आफैँले भोगेको समस्‍या समाधान गर्न विमोदले ल्याएको चुकुल एप, जसले दिएको छ शेयर कारोबारीलाई साथ

आफैँले भोगेको समस्‍या समाधान गर्न विमोदले ल्याएको चुकुल एप, जसले दिएको छ शेयर कारोबारीलाई साथ

A+ A A-

‘समस्याबाट नडाराऊ, बरु त्यसलाई अवसरमा बदल’ यो धेरैले सुनेकै युक्ति हो । एक दिन भोगेको समस्याले जिन्दगीभरका लागि शिक्षा दिन्छ । तर, समस्या के हो र कसरी चिन्ने भन्ने सवालमा भने जानकारी राख्नुपर्ने हुन्छ ।

विमोददेव पन्‍त त्यस्ता युवा हुन्, जसले भोगेका समस्यालाई पहिल्याएर समाधानलाई बिजनेस प्लान बनाए । पहिलो त आफूले भोगेको समस्या धेरैले भोगेको यकिन गरे, त्यसपछि आफूले खोज्ने समाधान सबैका लागि उपयोग हुनुपर्ने विश्लेषण ।

कुनै एक कम्पनीमा जागिरका अलावा शेयरबजारमा पनि कारोबार गर्दै आएका उनले कहिल्यै पनि प्राविधिक विश्लेषण नगरी शेयरमा पैसा हालेनन् । अपवादबाहेक यसरी विश्लेषण गरेका कम्पनीको शेयर उपयुक्त समयमा बेच्न र किन्न सफल भएको उनको दाबी छ ।

अरु शेयर लगानीकर्तालाई पनि उनी सोही सुझाव दिन्छन् । अहिले उनले सबै लगानीकर्तालाई यस्तै विश्लेषण गर्न सहज हुने एप बनाएर आफ्नो बिजनेस अघि बढाएका छन् ।

एउटै कम्पनीको प्राविधिक विश्लेषण गर्न धेरै समय लाग्ने, विश्लेषण गरेर पनि त्यो उपयुक्त पाइएन भने फेरि अन्यको पनि गर्नुपर्‍यो, कहिले धेरै लगानी गर्नुपर्ने हुन्छ । तर, कम्पनीको प्राविधिक विश्लेषण गर्न नपाइएको वा नसकिएका कारणले गर्दा नै शेयर खरिदबिक्रीमा उनले समस्या भोगे ।

त्यसपछि भने उनले अन्तर्राष्ट्रिय शेयर मार्केटहरू पछ्याएर सोही नीति अवलम्बन गर्ने प्रयास गरे । तर, अन्तर्राष्ट्रिय शेयरबजारको तुलनामा नेपालको शेयरबजार र त्यसको विश्लेषण गर्ने सिस्टम डेभलप नभएको पाएपछि उनी त्यसतर्फ केन्द्रित भए ।

अहिले उनले 'चुकुल एप' सञ्चालन गरेका छन् । याे एपले उनलाई त शेयर कारोबारमा सहयोग भएको छ नै, साथै अन्य धेरै लगानीकर्ताहरूले पनि यसबाट लाभ लिन पाएका छन् । कम्पनीको प्राविधिक विश्लेषण थाहा नपाएका कारणले फसेँ भन्ने अवस्था आएको छैन ।

के हो चुकुल ?

यो सामान्यतया शेयरको स्वचालित खरिदबिक्री संकेत गर्ने प्रणाली हो । नेपालका लागि यस्तो संकेत गर्ने पहिलो प्रणाली भएको सञ्चालक पन्तको दाबी छ ।

यसले मुख्‍य रूपमा नेपाल स्टक एक्सचेन्ज नेप्सेको बाई-सेल सिग्नलसम्बन्धी जानकारी दिने गर्छ । दैनिक, साप्ताहिक तथा मासिक रूपमा कारोबार हुने विभिन्न स्टकहरूमध्ये कुनमा बाई सिग्नल (खरिद संकेत) देखिएको छ र कुनमा सेल सिग्नल (बिक्री संकेत) देखिएको छ भन्ने जानकारी दिइन्छ ।

खरिदबिक्री संकेत गर्ने यस्तो सिस्टममा विश्वसनीयता ७० प्रतिशत हुने उनले बताए । याे एपबाट अटोमेटिक ट्रेन्डलाइन, स्विङ लेभल हाई र लोको आइडेन्टिफाई, साप्ताहिक सिग्न‍ल थाहा पाउन सकिन्छ ।

साप्ताहिक रूपमा कतिवटा बिक्री वा खरिद सिग्नल देखा परेका छन्, थाहा पाउन सकिन्छ । अर्ली बाई सिग्नल, बाई सिग्नल, अर्ली सेल सिग्नल र सेल सिग्नल हेर्न सकिन्छ । मार्केट समरी दैनिक तथा साप्ताहिक समीक्षा पनि हेर्न सकिने व्यवस्था यो एपमा गरिएको छ ।

अटोमेटिक बाई र सेल सिग्नलले शेयर कारोबारोका विषयमा निर्णय गर्न सहज गर्छ । त्यस्तै, अटोमेटिक स्टपलस र प्रोफिट बुक पनि देखाउने व्यवस्था गरिएको छ ।

यसको विश्‍वसनीयता ७० प्रतिशत रहने कम्पनीको दाबी छ । यसका आधारमा अर्ली सिग्नलकाे सक्सेस रेट (पहिले गरेको संकेतअनुसारको सफलता) ७३ प्रतिशत छ । कन्फर्म सिग्नल सक्सेस रेट ७६ प्रतिशत छ ।

२५ भन्दा बढी सूचक विश्लेषण

विभिन्न किसिमका प्राविधि विश्लेषण गर्ने क्रममा याे एपले कुनै कम्पनीका २५ भन्दा बढी किसिमका तथ्यांकलाई केलाउने सञ्चालक पन्त बताउँछन् ।

यो विशेष रूपमा आल्गोरिदम प्रणालीमा केन्द्रित भएर गरिन्छ । अहिले शेयरसँग सम्बन्धित कुनै कम्पनीका लागि आवश्‍यक पर्ने २५ भन्दा बढी सूचकलाई आधार मानेर यो विश्लेषण निकालिने पन्तले बताए । हरेक काेणबाट विश्लेषण गर्न सहज भएको उनको भनाइ छ ।

५० लाखको लगानी

नेपालमा पहिलोपटक सुरु गरिएको शेयरको स्वचालित खरिदबिक्री संकेत गर्ने प्रणाली बनाउन पनि ठूलो खर्च लागेको बताउँछन् पन्त । उनका अनुसार यो सिस्टम तयार गर्नका लागि ५० लाखभन्दा बढी लगानी लागेको छ ।

इन्जिनियर तथा अन्य प्राविधिकहरूको करिब ९ महिनाको मिहिनेतबाट यो प्रणाली नेपालमा स्थापना गर्न सफल भएको उनको दाबी छ ।

एप निर्माणको क्रममा १० जनाले नियमित काम गरेको र सफ्ट्वेयर खरिद तथा डेभलप गर्दा ५० लाखभन्दा बढी लगानी लागेको उनले बताएका छन् ।

अब भने एप निर्माणको काम पूर्ण रूपमा सकिएका कारण ठूलो खर्च नलाग्ने उनी बताउँछन् । अहिले नियमित आठ जनाले काम गर्ने गरेका छन् ।

४ महिनामा नै १८ हजार युजर

सञ्चालक पन्तका अनुसार अहिले नै १८ हजार नियमित युजर पुगिसकेका छन् । चुकुल ड्यासबोर्डमा बाई सेलबाहेकका फिचरहरू भने नि:शुल्क उपलब्ध गराइएको छ । जसको प्रयोग १८ हजार प्रयोगकर्ताले गरेका छन् । केही महिनामा नै १ लाखभन्दा बढी युजर हुने उनको दाबी छ ।

यसका साथै बाई सेल हेर्नका लागि निश्‍चित शुल्क तोकिएको छ । यसले प्रत्यक्ष रूपमा कारोबारमा सहयोग पुर्‍याउने भएका कारणले पनि निश्‍चित शुल्क लिइएको उनले बताएका छन् । अहिले शुल्क तिरेर प्रयोग गर्ने प्रयोगकर्ता ५ प्रतिशत छन् । कम्तीमा कुल युजरमध्ये २ प्रतिशले शुल्क तिर्ने युजरकर्ता कायम राख्ने अपेक्षा उनको छ ।

प्रकाशित मिति: सोमबार, भदौ ६, २०७९ १७:१८