सनग्लास किन्दा के हेर्ने ?

कृपा श्रेष्ठ ।

A+ A A-

न्युरोडकी कृषा श्रेष्ठ बिहीबार न्युरोडस्थित क्लासिक अप्टिकल पुगिन् । उनी आफूलाई कस्तो चस्मा (सन ग्लास) सुहाउला भनेर हेर्दै थिइन् । फरक रङको चस्मा आफूलाई सुहाउँछ वा सुहाउँदैन भनेर ‘ट्राई’ पनि गर्न मन थियो उनलाई ।

उनले क्लासिक अप्टिकलका सञ्चालक लक्ष्मण श्रेष्ठलाई चस्माको लेन्स र फ्रेमबारे सबै बताउन आग्रह गरिन् । कृषाले आफूलाई चस्मामा पावर पनि हाल्नपर्ने कुरा प्रस्ट्याइन् । अन्ततः कृषाले पावर हालेर मेटल फ्रेम भएको चस्मा बनाउन अर्डर दिइन् ।

सन ग्लासहरू बेच्ने अधिकांश बिक्रेताका अनुुसार साधारणतया चस्मा किन्दा ग्राहकले आफूलाई कस्तो फ्रेम सुहाउँछ, त्यस्तै प्रकारको चस्मा हेर्छन् र किन्छन् । केहीले राम्रो, नाम चलेको ब्रान्ड पनि खोज्ने गरेका छन् । तर, कुन चस्मामा कस्तो लेन्स छ, कस्तो प्रकारको फ्रेम हुन्छ, ख्याल गर्दैनन् ।

शिलापत्र हाटबजारको आजको शृंखलामा हामी विभिन्न खाले ‘सन ग्लास’ बारे जानकारी दिँदैछौँ । हुुन त ब्रान्ड, ग्लासको क्वालिटी र फ्रेमको क्वालिटीअनुसार सबै खाले ग्लासको विशेषता फरकफरक हुन सक्छ । तिनको मूल्य पनि फरक हुन्छ । तर, चस्मा किन्दा के कुरामा ख्याल गर्न आवश्यक छ, त्यसबारे बुझौँ ।

राम्रो चस्मा कस्तो हुन्छ ? जसमा ब्रान्ड, ग्लासको क्वालिटी, फ्रेमको क्वालिटी राम्रो हुन्छ । तर, राम्रो र नाम चलेको ब्रान्ड भनेर किन्नुभयो भने तपाईं झुक्किन पनि सक्नुहुन्छ । ब्रान्डको नाम हुँदैमा चस्मा राम्रो नै हुन्छ भन्ने हुँदैन ।

विभिन्न इन्टरनेसनल ब्रान्डका चस्मा नेपालमा बिक्री गरिन्छन् । तर, साधारण चस्मामा इन्टरनेसनल ब्रान्डको जस्तै फिचर देखाएर पनि बेच्ने गरेको पाइन्छ । अर्थात् ‘कपी’ गरिएका ब्रान्डहरू नेपाली बजारमा छ्याप्छ्याप्ती छन् ।

क्लासिक अप्टिकलका सञ्चालक लक्ष्मण श्रेष्ठका अनुसार नेपालमा यसरी ‘कपी’ गरेर बेच्ने कम्पनीको कमी छैन । श्रेष्ठ भन्छन्, ‘चस्मा किन्दा ठूलो ब्रान्डको सस्तोमा पाइयो भनेर किन्नचाहिँ हुँदैन । किन्दा ब्रान्डलाई कम प्राथमिकतामा राख्नुपर्छ ।’

बजारमा रेबन, गुची, बरबेरीजस्ता ब्रान्ड पाइन्छन् ।

लेन्स

हामीले सनग्लास घाममा हिँड्दा लगाउँछौँ । घाममा सजिलै हिँडडुल गर्नका लागि प्रयोग गरिन्छ । त्यसैले लेन्सको विशेषता हेर्दा कति यूभी (अल्ट्रा भोइलेट) प्रोटेक्सन दिन्छ भन्ने हेर्न आवश्यक छ । अर्थात् धेरै यूभी प्रोटेक्सन दिने लेन्स राम्रो हुन्छ । आँखाको सुरक्षाका लागि लेन्समा ४०० यूभी प्रोटेक्सन हुनैपर्छ ।

चस्मामा प्रायः दुई किसिमको लेन्स पाइन्छ । सिसा र प्लास्टिकको लेन्स चस्मामा हुन्छ । प्लास्टिकको लेन्सलाई फाइबर लेन्स पनि भनिन्छ ।

सिसाको लेन्समा प्रायः ४०० यूभी प्रोटेक्सन पाइन्छ । अर्थात् घामबाट आउने हानिकारक किरणलाई सिसाको लेन्सले धेरै रोक्न सक्छ । त्यस्तै, प्लास्टिकको लेन्समा भने प्रायः ३०० यूभी प्रोटेक्सन हुन्छ ।

सिसाको लेन्समा स्पष्ट भिजन देख्न सकिन्छ । यस्तो लेन्समा दाग बस्ने वा स्क्य्राच आउने समस्या कमै हुन्छ । र, सिसाको लेन्स ज्यादा स्टाइलिस पनि देखिन्छ । तर, सिसाका लेन्सहरू अरु लेन्सको तुलनामा भारी हुन्छ । त्यस कारण दिनभरि लगाउन नसकिने र बारबार झरिरहने हुन सक्छ ।

सिसाको लेन्समा सजिलै स्क्य्राच नभए पनि सजिलै फुट्न सक्ने भने हुन्छ । त्यस्तै, यो लेन्समा तपाईंले अन्य रङ थप्न चाहनुभएमा नमिल्न सक्छ ।

त्यस्तै, प्लास्टिकका लेन्स हलुका खालका हुन्छन् । दिनभरि लगाउन पनि असजिलो हुँदैन । प्लास्टिकको लेन्सको खास विशेषता नै यही हो । सिसाको तुलनामा प्लास्टिकको लेन्समा स्क्य्राच हुने सम्भावना धेरै हुन्छ । तर, यस्तो लेन्स सजिलै फुट्दैन । प्लास्टिकको लेन्समा धेरै प्रकारका फ्रेम राख्न सकिन्छ र यसमा सिसाको लेन्समा जस्तो अरु रङ हाल्न नमिल्ने हुँदैन ।

प्लास्टिकको तुलनामा सिसाको लेन्सको मूल्य भने धेरै हुन्छ । सामान्यतया प्लास्टिक प्रयोग गरिएको चस्मा १ हजारदेखि १२ सयसम्ममा किन्न सकिन्छ भने सिसा प्रयोग गरिएको चस्माको मूल्य १५–१६ सयभन्दा धेरै हुन्छ ।

फ्रेम

बजारमा सबैभन्दा धेरै प्लास्टिककै फ्रेम पाइन्छ । प्रायः फ्रेममा प्लास्टिक नै प्रयोग गरिएको हुन्छ । कुनै फ्रेम मेटलको पनि हुन्छ । प्लास्टिकको मेटलको तुलनामा मेटल फ्रेमको मूल्य केही बढी हुन्छ ।

चस्माको फ्रेममा ध्यान दिनुपर्ने भनेको ‘फ्लेक्जिबिलिटी’ हो । अर्थात् धेरै तन्काउन मिल्ने चस्मा धेरै टिकाउ हुन्छ । त्यसखाले चस्माका फ्रेम ‘टीआर–९०’ले बनाइन्छ । टीआर–९० भनेको पनि एक किसिमको प्लास्टिक नै हो ।

‘एसिडेट’ नामको फ्रेम पनि बजारमा पाइन्छ । यो फ्रेम ‘बायोडिग्रेडेबल’ (सजिलै कुहिन सक्ने) हुन्छ भन्ने बिक्रेताहरू बताउँछन् । बिक्रेताका अनुसार यस्तो खाले लेन्स सबैभन्दा राम्रो क्वालिटीको हुन्छ ।

सन ग्लासमा कसरी पावर राख्ने ?

पावर भएको चस्मा प्रयोग गर्ने व्यक्तिले सनग्लास कसरी प्रयोग गर्न सक्छ ? योबारे धेरैलाई जानकारी हुँदैन । त्यस कारण कतिपयले दुईवटा चस्मा प्रयोग गर्ने गरेका पनि छन् । तर, सन ग्लासमा नै पावर राख्न सकिन्छ ।

पावर भएको सनग्लास लगाउन साधारण खाले पावर भएको लेन्समा कलर गर्नुपर्ने हुन्छ । आफूलाई चाहिने वा मन परेको ‘शेड’ लेन्समा हाल्नुपर्ने हुन्छ । र, त्यसैलाई फ्रेमको आकारअनुसार काटिन्छ । यो काम चस्मा पसलहरूमा सजिलै गरिन्छ ।

प्रकाशित मिति: शनिबार, भदौ ११, २०७९ १०:२३