बुटवलको बजेट खर्च उत्साहजनक

A+ A A-

बुटवल उपमहानगरपालिकाले गत आर्थिक वर्षमा पुँजीगततर्फ ७० प्रतिशत र चालूतर्फ ८४.४३ प्रतिशत बजेट खर्च गरेको छ ।

उपमहानगरपालिकाले गत आर्थिक वर्षमा १ अर्ब ६६ करोड ५० लाख १६ हजार रुपैयाँको बजेट ल्याएको थियो । जसमध्ये पुँजीगततर्फ ९२ करोड ९६ लाख ९ हजार बजेट छुट्याएकोमा ६४ करोड ५० लाख ३३ हजार खर्च गरेको छ भने चालूतर्फ ७३ करोड ५४ लाख ७ हजार बजेट रहेकोमा ६७ करोड ५ लाख ५२ हजार खर्च गरेको छ ।

गत आर्थिक वर्षमा नगरको आन्तरिक आम्दानी ४४ करोड ३८ लाख ६० हजार अनुमान गरिएकोमा ४४ करोड ३१ लख २१ हजार भएको बुटवल उपमहानगरपालिकाका सूचना अधिकारी लेखनाथ पोखरेलले जानकारी दिए ।

आर्थिक विकासतर्फ ५ करोड ९६ लाख ४५ हजार बजेटमा २ करोड ९२ लाख ५५ हजार खर्च गरेको छ । जसमा वित्तीय क्षेत्र, सहकारी, पर्यटन, उद्योग तथा वाणिज्य र कृषि क्षेत्र समावेश छन् ।

सामाजिक विकासतर्फ ३४ करोड २० लाख ५८ हजार बजेटमा ३१ करोड ७ लाख ३३ हजार खर्च भएको छ । यसअन्तर्गत लैंगिक समानता तथा सामाजिक समावेशीकरण, संस्कृति प्रवर्धन, खानेपानी तथा सरसफाइ, स्वास्थ्य र शिक्षा क्षेत्र छन् ।

त्यसैगरी, पूर्वाधार विकासतर्फ ८२ करोड १४ लाख ३९ हजार बजेटमा ६० करोड ४ लाख ८३ हजार खर्च भएको छ । उपमहानगरले यसै बजेटबाट ऊर्जा प्रवर्धन, भवन तथा सहरी विकास, सिँचाइ, सडक तथा पुल (झोलुंगे पुलसमेत) र खानेपानीको पूर्वाधार विकासमा खर्च गरेको छ ।

वातावरण तथा विपद् व्यवस्थापनतर्फ ५ करोड ३२ लाख ८० हजार बजेट रहेकोमा ३ करोड ३ लाख ३ हजार खर्च गरेको छ । यसअन्तर्गत वारुण यन्त्र सञ्चालन, विपद् व्यवस्थापन, जल उत्पन्न प्रकोप नियन्त्रण, फोहोर मैला व्यवस्थापन, जलवायु परिवर्तन, वातावरण संरक्षण, जलाधार संरक्षण, वन तथा भू–संरक्षण र ल्यान्ड फिल साइट छन् ।

संस्थागत विकास तथा सेवा प्रवाहतर्फ ३ करोड ३३ लाख १९ हजार बजेटमध्ये १ करोड ६९ लाख ७५ हजार बजेट खर्च भएको छ ।

उपमहानगरले गत आर्थिक वर्षमा प्रधानमन्त्री रोजगार कार्यक्रममा ५४ लाख ५४ हजार खर्च गरेको छ, जसका लागि १ करोड ९ लाख ९६ हजार बजेट छुट्याइएको थियो । त्यस्तै, सामाजिक सुरक्षा कार्यक्रममा १३ करोड ९४ लाख ४५ हजार बजेट छुट्याएकोमा १३ करोड ५८ लाख ९८ हजार खर्च भएको पोखरेलको भनाइ छ ।

बुटवल उपमहानगरले कार्यालय सञ्चालन तथा प्रशासन सञ्चालनमा ३३ करोड ३७ लाख ५७ हजार खर्च गरेको छ भने कर्मचारीको पारिश्रमिक, सुविधा र कर्मचारीकै सामाजिक सुरक्षामा १२ करोड ३ लाख २ हजार खर्च गरेको छ ।

उपमहानगरले कार्यालय व्यवस्थान र सञ्चालनमा पछि भवन तथा सहरी विकासमा खर्च गरेकाे छ । जसमा २५ करोड ७ लाख ३९ हजार खर्च भएको छ भने १८ करोड ८३ लाख ६९ हजार रुपैयाँको सडक तथा पुल निर्माण तथा मर्मत गरेको दाबी गरेको छ ।

उपमहानगरले खानेपानीको पूर्वाधार विकासमा ८१ लाख ८४ हजार खर्च गरेको बताएको छ । तर, खानेपानीको समस्यामा केही सुधार आएको भने देखिँदैन ।

उपमहानगरले आर्थिक वर्ष २०७६\०७७ का लागि १ अर्ब ९० करोडको बजेट प्रस्तुत गरेको छ ।

प्रकाशित मिति: सोमबार, साउन १३, २०७६ ०१:२२