तीन दशकपछि बेलायत कामदार पठाउन श्रम सम्झौता हुँदै, पहिलो चरणमा नर्स

A+ A A-

नेपाल र बेलायत सरकारबीच श्रमिक आपूर्ति गर्न आगामी ६ भदौमा श्रम समझदारी पत्रमा हस्ताक्षर हुने भएको छ । नेपाली नर्सहरूलाई बेलायतमा रोजगारीकाे अवसर प्रदान गर्ने गरी बेलायत र नेपालबीच श्रम समझदारीपत्रमा हस्ताक्षर हुन लागेको श्रम, रोजगार तथा सामाजिक सुरक्षा मन्त्रालयले जानकारी दिएको छ ।

नेपाल र बेलायतबीच जीटूजी (सरकार–सरकारबीचको समझदारी) मोडलमा नेपाली नर्सलाई बेलायतमा रोजगारीका लागि पठाउने गरी सम्झौता हुने भएकाे हाे । दुवै देशका प्रतिनिधि सम्मिलित अध्ययन समितिले समझदारीपत्रकाे मस्यौदालाई अन्तिम रुप दिएपछि हस्ताक्षरकाे मिति तय भएको श्रम मन्त्रालयले जनाएको छ ।

दुई साताअघि नेपालस्थित बेलायती दूतावासले श्रम रोजगार तथा सामाजिक सुरक्षा मन्त्रालयलाई पत्राचार गर्दै भदौ ६ मा सम्झौताको मिति तय भएको जानकारी गराएको श्रम मन्त्रालयका प्रवक्ता डण्डुराज घिमिरेले जानकारी दिए ।

बेलायतको ‘डिपार्टमेन्ट अफ हेल्थ सर्भिस’ र ‘नेसनल हेल्थ सर्भिस’का प्रतिनिधिका साथै काठमाडाै‌मा रहेको बेलायती दूतावासका प्रतिनिधि र नेपाल सरकारका प्रतिनिधिबीच विभिन्न चरणमा छलफल भई श्रम समझदारीपत्रको मस्यौदा भएको थियो । सोही मस्यौदाअनुसार श्रम सम्झौताका लागि सबै आधार तय भएको उनले जानकारी दिए ।

गत साता नै मन्त्रिपरिषद्ले पनि बेलायतमा नर्स पठाउने गरी श्रम समझदारी गर्न स्वीकृति दिइसकेको छ ।

प्राथमिकतामा स्वास्थ्य क्षेत्र

नेपालबाट नर्स मात्र नभई ल्याब असिस्टेन्ट, अनमी, बीएन नर्स, फार्मेसिस्टलगायत पनि पठाउने गरी श्रम सम्झौता हुने प्रवक्ता घिमिरेले जानकारी दिए ।

उनले भने, 'श्रम सम्झौतापछि स्वास्थ्य क्षेत्रमा काम गर्ने गरी कामदार पठाइँदै छ । अहिले यति संख्या भनेर यकिन भएको छैन ।' पहिलो चरणमा कम्तीमा १ हजार नर्स पठाउने गरी सम्झौता हुने उनको भनाइ छ ।

रोजगारीका लागि बेलायत जान चाहने नर्सहरूले इन्टरनेसनल इङ्लिस ल्याङ्ग्वेज टेस्टिङ सिस्टम (आईईएलटीएस) परीक्षामा ६ अंक प्राप्त गर्नुपर्ने गरी सम्झौता हुँदैछ ।

बेलायत जाने स्वास्थ्य जनशक्तिले नर्सिङ काउन्सिलबाट अनुमतिपत्र लिनुपर्ने, ५ वर्षसम्म काम गरेपछि अनिवार्य स्वदेश फर्किनुपर्ने, आईईएलटीएस अनिवार्य गर्नुपर्ने, २० देखि ४५ वर्ष उमेर समूहका नर्स पठाइने, दक्षताका आधारमा उनीहरूले आईईएलटीएसमा ६ अंक ल्याउनुपर्ने सर्त छन् । कम्तीमा साढे दुई वर्ष सरकारले मान्यता दिएका अस्पतालमा काम गरेका नर्सले आईईएलटीएस परीक्षामा सहभागी हुन पाउँछन् ।

बेलायत जाने नर्सले वार्षिक ३६ हजार पाउन्ड स्टर्लिङ (वार्षिक करिब ५५ लाख) नेपाली रुपैयाँभन्दा बढी कमाउन सक्नेछन् ।

तीन दशकदेखि प्रयास

बेलायत सरकारले नेपालबाट २०४९ सालदेखि श्रम सम्झौता गरी कामदार लैजान प्रस्ताव गर्दै आएको थियो । तर, नेपालमा दक्ष कामदार उत्पादन गर्ने तालिम केन्द्र नहुँदा बेलायतले खोजेजस्तो श्रमिक पठाउन नसकिएको श्रम मन्त्रालयले जनाएको छ ।

बेलायतले २०४९ सालयता चारपटक स्वास्थ्य, केयरगिभर, कृषि, निर्माण र उद्योगमा दक्ष कामदार लिने नेपालसँग प्रस्ताव गरेको श्रम मन्त्रालयले जानकारी दिएको छ ।

नेपालमा बेलायतले खोजेजस्तै कामदार उत्पादन गर्ने तालिम केन्द्र नहुँदा श्रम सम्झौताको प्रक्रिया अगाडि नबढेको श्रम मन्त्रालयले गरेको नयाँ गन्तव्य खोजीसम्बन्धी अध्ययनमा औँल्याइएको छ ।

हाल, कृषि, उद्योग, पर्यटन, उत्पादन र निर्माण क्षेत्रमा मौसमी कामदार बेलायत जाने गरेका छन् । गत आर्थिक वर्षमा २ हजारभन्दा धेरै नेपालीहरू मौसमी रोजगारीका लागि बेलायत पुगेको वैदेशिक रोजगार विभागको तथ्यांकमा छ ।

पहिलो विश्वयुद्धदेखि नेपाली युवाहरू ब्रिटिस आर्मीमा भर्ती हुँदै आएका छन् ।

प्रकाशित मिति: शुक्रबार, भदौ ३, २०७९ १४:२०