कमजोर ब्याटिङले निराश नेपालको केन्या भ्रमण, सुधार देखाउन नयाँ प्रशिक्षकलाई अवसर

कमजोर ब्याटिङले निराश नेपालको केन्या भ्रमण, सुधार देखाउन नयाँ प्रशिक्षकलाई अवसर

A+ A A-

नेपाली क्रिकेट कठिन मोडमा छ भन्दा फरक नपर्ला । २०२२ को टी–२० विश्वकप मात्रै होइन, टी–२० एसिया कपको फाइनल छनोटसम्म नेपालले खेल्न पाएन । अझ आईसीसीको रोड म्याप ‘मिसन विश्वकप २०२३’ अन्तर्गत ग्लोबल छनोटमै पुग्ने सम्भावना कठिन बन्दै गएको छ ।

नेपाली क्रिकेटले पछिल्लो समयमा सोचेको भन्दा धेरै खराब प्रदर्शन गर्दै आइरहेको छ । खेलाडीले जित्दा तारिफ गर्ने र हार्दा यो भएन त्यो भएन भन्ने संस्कार अझै हटेको छैन । खेलाडीले राम्रो खेलेन, त्यही भएर हार्‍यो भन्ने पक्षलाई मात्रै जोड दिइएको छ । तर, नेपाल हार्नुपछाडिका मुख्य कारण खोजिएको छैन । आफूभन्दा कमजोर टिमहरूसँग किन हार्छ त नेपाल ? नेपाल क्रिकेट संघ (क्यान) लाई राम्रोसँग थाहा छ । तर, त्यो कमजोरी सुधार गरेर क्यान अघि बढ्न सक्दैन ।

नेपालले पछिल्लो पटक आईसीसी विश्वकप क्रिकेट लिग टुअन्तर्गत स्कटल्यान्ड र नामिबियासँग सिरिज खेलेको छ । गत जुलाईमा स्कटल्यान्ड उड्नुअघि नेपालको लक्ष्य चार खेलमा तीन खेल जित्ने थियो । तर, एक खेल जितेर आयो । स्कटल्यान्ड, नामिबियासँग खेलेको चारै खेलमा नेपालको ब्याटिङ ध्वस्त छ । पहिलो खेलमा २२० रनको लक्ष्य पछ्याएको नेपाल नामिबियासँग १८० रनमै आउट भयो ।

आरिफ शेखले ५० रन बनाउनबाहेक अन्य ब्याट्सम्यान सस्तैमा आउट भए । स्कटल्यान्डलाई ५ विकेटले पराजित गरे पनि त्यसपछिका दुई खेलमा भने नेपाल झनै नराम्ररी हार्‍यो ।

नेपाली ब्याटसम्यानको ब्याटिङ दयनीय नै देखियो । यो सिरिजमा नेपालले २ सय रन पनि कटाउन सकेको छैन भने ५० ओभर टिकेर खेल्न सकेन । तर, अब ब्याटिङ सुधार भइरहेको नेपाली राष्ट्रिय टिमका उपकप्तान रोहितकुमार पौडेल बताउँछन् । ‘बिस्तारै सुधार भइरहेको छ । नयाँ प्रशिक्षकले ब्याटिङ सुधारका लागि नयाँ टेक्निक सिकाइरहनुभएको छ’, उपकप्तान रोहित भन्छन् ।

खोइ प्रतियोगिता ?

नेपाली खेलाडी विदेश पलायन हुनुको मुख्य कारण नै प्रतियोगिता नहुनु हो । राम्रो सेवासुविधा र प्रतियोगिता भए कुनै खेलाडी विदेशिने छैनन् । खेलाडीको स्तर खस्किनु, नतिजा राम्रो नआउनुको मुख्य कारण पनि प्रतियोगिता आयोजना नहुनु नै हो ।

५० ओभरको प्रतियोगिता वर्षमा एकपटक त्यो पनि ५–६ दिनको गरेर क्रिकेट विकास हुँदैन । ग्रासरुट क्रिकेट शून्य छ । वर्षमा एकपटक ५० ओभरको प्रधानमन्त्री कप गरेर टेस्ट मान्यता पाउने सपना देख्छ क्यान ।

पछिल्लो समय टी–२० प्रतियोगितामा सबैको ध्यान छ । फ्रेन्चाइज टिमदेखि प्राइभेट कम्पनी पनि टी–२० प्रतियोगिता गर्न नै अग्रसर छन् । क्यान टी–२० क्रिकेटमै रमाइरहेको छ । तर, क्यान आफैँले क्रिकेटको धरातल बिर्सिएको छ । घरेलु संरचनालाई राम्रो ध्यान दिएर खेलाडी उत्पादन र ५० ओभरको खेलमा केन्द्रित हुने हो भने कालान्तरमा नेपालले टेस्ट राष्ट्र हुने सपना साकार पार्नेछ । तर, टी–२० क्रिकेट प्रतियोगिता गराएर टेस्ट राष्ट्र बन्छौँ भन्ने लक्ष्य राख्ने हो भने त्यो क्यानको दिवास्वप्न मात्र हुनेछ ।

यो कुरामा खेलाडी पनि सहमत छन् । कति खेलाडीले त लङ फर्म्याटको क्रिकेट प्रतियोगिता खोइ भन्दै क्यानविरुद्ध आवाज नै उठाएका छन् ।

केन्याविरुद्ध पनि बाधक ब्याटिङ !

केन्यासँग नेपालले पाँच खेलको टी–२० र तीन खेलको एकदिवसीय क्रिकेट सिरिज खेल्नेछ । सोमबार काठमाडौंबाट केन्यासँग सिरिज खेल्ने नेपाली टिमलाई बिदाइ गरेको छ ।

बिदाइमा बोल्दै मुख्य प्रशिक्षक मनोज प्रभाकरले नेपालले राम्रो नतिजा ल्याउने बताए । उनी भन्छन्, ‘हामीले ३–४ दिन बाहिर अभ्यास गर्‍यौँ । तर, राम्रो गरेका छौँ । युवा खेलाडीमा प्रतिभा छ । मैले मेरोतर्फबाट बेस्ट दिनेछु ।’

उनी युवा खेलाडीदेखि आकर्षित छन् । अभ्यासका क्रममा युवा खेलाडीले देखाएको प्रतिभा नै टिमको सफल पक्ष हो । प्रशिक्षक मनोज भन्छन्, ‘खेलाडीमा प्रतिभा छ तर त्यसलाई खेलमा कसरी उतार्ने ? प्रयास गरिहेको छु ।’

हुन त यो सिरिज नेपालका लागि निकै महत्त्व राख्छ । तर, कमजोर टिमविरुद्ध नै किन सिरिज भनेर क्यानको आलोचना पनि भयो । यसबारे प्रस्ट्याउँदै क्यानका अध्यक्ष चतुरबहादुर चन्दले केन्यासँगको सिरिज नेपालका लागि वरीयतामा सुधार मौका रहेको बताए ।

उनले भने, ‘केन्यासँगको सिरिजले हामी वरीयतामा सुधार गर्न सक्छौँ । हामीले वरीयतामा सुधार गर्दै गयौँ भने २०२४ को टी–२० विश्वकपमा छनोट हुन पनि सक्छौँ ।’ आईसीसीले अनौपचारिक रूपमा केन्या भ्रमण गर्नुपर्‍यो भन्दै अनुरोध धेरैपटक गरेको पनि अध्यक्ष चन्दले बताए ।

केन्याविरुद्ध नेपालको मुख्य समस्या ब्याटिङमा आउने देखिन्छ । केही दिनअघि मात्रै खराब प्रदर्शन गरेको नेपालको ब्याटिङमा तत्काल व्यापक सुधार आएको छैन । तर, कुशल भुर्तेल टिममा छैनन् । नेपालको ओपनिङमा उनको स्थानमा ज्ञानेन्द्र मल्लले गर्नेछन् । ओपनिङ जोडीले राम्रो गरे नेपालले टी–२० क्रिकेटमा सजिलै १५० कटाउनेछ । तर, ओपनिङ जोडी जम्न नसके पुरानै रोग बल्झिनेछ ।

ज्ञानेन्द्रको पुनरागमनसँगै आशिफ शेख र देव खनालले राम्रो गरे, मध्यक्रममा दीपेन्द्रसिंह ऐरी, पवन सर्राफ, आरिफ शेख, रोहितकुमार पौडेलले धान्नेछन् । फिनिसिङमा आदिल आलम करण केसी र सोमपाल कामीजस्ता अलराउण्डरले धान्नेछन् । नेपालको धेरै खेल बलरले जिताएको उदाहरण पनि छ ।

कप्तान सन्दीप लामिछाने यो केन्या भ्रमण नयाँ खेलाडीका लागि निकै फलदायी हुने बताए । ‘यो भ्रमण हाम्रा लागि निकै महत्त्वपूर्ण छ । नयाँ खेलाडीले खेल्न पाउनेछन् भने पुरानाका लागि आफूलाई सावित गर्ने अवसर पनि हुनेछ’, उनी थप्छन्, हामीले राम्रो गर्नका लागि केही नयाँ गरेका छौँ । अवश्य राम्रो हुनेछ ।’

यता, उपकप्तान रोहित भने ब्याटिङमा चिन्ता भने भएको स्वीकार्छन् । ‘ब्याटिङमा चिन्ता त छ तर अब राम्रो हुन्छ ।’

प्रशिक्षक मनोजको परीक्षा

सबै उत्कृष्ट खेलाडी सफल प्रशिक्षक बन्न सक्दैनन् । तर, असफल खेलाडी भने उत्कृष्ट प्रशिक्षक बन्न सक्छन् । प्रशिक्षक मनोज प्रभाकर उनी राम्रा खेलाडी थिए होलान् । धेरै चर्चा र तारिफ गरिरहनुपर्ने ठाउँ छैन । खेलाडीमा सफल भए पनि उनी प्रशिक्षकमा चिप्लिन सक्छन् ।

विगतमा यस्तो गरेँ, यो सफलता हात पारेँ भन्दा पनि वर्तमानमा कस्तो प्रदर्शन गरेँ भन्ने कुराले क्रिकेटमा अर्थ राख्छ । प्रशिक्षकको करिअरमा उनले पाएको जिम्मेवारी अहिलेसम्मकै ठूलो हो । यसअघि उनले कुनै पनि देशको मुख्य प्रशिक्षक भएर काम गरेका छैनन् ।

दिल्ली क्रिकेट टिमका बलिङ प्रशिक्षक हुँदै राजस्थान क्रिकेट टिमको मुख्य प्रशिक्षक भएका थिए । त्यस्तै, अफगानिस्तान राष्ट्रिय टिमको बलिङ प्रशिक्षक भएर काम गरे ।

मुख्य प्रशिक्षक मनोजलाई पनि यो केन्या भ्रमण आफूलाई सावित गर्ने अवसर हो । यो सिरिजमा उनले खेलाडीलाई कसरी मैदानमा उतार्नेछन्, त्यसले नै उनको भविष्य निर्धारण गर्नेछ । उमेश पटवाल नेपालको मुख्य प्रशिक्षक हुँदा नेपाली खेलाडीको प्रदर्शनमा परिवर्तन चाहन्थे । टिममा खेलाडीसँगै व्यापक ब्याटिङ अर्डरदेखि बलिङसम्म परिवर्तन गराए । तर, खेलाडीको पोजिसन तलमाथि गर्दा टिमले खराब नतिजा निकालिरह्यो ।

अन्ततः उनले नेपाली टिमलाई भताभुंग पारेर राजीनामा दिए । दोस्रोपटक नेपालीका राष्ट्रिय टिम सम्हालेका प्रशिक्षक पुबुदु दासानायके पनि असफल भए । सम्झौता बाँकी रहँदा बीचैमा राजीनामा दिए ।

नेपाललाई स्थायी प्रशिक्षक चाहिएको छ । तर, उमेश पटवालहुँदै डेभ वाटमोर र पुबुदु दासानायकेको दोस्रो कार्यकाल अस्थिर नै रह्यो । एउटै प्रशिक्षकले लामो समयसम्म नेपाली क्रिकेटको जिम्मा लिएर लाग्ने हो भने नतिजा पनि राम्रो आउनेछ । प्रशिक्षक मनोज पनि पटवाल, वाटमोर र दासानायकेजस्तै हुन्छन् कि दृढ संकल्पसहित नेपाली टिम सम्हाल्छन् ? प्रशिक्षक मनोज भन्छन्, ‘राम्रो गर्ने प्रयास गरिरहेको छु । सफल हुन्छु पनि ।’

टी–२० र एकदिवसीय सिरिज नेपालको पोल्टामा आए प्रशिक्षक मनोजको पनि तारिफ हुनेछ । तर, खराब प्रदर्शन भए नेपाली टिममा उनको भविष्य पनि अस्थिर नै हुनेछ । तर, अहिले नै उनका बारेमा यसै भन्न सक्ने अवस्था भने छैन ।

नेपालले सुरुमा केन्यासँग टी–२० सिरिज खेल्नेछ । पहिलो खेल भदौ ९ गते केन्यासँग खेल्नेछ । त्यसपछि १०, १२, १३ र १४ गते दोस्रो, तेस्रो, चौथा र पाँचौँ खेल खेल्नेछ । यसपछि तीन खेलको एकदिवसीय सिरिज खेल्नेछ । पहिलो खेल भदौ १७ दोस्रो १८ र अन्तिम खेल २० गते खेल्नेछ ।

प्रकाशित मिति: सोमबार, भदौ ६, २०७९ २०:०९