राज्य र शासनलाई झकझक्याउने 'प्रकाश'

A+ A A-

फिल्मलाई मनोरञ्जनका दृष्टिकोणले मात्रै हेरिनु हुँदैन भन्ने बहस धेरै हुन थालेको देखिन्छ । फिल्म बौद्धिक सामग्री भएकाले यसलाई भावनात्मक रूपमा पस्कनुपर्छ भन्ने मान्यतालाई आत्मसात् गर्दै फिल्मक्षेत्रमा प्रवेश गर्ने युवापुस्ताको संख्या पनि बढ्दो छ ।

फिल्मलाई विशुद्ध मनोरञ्जनका दृष्टिले भन्दा पनि भावनात्मक रूपमा प्रस्तुत गर्नुपर्छ भन्ने मान्यताका साथ आफू यस क्षेत्रमा आएको बताउँछन्, भदौ १० गतेदेखि प्रदर्शनमा आउन लागेको फिल्म ‘प्रकाश’ का लेखक विकास सुवेदी ।

फिल्म भनेको देशको कानुन, संविधान नै बदल्न सक्ने चीज हो । फिल्मलाई हल्का रूपमा लिनु हुँदैन भन्ने पुस्ताको आगमन भएको छ । जसले फिल्मको गाम्भीर्यतालाई अझै मिहिन ढङ्गले बुझेको नेपाली सिनेमा क्षेत्र हिजोका दिनमा भन्दा परिस्कृत बन्ने विकासको बुझाइ छ ।

विकास भन्छन्, ‘हाम्रो समाज, राजनीति र सामाजिक व्यवस्थालाई हामी सधैँ एउटै अवस्थामा राख्न सक्दैनौँ । समाज क्रमिक विकासको गतिमा अघि बढ्दै जान्छ । हामीले विभिन्न चरणमा राजनीतिक परिवर्तनहरू गरेका छौँ । हरेक राजनीतिक परिवर्तनसँगै समाज पनि बदलिँदै गएको छ । तर, पछिल्लो अवस्थामा जुन खालको राजनीतिक अवस्था, विचार, पद्धतिमा हामी आइपुगेका छौँ । योभित्र पनि लुप्स होलहरू छन् ।’

संविधान, राज्यव्यवस्था, हामीले गरेको परिवर्तन र उपलब्धि पनि आफैँमा पूर्ण भइनसकेका र अहिलेकै अवस्थालाई निरन्तरता दिने हो भने पहिचानको लडाइँले देश नै टुक्रिन सक्ने खतरा रहने भएकाले अब हिंसात्मक विद्रोह हुनुहुँदैन । शान्तिपूर्ण र विचारको मन्थनले नै सबै समस्याको हल विचारको मन्थनले नै गर्नुपर्छ भन्ने सन्देश प्रकाशले दिन खोजेको विकासको भनाइ छ ।

विकासका अनुसार, हामीले पछिल्लो समय केही व्यक्तिलाई, सीमित वा लक्षित जाति वा नश्लका मानिसलाई शासकका रूपमा हेरिरहेका छौँ । कुनै एउटा जातका मानिसलाई जन्मजात नश्लका रूपमा हेरिरहेका छौँ । तर, राज्यले सबै नागरिकलाई समान व्यवहार गर्न सक्नुपर्छ ।

नेपालको मूलभूत समस्या वर्गीय समस्या हो । त्यस कारण गरिबीचाहिँ हाम्रो प्रमुख समस्या हो भन्ने चीजलाई प्रकाश पार्न खोजेको बताउँछन् ।

हाम्रो देशमा हुनेखाने र हुँदा खानेबीच ठूलो खाडल छ । त्यो खाडल नमेटी एकै खालका अर्थात् एउटा नश्लमा जन्मिएका मानिसलाई राज्यले नै दुश्मनजस्तो व्यवहार गर्‍यो भने देश फेरि अर्को अनिश्चित द्वन्द्वमा पुग्न सक्ने विकासको बुझाइ छ ।

उनी थप्छन्, ‘यसलाई अहिले नै हामीले समाधान गरेनौँ भने यसको असर ठूलो र दीर्घकालीन रूपमा पर्न सक्छ र सिङ्गो देशले त्यसको क्षति ब्यहोर्नुपर्छ । त्यस कारण जुन वर्गीय विभेद तथा खाडल छ, त्यसलाई पुर्न ‘प्रकाश’ पुल बन्नेछ । यसले एउटा मार्गदर्शन गर्नेछ ।’

यो साँच्चै मुख्य समस्या नै पो हो कि, यसलाई साँच्चै गम्भीर रूपमा हेर्नुपर्ने पो हो कि भनेर हाम्रा नीति निर्माता र राज्य सञ्चालकहरूमा सन्देश दिनेछ ।

हेर्नुस् भिडियोः