हर्न निषेध नै कार्यान्वयन कमजोर, ट्राफिकका १४ नयाँ बुँदे कार्ययोजना

A+ A A-

प्रदेश ट्राफिक प्रहरी कार्यालयले १ मंसिर २०७५ देखि प्रदेश ५ का तीन ठूला सहर बुटवल, नेपालगन्ज र दाङमा एकै साथ हर्न निषेध गरेको थियो । हर्न निषेध गरेको ७ महिना बितिसक्दा पनि यसको प्रभावकारिता निकै न्यून देखिएको छ । तत्कालीन प्रहरी वरिष्ठ उपरीक्षक नरबहादुर केसीले तामझामसहित सुरुवात गरेको हर्न निषेध अभियानको कार्यान्वयन पक्ष भने फितलो छ ।

एक महिना सचेतनामूलक कार्यक्रम गरेपछि ठाउँको ठाउँ कारबाही गर्ने गरी यो कार्यक्रम ल्याइएको थियो । ७ महिनाको अवधिमा बुटवलमा भने ३ सय ३ जना कारबाहीमा परे ।

‘मानिसमा सचेतना नै भएन भने त यो कसरी कार्यान्वयन हुन्छ ? तर, पहिलेको तुलनामा कम भने हुँदै गएको छ,’ प्रदेश ट्राफिक कार्यालय बुटवलका प्रहरी वरिष्ठ उपरीक्षक मधुसूदन लुइँटेलले भने ।

नेपालगन्ज र दाङमा पनि लागू भएको हर्न निषेधको पूर्ण पालना भएको छैन । जिल्ला ट्राफिक कार्यालय बाँकेका अनुसार पहिलो चरणमा नेपालगन्ज उपमहानगरपालिका क्षेत्रभित्र अभियान लागू गरिएको हो ।

पछिल्लो समय नेपालगन्जमा ध्वनि प्रदूषण बढ्दै गएपछि अभियान सुरु गरिएको ट्राफिक प्रहरीले जनाएको छ । ट्राफिक प्रहरी कार्यालय तुलसीपुरका अनुसार सचेतनामूलक कार्यक्रमसँगै जरिमाना गराएर पनि अभियानलाई जारी राखेको बताएको थियो ।

दाङमा गुम्राह चोकदेखि शिवनगर र हात्तीखौवादेखि पुलचोकसम्म ‘नो हर्न’ क्षेत्र तोकिएको छ । बुटवल उपमहानगरपालिकाभित्र रामनगरदेखि पारी बुटवल र गोलपार्कदेखि चौराहसम्मको क्षेत्रलाई हर्न निषेधित क्षेत्र तोकिएको थियो ।

१४ करोड राजस्व संकलन

प्रदेश ५ ट्राफिक कार्यालय बुटवल मातहतका १२ जिल्लाले आर्थिक वर्ष २०७५\७६ मा १४ करोड रुपैयाँ राजस्व संकलन गरेकाे छ । २ लाख ४३ हजार ७ सय ५६ सवारीसाधनलाई कारबाही गर्दा १४ करोड ४१ लाख ९४ हजार ५ सय राजस्व संकलन भएको प्रदेश ट्राफिक कार्यालय बुटवलले जनाएको छ ।

सबैभन्दा बढी राजस्व जिल्ला ट्राफिक प्रहरी कार्यालय रुपन्देहीले उठाएको छ । ४९ हजार ६ सय सवारी साधनलाई कारबाही गर्दा ३ करोड ५१ लाख २ हजार राजस्व संकलन गरेको छ । त्यसैगरी, राजस्व बढी संकलन गर्ने दोस्रोमा जिल्ला ट्राफिक प्रहरी कार्यालय दाङ छ । उसले ३४ हजार ५ सय ९ सवारी साधनलाई कारबाही गर्दा २ करोड १३ लाख ५ हजार ५ सय राजस्व संकलन गरेको छ । यसैगरी, प्रदेश ५ ट्राफिक कार्यालय बुटवलले १ करोड ५६ लाख ३३ हजार ५ सय राजस्व संकलन गरेको छ ।

ट्रक सबैभन्दा बढी कारबाहीमा

प्रदेश ५ ट्राफिक प्रहरी कार्यालय बुटवलले सार्वजनिक गरेको आर्थिक वर्ष २०७५/०७६ को प्रगति प्रतिवेदनमा सबैभन्दा बढी ट्रक कारबाहीमा परेको उल्लेख छ । कार्यालयका अनुसार एक वर्षको अवधिमा १२ जिल्लामा ९१ हजार ८ सय ४६ ट्रक कारबाहीमा परेका छन् ।

‘यसरी कारबाही पर्नेमा बढी ओभरलोड नै हो,’ लुइँटेलले भने । त्यसैगरी, १२ जिल्लामा २३ हजार ८ सय २९ बस, ३६ हजार ८ सय ४५ जिप तथा कार, २९ हजार ३ सय ३० ट्याक्टर, ५५ हजार ८४ मोटरसाइकल र ६ हजार ८ सय २२ टेम्पो कारबाहीमा परेको कार्यालयको भनाइ छ ।

६ सय बढीको मृत्यु

प्रदेश ५ मा एक वर्षमा सवारी दुर्घटनाबाट ६ सयभन्दा बढीको मृत्यु भएको छ । प्रदेश ५ ट्राफिक कार्यालय बुटवलका अनुसार आर्थिक वर्ष २०७५\७६ मा प्रदेश ५ मा ६ सय ३२ जनाको दुर्घटनाबाट मृत्यु भएको बताएको छ ।

१ हजार ४ सय ४० सवारी दुर्घटनामा परी ६ सय २३ जनाको मृत्यु भएको कार्यालयको भनाइ छ । सबैभन्दा बढी दुर्घटना रुपन्देहीमा भएको छ । रूपन्देहीमा ३ सय ८६ वटा दुर्घटना भए । यस दुर्घटनामा परी १ सय ४३ जनाले ज्यान गुमाएका छन् ।

त्यसैगरी, दाङमा २ सय ५० दुर्घटना हुँदा १ सय ४ जनाले ज्यान गुमाएको कार्यालयको भनाइ छ । मृत्यु हुनेमा ४ सय ४२ पुरुष, १ सय १९ महिला, ३२ बालक र ३० बालबालिका छन् ।

१४ बुँदे कार्ययोजना

दुर्घटना न्यूनीकरणका लागि प्रदेश ५ ट्राफिक प्रहरी कार्यालयले १४ बुँदे कार्ययोजना बनाएर लागू गरेको छ । यसले दुर्घटनामा कमी आउने विश्वास पनि कार्यालयकाे छ ।

कार्ययोजनामा सामुदायिक प्रहरी साझेदारी, ट्राफिक चेकिङ तथा अनुगमन र पार्किङ व्यवस्था छन् । त्यसैगरी, हिट एन्ड रन क्यास पनि कार्ययोजनामा प्राथमिकतामा परेको छ ।

सवारी दुर्घटना गरी भाग्ने सवारी साधनलाई नियन्त्रण गर्ने उद्देश्यसहित हिट एन्ड रन क्यास कार्ययोजना बनाइएको छ ।

त्यसैगरी, कार्ययाेजनामा ट्राफिक व्यवस्था, नागरिक यात्रु सहायकता कक्ष, रिफरेन्स सेन्टरको सञ्चालन तथा थप, रेकर्ड म्यानेज मिन्ट, सडक, फुटपाथ अतिक्रमण, छाडा चौपाया नियन्त्रण, ट्राफिक प्रहरी, कर्मचारीको आचरण व्यवहारमा सुधार र दैविक प्रकोप उद्धार तथा व्यवस्थापन समेटिएकाे छ ।

प्रकाशित मिति: सोमबार, साउन १३, २०७६ २१:३६