रतिकिलो २० देखि २५ रुपैयाँ मूल्य पर्ने नुनलाई दुर्गम जिल्लाका सर्वसाधारणका लागि अनुदानस्वरुप ९ रुपैयाँमा उपलब्ध गराउँदै आएको छ । दुर्गम जिल्ला मुगुका लागि ल्याइएको १ सय ५९ क्वीन्टल नुन कता हरायो, कहाँ पुग्यो भन्ने अत्तोपत्तो छैन । खाली ठेकेदारले हाकिमले बेच्यो भन्ने, अनि हाकिमले ठेकेदारले बुझाएकै छैन भन्ने आरोप प्रत्यारोपमै बितेको छ ।

डिपाे र ठेकेदारकाे जुहारी

रारा छायाँनाथ एयर कार्गो एण्ड ढुवानी सेवाका सञ्चालक रामचन्द्र भामका अनुसार साल्ट ट्रेडिङ कर्पोरेसन र उनको ढुवानी कम्पनीबीच भएको सम्झौताअनुसार आर्थिक वर्ष २०७८–०७९ का लागि पहिलोपटक १५ सय क्वीन्टल र दोस्रोपटक १२ सय क्वीन्टल गरी कुल २ हजार ७ सय क्वीन्टल नुन नेपालगञ्जदेखि मुगु सदरमुकाम गमगढीस्थित साल ट्रेडिङ कर्पोरेसनको डिपो कार्यालयलाई बुझाइसकेका छन् ।

तर, मुगु डिपोका प्रमुख खगेन्द्र कार्कीले नुन नआइपुगेको भन्दै मौज्दातमा नराखी ठेकेदार भामले १ सय ५९ क्वीन्टल नुन बिक्री गरी गायब बनाएको दाबी गरेका छन् । प्रमुख कार्कीले उक्त नुनको हिसाब नै नदेखाई ठेकेदारले आफूखुसी बिक्री गरेको आरोपसमेत लगाएका छन् ।

यता ठेकेदार भाम भन्छन्, 'हरेकपटक नुनु ढुवानी गरेर गमगढी पुर्‍याएपछि प्रमुखलाई नुन बुझ्न आउनुस् भन्दा उहाँ आफू नआई पटकपटक श्रीमतीलाई नुन बुझ्न पठाउने गर्नुहुन्थ्यो । उहाँकी श्रीमतीलाई चलानी बुझाई रिसिभ माग्दा अर्को दिन दिन्छु भनी आलटाल गर्ने र अहिले अन्तिममा आएर नुन नै ठेकेदारले नल्याएको भनेर प्रमुख कार्की पन्छिन खोज्नुभएको छ ।'

ठेकेदार भामले भने, 'विभिन्न समयमा नेपालगञ्ज साल्ट ट्रेडिङदेखि चलानी गरी सातपटक नुन ढुवानी गरी मुगु डिपोलाई प्रशासन प्रतिनिधिको रोहबरमा बुझाएका सबै कागजात हामीसित हुँदा पनि कार्यालय प्रमुख कार्कीले नुन नपुगेको भन्दै एकपटकको गाडीको पूरै नुनको चलानी/रिसिभ कागज नै गायब बनाएर भुक्तानी रोकिदिएका छन् ।'

ठेकेदार भामका अनुसार प्रमुखले आफूबाट आर्थिक लाभ लिन खोजेको र आफूले दिन नमान्दा एक गाडी नुन नै गायब बनाइदिएको आरोपसमेत लगाएका छन् ।

नेपालगञ्ज साल्ट ट्रेडिङ कार्यालयबाट गत चैत ८ गते ३ सय २० बोरा (१ सय ५९ क्वीन्टल नुन) बोकी मुगु हिँडेको भे १ ख ३६९० को गाडी १२ गते मुगुको भुलभुले चेक पोस्टमा सि.नं. ३३ मा इन्ट्री दर्ता भई १३ गते आइतबार दिउँसो साल्ट ट्रेडिङ मुगु डिपोका प्रमुख खगेन्द्र कार्कीकी श्रीमती विद्या मल्ल कार्कीलाई जिल्ला प्रशासन कार्यालय मुगुका प्रतिनिधिको रोहबरमा बुझाएको ठेकेदारका ज्वाइँ पर्ने प्रतिनिधि पुलिन्द बुढाको भनाइ छ ।

उक्त नुनको चलानी बुझेको रसिद माग्दा भोलि सर आएर दिनुहुन्छ भनी आलटाल गरेको र उनले बुझेको रसिद हिसाबमा नराखी अहिले आएर उक्त गाडीमा ल्याएको नुन नै गायब बनाएको ठेकेदार भाम बताउँछन् । नेपालगञ्जदेखि आफूले गाडीमा सातपटक गरी २ हजार ७ सय क्वीन्टल नुन मुगु पुर्‍याई प्रशासन प्रतिनिधिको रोहबरमा बुझाए पनि एउटा गाडीको ३२० बोरा अर्थात् १ सय ५९ क्वीन्टल नुन नपुगेको भन्दै सिधै अनियमितता गरेको आरोपसमेत ठेकेदार भामले लगाएका छन् । यस विषयमा नुन हाकिम र प्रशासनको समेत मिलेमतो रहेको उनको भनाइ छ ।

यता साल्ट ट्रेडिङ मुगु डिपोका प्रमुख कार्कीसँग बुझ्दा ठेकेदार कम्पनीले नै नुन आफूलाई नबुझाएको बताए । यो सबै आफूप्रति लगाएको झुटा आरोप भएको उनको दाबी छ । यस वर्ष मुगुका लागि २ हजार ७ सय क्वीन्टल आउनुपर्नेमा २ हजार ५ सय ४१ क्वीन्टल नुन मात्र आफूले ठेकेदारबाट बुझेको उनले बताए ।

आफूले बेलाबेला बुझेको नुनको चलानी/रिसिभ कागजात कार्यालयमा भएको र १ सय ५९ क्वीन्टल अर्थात् ३ सय २० बोरा नुन हामीलाई नबुझाएको उनको भनाइ छ । २५ सय ४१ क्वीन्टल नुन बुझेको चलानी हामीसँग हुने अनि १ सय ५९ क्वीन्टल नुनको चलानी/रिसिभचाहिँ हामीसित नहुने कसरी हुन्छ ?

उक्त नुनका विषयमा साल्ट ट्रेडिङ प्रदेश कार्यालय बाँकेमा बुझ्दा १ सय ५९ क्वीन्टल नुनको रिसिभ प्रमाण कागज कुनै पेस नगरेकाले यो नुन हराएको विषयमा ठेकेदारकै जिम्मा भएको साल्ट ट्रेडिङ प्रदेश कार्यालयका प्रमुख मनोज चौधरीले बताए । चौधरीले भने, 'जिल्ला प्रशासन कार्यालयका प्रतिनिधि, जिल्ला समन्वय कार्यालयका प्रतिनिधि, मुगु डिपो प्रमुखसहितको रोहबरमा नुन बुझेको प्रमाण पेस गरेर मात्रै नुन ढुवानीको भुक्तानी हुने प्रावधान छ । अन्यथा भुक्तानी राकिन्छ ।'

'ठेकेदारले नुन बुझाए भनेर हुन्न । हामीलाई प्रमाण चाहिन्छ,' चौधरीले भने, 'यदि ठेकेदारले प्रमाण पेस गर्न नसके १ सय ५९ क्वीन्टल नुनको १ लाख ४३ हजार रुपैयाँबराबरको रकम उनको धरौटीबाट असुलउपर गरिनेछ ।' साल्ट ट्रेडिङ प्रदेश कार्यालयका प्रमुख चौधरीका अनुसार नुन साल्ट ट्रेडिङको हुन्छ । पैसा नेपाल सरकारको राज्य कोषमा जम्मा हुन्छ । ठेकेदारले नुन बुझाएको प्रमाणित कागजात पेस गरे मात्र ढुवानीको पैसा फिर्ता पाउँछन् ।

ठेकेदारले हाकिमलाई 'नुन गायब बनायो' भनेर दोष दिने, हाकिमले 'ठेकेदारले नै नुन नल्याएको' भन्ने विषयमा प्रमुख जिल्ला अधिकारी (सीडीओ) रोमबहादुर महतसँग बुझ्दा आफूले गोदाममै गएर मौज्दात नुन स्टक प्रमाणित गर्दा ६ सय ५५ क्वीन्टल नुन मौज्दातमा रहेको बताए ।

सीडीओ महतले भने, 'ठेकेदारले के कति नुन ल्याए, कति बुझियो भनेर हामीले स्टक प्रमाणित गरेर जति छ, त्यति भन्ने हो ।' कतिपय अवस्थामा दुर्गम जिल्लामा आउने अनुदानको नुन नेपालगञ्जबाट निकासी हुने र दुर्गममा नपुग्ने समस्या हुँदा जिल्ला प्रशासनबाट पठाएका प्रतिनिधिको रोहबरमा नुन बुझ्ने गरेको महतले बताए । बुझेको बुझाइएको कागज प्रमाणअनुसार जति छ, त्यत्ति भन्ने उनको भनाइ छ ।

यो त एउटा उदाहरण मात्रै हो । सरकारले दुर्गम जिल्लामा अनुदानका नाममा बर्सेनि पठाउने नुनमा अनियमितता हुँदै आएको छ । आर्थिक वर्ष २०७८/०७९ को कोटामध्येको १ सय ५९ क्वीन्टल अनुदानको नुन वैशाखदेखि हराएको र अझैसम्म सरोकारवाला निकायहरू नुनको विषयमा के गर्ने, कसलाई कारबाही गर्ने भन्नेबारे बोल्न नसकी केन्द्रमा पठाएको भन्दै पन्छिन खोजेको जस्तै देखिन्छ ।

प्रकाशित मिति: शुक्रबार, भदौ १०, २०७९ १६:४६