घुमुवा प्रहरीदेखि गुप्तचर विभागका मुख्य निर्देशककै सूचना संकलक आपराधिक कर्ममा

घुमुवा प्रहरीदेखि गुप्तचर विभागका मुख्य निर्देशककै सूचना संकलक आपराधिक कर्ममा

A+ A A-

सादा पोसाकका ‘घुमुवा’ प्रहरी नै विभिन्न आपराधिक गतिविधिमा संलग्न हुँदै आएको घटना नौलो होइन । घुमुवा प्रहरीकै कारण प्रहरी संगठन आलोचित हुँदै पनि आएको छ ।

केही दिनअघिमात्रै चिनियाँ नागरिक अपहरण प्रकरणमा दुई जना प्रहरी नै पक्राउ परे । अपहरणमा संलग्न ६ मध्ये दुई जना प्रहरी थिए । पक्राउ परेकामध्ये एक जना उच्च अदालत पाटनका न्यायाधीशका पीएसओ कर्ण गुरुङ र अर्का प्रहरी वृत्त बालाजुमा कार्यरत घुमुवा प्रहरी शिव सुनुवार थिए ।

उनीहरूसहित ६ जनाले लाजिम्पाटमा फ्ल्याट भाडामा लिएर बस्दै आएका चिनियाँ नागरिकलाई १८ साउन राति अपहरण गरेर गोंगबुको एक होटलमा बन्दक बनाएर फिरौतीबापत एक करोड रुपैयाँ माग गरेका थिए । त्योबाहेक उनीहरूले चिनियाँ नागरिकको कोठाबाट २६ थान मोबाइल र ८ लाख रुपैयाँसमेत लुटेका थिए । हाल उनीहरूमाथि प्रहरीले शरीर बन्दक तथा अपहरण मुद्दामा अनुसन्धान गरिरहेको छ ।

यसरी आपराधिक गतिविधिमा घुमुवा प्रहरीमात्रै होइन, देशको आन्तरिक र बाह्य सुरक्षाको सूक्ष्म निगरानी राख्ने एक मात्रै निकाय राष्ट्रिय अनुसन्धान विभागका कर्मचारीसमेत संलग्न हुने गरेको खुलेको छ । गुप्तचर विभाग सिंहदरबारमा कार्यरत सूचक हिमालबहादुर थापा लुटपाटको घटनामा गत असार २१ मा पक्राउ परेका थिए ।

अनुसन्धानमा संलग्न प्रहरी अधिकारीका अनुसार बाजुराको बुढीगंगा नगरपालिकाका थापा र कैलाली गोदावरीका दिपक बोगटी 'प्रहरी अधिकारी हुँ' भन्दै अनुसन्धानका लागि भन्दै न्युरोडको एक सुन बनाउने कारखानामा पसेर सुन लुटेर फरार भएका थिए ।

स्थानीयले नियन्त्रणमा लिएर प्रहरीलाई बुझाएपछि थापा गुप्तर विभागको सूचक भएको खुलेको थियो । प्रहरीले उनीहरूको साथबाट ६ थान सुनको औंठी र एक तोला सुनको टुक्रा बरामद गरेको थियो । राष्ट्रिय अनुसन्धान विभागका थापाले आफू गुप्तचर विभागका मुख्य अनुसन्धान निर्देशकको प्रत्यक्ष मातहतमा रहेर सूचना संकलन गर्ने काममा खटिएको बयान अदालतमा दिएका थिए ।

थापा र बोगटी जिल्ला अदालत काठमाडौंको आदेशमा धरौटीमा छुटेका छन् । यसरी घुमुवा प्रहरी र गुप्तचरकै कर्मचारी संलग्न हुनु गम्भीर खतराको विषय भएको पूर्वप्रहरी अधिकारीहरू बताउँछन् । पूर्व प्रहरी नायब महानिरीक्षक डीआईजी हेमन्त मल्लले सादा पोसाकका प्रहरीबारे प्रहरीकै अपराध अनुसन्धान विभागले चासो राख्नुपर्ने र उनीहरूको कामबारे समय समयमा जानकारी लिइराख्नु पर्ने बताउँछन् ।

उनी भन्छन्, ‘सादा पोसाकका प्रहरीको काम भनेको सूचना संकलन गर्ने हो । त्यसमा राम्रो मान्छे पठाउँदा काम राम्रो हुने हो । तर, हामीले कहाँ सादा पोसाकमा काम गर्ने प्रहरीको व्यवहार कस्तो छ ? के गर्दैछ, उनीहरूबारे चासो नराख्दा सादा पोसाकका प्रहरीहरू मिसलिड हुन पुग्छन् ।’

कार्यक्षेत्र हेरेर प्रहरी खटाउँदा त्यसको रिजल्ट राम्रो आउने उनको भनाइ छ । राष्ट्रिय अनुसन्धान विभागका एक अधिकारीका अनुसार गुप्तचर विभाग राजनीतिले थिलोथिलो पारिसकेकाले मुख्य कामभन्दा अवैध धन्दामा लागेको बताउँछन् ।

‘राजनीतिक पहुँचको बलमा गुप्तचरमा छिरेकाहरूबाट विभाग नै जोखिममा छ । मुख्य अनुसन्धान निर्देशककै सूचना संकलन गर्नेको गतिविधि यस्तो देखिन्छ भने जुनियरको मातहतमा काम गर्नेको के होला ?,’ एक अधिकारीले भने ।

प्रकाशित मिति: शुक्रबार, भदौ ३, २०७९ १३:४८