कतारी रंगशाला निर्माणमा खटिएका ६० नेपाली निकालिए, १ सय ५३ थुनामा

A+ A A-

कतारमा आगामी नोभेम्बर २० तारिखमा विश्वकप फुटबल प्रतियोगिता सुरु हुँदैछ । तर, विश्वकपका लागि रंगशाला निर्माणमा लगिएका विदेशी कामदार भने पारिश्रमिक नपाएर आन्दोलनमा उत्रिन थालेका छन् ।

आन्दोलनमा उत्रिएका कतिपय विदेशी कामदारहरूलाई कतारको अध्यागमन विभाग र श्रम विभागले देशनिकाला गर्न थालेको छ ।

कतारले ज्याला नपाएकोमा विरोधमा उत्रिएका आप्रवासी कामदारलाई देशनिकालासम्म गरेकाे छ । अल बन्दारी इन्टरनेसनल ग्रुपको दोहास्थित कार्यालयसामु अगस्ट १४ मा करिब ५ सय विदेशी श्रमिक ज्याला माग्दै आन्दोलनमा उत्रिए । जसमा करिब ३ सयभन्दा बढी नेपाली श्रमिक थिए । तीमध्ये १ सय ५३ जना नेपालीलाई आन्दोलनका क्रममा पक्राउ गरी कतार प्रहरीले थुनामा राखेको छ ।

आन्दोलनमा उत्रिएकामध्ये ६० जना नेपालीलाई देशनिकाला गरिएको र उनीहरूलाई पहिलो चरणमै नेपाल पठाइएको सूचना पाएको कतारस्थित नेपाली दूतावासले जनाएको छ ।

ज्याला माग्दै नेपाल, बंगलादेश, भारत, इजिप्ट र फिलिपिन्सका श्रमिक आन्दोलनमा उत्रिएका थिए, जसमा सबैभन्दा धेरै नेपाली कामदार रहेकाे नेपाली दूतावासले जनाएको छ । त्यस्तै, आन्दोलनमा उत्रिएका अन्य ७० जना नेपालीहरूलाई पनि यही साता स्वदेश फर्काउने सूचना पाएको दूतावासले जानकारी दिएको छ ।

देशनिकाला गरिएका विदेशी कामदारले आन्दोलनका क्रममा सुरक्षा कानुन तोडेको आरोप कतारको अध्यागमन विभागले लगाएको छ ।

कतारस्थित दोहा शहरनजिकै क्विन टावरमा आन्दोलित कतिपय नेपाली कामदार भागेर अन्य स्थानमा गएको हुन सक्ने दूतावासको भनाइ छ । क्विन टावर दोहा शहरको मुख्य बजारभित्र पर्छ ।

यो क्षेत्रमा आन्दोलनमा उत्रिएका विदेशी कामदारले सडक नै जाम गरेको सूचना आएको दूतावासका एक कर्मचारीले बताए । कतार सरकारले आन्दोलनका बारेमा केही विषय बाहिर नल्याएका कारण के भएको हो भन्ने अवस्था नभएको दूतावासका कर्मचारीले जानकारी दिए ।

दूतावासका ती कर्मचारीका अनुसार २ सय २५ जना नेपाली कामदारलाई आन्दोलन गरेको आरोपमा देशनिकालाको कारबाही हुन सक्नेछ । जसमा यही साता करिब १ सय जना कामदार स्वदेश फर्किंदैछन् । अन्य कामदारको विषयमा अनुसन्धान भइरहेको कतार प्रहरीले जानकारी दिएको दूतावासले जनाएको छ ।

इक्विडेम नामक मानवअधिकारवादी संस्थाका अनुसार देशनिकालामा नेपाल, बंगलादेश, भारत, इजिप्ट र फिलिपिन्सका श्रमिक परेका छन् । देशनिकालामा पर्ने विदेशी कामदारको इकिन तथ्यांक उल्लेख नभएको र कुन देशका कति श्रमिक परे भन्नेबारे पनि कतारी अध्यागमनले गोप्य राखेको इक्विडेमले जनाएको छ ।

इक्विडेमका अनुसार ५ सय जनाभन्दा धेरै विदेशी कामदारले ज्याला नपाएको भन्दै अल बन्दारी इन्टरनेसनल ग्रुपको दोहास्थित कार्यालयमा आन्दोलन गरेका थिए ।

कतार सरकारका अनुसार त्यहाँ काम गर्न योग्य ९६ प्रतिशत कामदारहरूलाई पारिश्रमिकको सुरक्षा प्रणालीले समेट्छ । जसअन्तर्गत काम लगाउने कम्पनीहरूले पारिश्रमिक दिनुपर्ने समयको सात दिनभित्र सबै पारिश्रमिक कतारी बैंकमार्फत दिएर स्वदेश पठाइँदैछ ।

कारबाहीमा परेका नेपाली श्रमिकका हकमा उनीहरूले पाउने पारिश्रमिक भने कतारी श्रम विभागका कर्मचारीको नेतृत्वमा अल बन्दारी इन्टरनेसनलले दिएर मात्र पठाएको फर्किएका कामदारले बताएको रोजगारविज्ञ रामेश्वर नेपालको भनाइ छ ।

अल बन्दारी कम्पनी खासगरी निर्माण तथा इन्जिनियरिङ क्षेत्रमा धेरै विदेशी कामदार कार्यरत छन् । यो कम्पनीमा अधिकांश नेपाली निर्माण क्षेत्रमा कार्यरत रहेको र उनीहरूसमेत कम पारिश्रमिकमा धेरै काम गर्नुपरेका कारण आन्दोलनमा उत्रिएको हुन सक्ने नेपाल बताउँछन् ।

विश्व फुटबलको प्रशासक निकाय फिफालाई यसै वर्षको सुरुमा मानवअधिकार हनन व्यहोरेका आप्रवासी श्रमिकहरूको क्षतिपूर्तिका निम्ति कम्तीमा ४४ करोड डलरबराबरको कोष स्थापना गर्न आह्वान गरिएको थियो ।

सन् २०१० मा कतारलाई विश्वकप फुटबल आयोजना गर्न फिफाले अनुमति दिएको थियो । विश्वकप फुटबल आयोजना गर्न अनुमति पाएलगात्तै आठवटा रंगशाला बनाउन थालेको थियो । जसमा तीन लाखभन्दा धेरै विदेशी कामदार उक्त रंगशालामा निर्माणमा खटिएको कतारमा रहेको अन्तर्राष्ट्रिय श्रमिक संगठन (आईएलओ)ले जनाएको छ ।

प्रकाशित मिति: बिहीबार, भदौ ९, २०७९ १७:२३