जनशक्ति छैनन्, उपकरण टिक्दैनन्

A+ A A-

आर्थिक वर्ष २०७५/०७६ मा वीर अस्पतालमा इमर्जेन्सीसहित ओपीडीमा ४ लाख २२ हजार ८ सय १ जनाले सेवा लिएका छन् । जसमध्ये १३ हजार १ सय ५९ जना भर्ना भएका छन् भने इमर्जेन्सीसहित ६ हजार ८ सय ७७ जनाले उपचार गराएको अस्पतालका निर्देशक केदार सेन्चुरीले बताए ।

अस्पतालको १३०औं वार्षिकोत्सवमा प्रतिवेदन प्रस्तुत गर्दै निर्देशक सेन्चुरीले अस्पतालमा ८ हजार ९ सय ८ जनाले निःशुल्क सेवा लिएको बताए । गरिब तथा असहायले अस्पतालबाट निःशुल्क सेवा लिएका हुन् ।

अस्पतालको प्रतिवेदनअनुसार एक वर्षको अवधिमा १४ जनाले मिर्गौला प्रत्यारोपण गराएका छन् भने ५ हजार ५ सयले स्वास्थ्य बिमामार्फत सेवा लिएका छन् । अस्पतालले प्रत्येक साता निःशुल्क मिर्गाैला प्रत्यारोपण गर्दै आएको छ ।

१९४६ सालमा वीर शमशेरले स्थापना गरेको वीर अस्पताल मुलुककै सबैभन्दा जेठो र ठूलो अस्पताल मानिन्छ । १५ शय्याबाट सुरु भएको अस्पतालमा हाल ४ सय ६० शय्या छन् ।

नेपाल सरकारको पूर्ण स्वामित्वमा रहेको अस्पतालमा जनशक्ति र स्थानको भावमा २४सै घण्टा फार्मेसी सञ्चालनमा नभएको निर्देशक सेन्चुरी बताउँछन् । अस्पतालमा हाल २० वटा मात्रै आईसीयू रहेकोले अझै २० वटा आईसीयूको आवश्यकता औंल्याइएको छ ।

२०५० सालकै दरबन्दी

निर्देशक सेन्चुरीले २०५० सालकै दरबन्दीमा कर्मचारी रहेकोले सेवा उत्पादनमा समस्या भएको बताए । नर्स तथा कर्मचारी कम भएकोले सेवा उपलब्ध गराउन नसकेको उनी बताउँछन् । साथै अस्पतालको आन्तरिक आम्दानीमा वृद्धि गर्न नसकिएको र आम्दानी तथा खर्चको सन्तुलन मिलाउन गाह्रो भएको निर्देशक सेन्चुरी बताउँछन् ।

त्यस्तै, उनले अस्पतालको आन्तरिक स्रोतले कर्मचारी नै धान्न गाह्रो भएकोले थप वित्तीय आवश्यकता भएको बताए ।

खरिद प्रक्रिया छुट्टै चाहिन्छ

अस्पतालको उपकरण खरिद प्रक्रिया ऐनअनुसार खरिद गर्न सहज नभएकोले छुट्टै खरिद ऐन तथा नियमको व्यवस्था आवश्यक भएको निर्देशक सेन्चुरी बताउँछन् । महँगा उपकरण बिग्रँदा खरिद प्रक्रिया लामो हुनाले तत्काल सेवा दिन नसकिने उनको भनाइ छ ।

सरकारी अस्पतालमा उपकरण महँगोः उपेन्द्र यादव

स्वास्थ्य तथा जनसंख्यामन्त्री उपेन्द्र यादवले सरकारी अस्पतालले किन्ने उपकरण महँगो भएको बताएका छन् । उनले निजीभन्दा सरकारी अस्पतालले किन्ने उपकरणकाे मूल्य महँगो हुनुको कारण खोजेका छन् ।

साथै निजी अस्पतालमा वर्षाैं टिक्ने उपकरण सरकारी अस्पतालले एक वर्ष पनि टिकाउन नसकेकोेप्रति खेद प्रकट गरेका छन् । मन्त्री यादव भन्छन्, ‘अस्पतालका उपकरण कहिले बिग्रिएको भन्ने सुनिन्छ, कहिले बिगारिएको भन्ने हल्ला चल्छ त, कहिले ताला लगाइयो भनिन्छ । अस्पतालमा हुने यस्ता धन्दा बन्द गरौं ।’

त्यस्तै, मन्त्री यादवले कर्मचारी समायोजन पछि अनुगमन गरी आवश्यक जनशक्ति राख्ने बताए । अस्पतालमा चिकित्सकले पदोन्नतिको कागज पाए पनि सुविधा नपाएकोप्रति चिन्ता व्यक्त गर्दै कर्मचारी र चिकित्सकका सेवा सुविधा तथा गुनासाेलाई सम्बोधन गर्ने बताए ।

अडिट वार्षिक चाहिन्छः स्वास्थ्य राज्यमन्त्री

स्वास्थ्य राज्यमन्त्री सुरेन्द्रकुमार यादवले अस्पतालको लेखापरीक्षण वार्षिक रुपमा बुझाउनुपर्ने बताएका छन् । साथै कर्मचारी र चिकित्सककाे प्रगति विवरण पनि बुझाउन आग्रह गरेका छन् । राज्यमन्त्री यादवले वीर अस्पताललाई रिफरेबल अस्पताल बनाउनुपर्नेमा जोड दिएका छन् । सामान्य बिरामीलाई नभई संवेदनशील बिरामीलाई मात्र अस्पतालमा उपचार गर्नुपर्ने बताए । नेपाल सरकारको सबैभन्दा बढी सहयोग वीर अस्पताललाई रहेको राज्यमन्त्री यादव बताउँछन् ।

ट्रेड युनियन खारेज गरौंः खगराज अधिकारी

पूर्वस्वास्थ्यमन्त्री खगराज अधिकारीले अस्पतालका आवश्यकता पूरा नगरेसम्म अस्पतालको हालत नसुध्रिने बताए । आवश्यक जनशक्ति, औषधिलगायत संरचना व्यवस्थित नगरे अस्पताल जस्ताकाे तस्तै रहने उनी बताउँछन् । साथै अस्पतालको ओपीडी सेवा अन्य ठाउँमा सञ्चालन गरी अस्पताललाई विशिष्टीकृत गर्नुपर्ने अधिकारीले बताए ।

त्यस्तै, उनि मान्छे र विभागपिच्छे बन्ने ट्रेड युनियन खारेज गर्नुपर्ने बताउँछन् ।

प्रकाशित मिति: सोमबार, साउन १३, २०७६ ०४:०३