हेटौँडाको सहकारीबाट ४६ लाख गायब प्रकरण : साढे २ सय जनाले दिए प्रहरीमा उजुरी

A+ A A-

आफूले बचत गरेको रकम सहकारीबाटै गायब भइसकेपछि पटक–पटक प्रहरीमा पुगेर पनि फर्किएका बचतकर्ताहरूले अन्ततः प्रहरीमा उजुरी दिएका छन् । हेटौँडा उपमहानगरपालिका–२ स्थित जनचेतना स्वावलम्बन बचत तथा ऋण सहकारी संस्थाका सञ्चालकहरूले ४६ लाख बढी रकम हिनामिना गरेका थिए ।

सहकारीबाट बचतकर्ताको रकम हिनामिना भएको स्वयम् सञ्चालकहरू नै स्वीकार्छन् । सहकारीको सञ्चालक समितिका अध्यक्ष धादिङ फुलखर्क घर भई हेटौँडा–८ बस्ने ४० वर्षीय रामकृष्ण अधिकारी र कोषाध्यक्ष हेटौँडा–८ का ३२ वर्षीय राजीव तामाङ जिल्ला प्रहरी कार्यालय मकवानपुरको हिरासतमा छन् ।

सहकारीका बचतकर्ता १०–१२ जनाले सहकारीको पासबुकसहित दिएको उजुरीका आधारमा प्रहरीले १ भदौमा उनीहरूलाई पक्राउ गरेको हो । हाल अधिकारी र तामाङविरुद्ध मुद्दा दिनेको संख्या करिब साढे २ सय पुगेको छ । मकवानपुरका प्रहरी प्रवक्ता प्रहरी नायब उपरीक्षक टेकबहादुर कार्कीका अनुसार हालसम्म २ सय ३२ जनाले उजुरी दिएका छन् । जिल्ला अदालत मकवानपुरबाट म्याद थप गरेर उनीहरूलाई हिरासतमा राखी अनुसन्धान गरिरहेको कार्कीले जानकारी दिए ।

सहकारीले आर्थिक अपचलन गरेको घटनाक्रम बारे थाहा पाउन करिब डेढ वर्षअघि जानुपर्ने हुन्छ । गत वर्ष साउन महिनामा काठमाडौंको ग्वार्कोस्थित वेलहम्स बचत तथा ऋण सहकारी संस्थाको शाखा हेटौँडामा खुल्यो । सहकारीले साउनदेखि पुससम्म करिब १५ जना बजार प्रतिनिधि राखेर धमाधम लाखौँ रकम बचतका नाममा संकलन गरेको थियो ।

काठमाडौंमा दर्ता भएको सहकारी हेटौँडामा सञ्चालन हुन नपाउने भन्दै तत्कालीन सञ्चालक यमनारायण रजौटाले ८ नम्बर वडाका रामकृष्ण अधिकारी र राजीव तामाङसँग मिलेर हेटौँडा– १२, पदमपोखरीको जनचेतना स्वावलम्बन बचत तथा ऋण सहकारी संस्था खरिद गरे । वेलहम्सको व्यावसायिक साझेदारका रुपमा जनचेतना स्वावलम्बन साकोसले नियमित बचत उठाउन थाल्यो । नियमित बचत संकलन भइरहेको बेला सहकारीका तत्कालीन अध्यक्ष रजौटाले गतवर्ष पुसमा बचतकर्ताको बचत र फर्निचरसहित ५१ लाख रुपैयाँ लिएर फरार भएको पीडितहरूले बताएका छन् ।

हेटौँडाको जनचेतना सहकारीद्वारा बचतकर्ताको ४६ लाख रकम हिनामिना

गत कार्तिकदेखि लगानीसहित जनचेतनाको अध्यक्षमा अधिकारी र तामाङ कोषाध्यक्ष भएर आए । सहकारीका कोषाध्यक्ष तामाङले वेलहम्सका सञ्चालक रजौटाले ५१ लाख रुपैयाँ लिएर गएको आरोप यसअघि नै शिलापत्रसँग बताएका थिए । ‘रजौटाले हामीलाई सहकारी जिम्मा लगाएर जाँदा ५१ लाख रुपैयाँ लानुभएको रहेछ । हामीलाई पनि झुक्याएर यस्तो काम भयो,’ उनले भनेका थिए । तामाङका अनुसार रजौटाले १८ लाख रुपैयाँ कार्यालय खर्च र बाँकी बचतकर्ताले संकलन गरेको रकम लिएर गएको आरोप लगाए ।

अधिकारी र तामाङले रजौटालाई दोषी देखाए पनि उनीहरूको साँठगाँठ रहेको खुल्न आउँछ । रजौटाले लगेको रकम अधिकारी र तामाङले यसअघि नै प्रहरीको रोहबरमा तिर्ने गरी सहमति गरेका थिए । २०७९ जेठ दोस्रो हप्ता मकवानपुर प्रहरीमा अध्यक्ष अधिकारी र कोषाध्यक्ष तामाङले पीडितहरूसँग ३ महिनाभित्र रकम उपलब्ध गराउने सहमति गर्दै चेक दिएका थिए । तर, तोकिएको समयमा पैसा फिर्ता नगरेपछि पीडितहरू प्रहरीकोमा उजुरी दिएका थिए ।

पीडितहरूले बचत रकम सबै फिर्ता मागेपछि अधिकारी र तामाङले पीडितहरूले तीन महिनाभित्र ७२ लाख रुपैयाँ फिर्ता गर्नेगरी सहमति गरेका थिए । हिनामिना भएको ४६ लाख र ऋण लगानी भइसकेको सर्वसाधारणको बचत रकम गरेर ७२ लाख फिर्ता गर्ने सहमतिमा जनाइएको थियो । सहकारीको हेटौँडा–१२, पदमपोखरीमा रहेको १ कठ्ठा जग्गा र दुईतले घर बिक्री गरेर पीडितको रकम तिर्ने अध्यक्ष अधिकारी र कोषाध्यक्ष तामाङले सहमति गरेपनि हालसम्म रकम नतिरेका हुन् ।

हेटौँडा–१, चौकीटोल गैरीगाउँका सुनिल बानियाँले २०७८ मंसिरमा जनचेतना स्वावलम्बन बचत तथा ऋण सहकारीमा १२ लाखको मुद्दती बचत गरेका थिए । सहकारीले नै तीन महिनालाई मुद्दती राख्न पाउने बताएपछि उनले बचत गरेको यसअघि नै शिलापत्रलाई बताएका थिए । १२ लाख रुपैयाँ मुद्दतीमा राखेर थप पैसा व्यापारमै लगानी गर्ने योजना बनाएका बानियाँलाई सहकारीले डुबाएको थियो । हाल बानियाँ भएको व्यापारसमेत छोडेर घरमै बसेका छन् । तीन महिनापछि मुद्दतीको रकम लिन सहकारी पुग्दा उनलाई आलटाल गरेर पठाइएको गुनासो गरेका थिए ।

सहकारी संस्थामा करिब ८ सय जना बचतकर्ताको २–४ हजारदेखि लाखौँ रुपैयाँसम्म मुद्दतीमा राखिएको रकम हिनामिना भएको पीडितहरूको भनाइ छ । छोरीको करिब २८ हजार बचत पनि सहकारीले हिनामिना गरेको भन्दै १ नम्बर वडाकी सरस्वती भ्लोन प्रहरीकोमा पुगेकी छन् । सरस्वतीजस्ता ज्याला मजदुरी गर्ने र गृहिणी सयौँ महिलाको बचत रकम सहकारीले हिनामिना गरेको आरोप छ ।

प्रकाशित मिति: शुक्रबार, भदौ १०, २०७९ ०८:४७