भारतलाई हराएर महिला साफ च्याम्पियनसिप जित्ने नेपाली प्रशिक्षककाे चाहना, प्रतिबन्ध फुकुवा हाेला ?

भारतलाई हराएर महिला साफ च्याम्पियनसिप जित्ने नेपाली प्रशिक्षककाे चाहना, प्रतिबन्ध फुकुवा हाेला ?

A+ A A-

कुमार थापा यतिबेला इतिहास रच्ने लक्ष्यमा छन् । दोस्रोपटक राष्ट्रिय महिला टिम सम्हालेका मुख्य प्रशिक्षक थापाको अर्जुन दृष्टि छैटौँ महिला साफ च्याम्पियनसिप बनेकाे छ ।

यही भदौ २१ देखि असोज ३ गतेसम्म काठमाडौंमा महिला साफ च्याम्पियनसिप हुँदैछ । सधैँ उपाधिनजिक पुगेर जित्न नसकेको नेपाल योपटक भने जसरी भए पनि जित्न चाहन्छ । त्यसका लागि राष्ट्रिय टिम तयारीमा जुटेको छ । सन् २०१०, २०१२, २०१४ र २०१९ गरी अहिलेसम्म नेपाल चारपटक महिला साफ च्याम्पियनसिपको उपविजेता बनेको छ ।

सन् २०१६ मा भारतमा भएको साफ च्याम्पियनसिपमा भने तेस्रो भएको थियो । त्यो बेला पनि कुमार थापा नै मुख्य प्रशिक्षक थिए । दोस्रोपटक पाएको अवसरलाई उनी जसरी भए पनि उपाधिमा परिणत गर्न चाहन्छन् । विगतको गल्तीलाई सुधार गर्दै राम्रो नतिजा ल्याउने उनको लक्ष्य छ । तर, अन्तर्राष्ट्रिय फुटबल महासंघ फिफाले अल इन्डिया फुटबल फेडेरेसनलाई प्रतिबन्ध लगाएको छ । प्रतिबन्ध लगाएसँगै भारतले महिला साफ च्याम्पियनसिप खेल्ने कि नखेल्ने भन्ने टुंगो छैन । भारतले प्रतियोगितामा भाग लिनका लागि फिफाले प्रतिबन्ध हटाउनुपर्छ ।

यता, मुख्य प्रशिक्षक थापा भने भारतलाई नै पराजित गर्दै उपाधि जित्ने चाहना रहेको बताएका छन् । ‘भारत आउँदैन भनेर मैले सोचेकै छैन । हामी भारतलाई हराएरै च्याम्पियन बन्ने हो । हाम्रो लक्ष्य भनेकै जोसँग हामी कमजोर छौँ, त्यही टिमलाई हराएर उपाधि जित्ने हो । अनि पो मजा आउँछ त ।’

प्रशिक्षक थापा भारत खेल्न आउनेमा आशावादी छन् । यता, बाँकी अन्य टिमभन्दा बंगलादेश राम्रो भएको उनले विश्लेषण गरे । नेपाल समूह ‘बी’ मा छ । नेपालसँगै भुटान र श्रीलंका छन् । यीमध्ये नेपालले कुनै एक टिमलाई जिते सेमिफाइनलमा स्थान बनाउनेछ । प्रशिक्षक थापा भन्छन्, ‘बंगलादेश पनि राम्रो टिम हो । पाकिस्तान टिम कस्तो छ, थाहा छैन । आठ वर्षपछि खेल्दै छ । माल्दिभ्सको महिला टिम कमजोर नै छ । म चाहन्छु, भारतले खेलोस् । सातै राष्ट्रले भाग लिएको महिला च्याम्पियनसिपको उपाधि जित्ने चाहना छ ।’

समूह ‘ए’ मा भारतसँगै बंगलादेश, पाकिस्तान र माल्दिभ्स छन् । प्रतिबन्धसँगै भारत खेल्न नआउने भएमा समूह ‘ए’ मा तीन टिम हुनेछन् । खेल तालिका पनि परिवर्तन हुनेछ ।

प्रतियोगिताको पहिलो दिन उद्घाटन खेलमा नेपालले भुटानसँग भदौ २१ गते दशरथ रंगशालामा प्रतिस्पर्धा गर्दैछ । नेपालले समूह चरणको अन्तिम खेल श्रीलंकासँग भदौ २७ गते खेल्नेछ । खेल हेर्न आउने दर्शकका लागि अखिल नेपाल फुटबल संघ (एन्फा) ले टिकट दर तोकिसकेको छ । भीआईपीतर्फ ५ सय र साधारण प्याराफिटतर्फ ३ सय तोकिएको छ ।

‘हामीले हाम्रै कमीकमजोरीलाई सुधार गरिरहेका छौँ । त्यस्तो आत्तिनुपर्ने अवस्था छैन । प्लेइङ सेटकै खेलाडी घाइते भएका छन् । तर, अरु खेलाडीले ठाउँ लिइहाल्छ समस्या छैन ।’

बन्द प्रशिक्षणमा अहिले ३३ जना खेलाडी छन् । पुजा राना अभ्यासको क्रममा घाइते भएपछि बाहिरिएका छन् । सावित्रा भण्डारी भने भदौ ११ गते मात्रै राष्ट्रिय टिमको अभ्यासमा सरिक हुनेछिन् । सावित्रा भारतको गोकुलम केरला एफसीमा आबद्ध छिन् । उनले भारतमा व्यावसायिक फुटबल खेलिरहेकी छिन् ।

भदौ १० गते मुख्य प्रशिक्षक थापाले ३४ बाट २३ खेलाडीमा झार्नेछन् । यो नै अन्तिम स्क्वाट हुनेछ ।

बन्द प्रशिक्षणमा रहेका खेलाडी

गोलकिपर: एञ्जिला तुम्बापो सुब्बा, अञ्जना रानामगर, उषा नाथ, कविता विक

डिफेन्डरः हीराकुमारी भुजेल, सिर्जना सिंह ठकुरी, गंगा गुरुङ, अमृता जैशी, गीता राना, पुनम जर्घा मगर, निशा थोकर, सिर्जना चेम्जोङ, विमला विक, समीक्षा घिमिरे

मिडफिल्डरः विमला चौधरी, मञ्जली कुमारी योञ्जन, अनिता बस्नेत, हिमा चौधरी, सविता रानामगर, प्रिती राई, सरु लिम्बू, दीपा राई, दीपा शाही, इन्दिरा राई, सरस्वती ऐर, कुसुम खतिवडा

फरवार्डः सावित्रा भण्डारी, अमिषा कार्की, रेखा पौडेल, अनिता केसी, रश्मीकुमारी घिसिङ, रजनी थोकर, निर्मला विक, चन्द्रा भण्डारी ।

प्रकाशित मिति: आइतबार, भदौ ५, २०७९ १८:४३