चुनावका लागि असोज अन्तिम साताबाट म्यादी प्रहरी भर्ना गर्ने तयारी

फाइल तस्वीर

A+ A A-

४ मंसिरमा हुने प्रदेश र प्रतिनिधिसभाको चुनावका लागि प्रहरीले असोज अन्तिम साताबाट म्यादी प्रहरीको भर्ना लिने तयारी गरेकाे छ । प्रदेश र प्रतिनिधिसभाका लागि प्रहरीले १ लाख २० हजार म्यादी प्रहरी आवश्यक रहेको प्रस्ताव गृह मन्त्रालयलाई पठाइसकेको छ ।

तर, गृह मन्त्रालयले साे प्रस्तावबारे केही जानकारी गराएको छैन । प्रहरी प्रधान कार्यालयको प्रस्तावबारे गृह मन्त्रालयले अर्थ मन्त्रालयसँग समन्वय गर्नुपर्ने हुन्छ ।

प्रहरी प्रधान कार्यालयका एक उच्च अधिकारीले अर्थ र गृह मन्त्रालयबाट प्रहरीले पठाएको प्रस्ताव स्वीकृत भए असोज अन्तिम साताबाट चुनावका लागि म्यादी प्रहरी भर्ना लिने तयारी आफूहरूले गरेको बताए ।

‘अहिलेदेखि नै म्यादी भर्ना गर्दा आर्थिक भार पर्ने हुँदा हामीले करिब ४५ दिनदेखि तलब सुविधा पाउने गरी मात्र भर्ना गर्ने कि भन्ने गृहकार्य गरेका हौँ । सम्भवत: असोज अन्तिमबाट भर्ना प्रक्रिया थालिन्छ,’ ती अधिकारीले भने ।

गृह र अर्थ मन्त्रालयले चुनावका लागि आवश्यक पर्ने म्यादी प्रहरीको संख्या निर्धारण गर्छ । यसअघि प्रहरीले स्थानीय चुनावमा समेत एक महिनाअघि मात्रै १ लाख म्यादी प्रहरी भर्ना गरेको थियो ।

त्यही शैली अपनाएर प्रदेश र संघको चुनावमा पनि एक महिनाको तलब सुविधा दिएर म्यादी प्रहरी भर्ना गर्ने तयारी सरकारको छ ।

म्यादी प्रहरीबाहेक प्रहरीले आवश्यक १ हजार ७ सय नयाँ गाडीसमेत आवश्यक परेको प्रस्ताव गृह मन्त्रालयलाई पठाएको छ । स्थानीय चुनावमा पनि प्रहरीले १२ सय गाडी भाडामा प्रयोग गरेको थियो ।

संघ र प्रदेशको चुनावमा निर्वाचन केन्द्रहरू थपिने भएपछि म्यादीको संख्या र सवारीसाधनसमेत बढी आवश्यक हुने प्रहरीको भनाइ छ ।

प्रहरी प्रवक्ता डीआईजी टेकप्रसाद राईले प्रहरीले पठाएको प्रस्ताव गृह मन्त्रालयबाट स्वीकृत भएर आएपछि मात्रै सबै कुराको जानकारी हुने बताए ।

गृह मन्त्रालयका सूचना अधिकारी वसन्त भट्टराईले म्यादी प्रहरी भर्नाका लागि अर्थ मन्त्रालयसँग बजेटको सुनिश्चितताबारे छलफल गरिरहेको बताए ।

‘हामीले एक महिनाको तलब सुविधा पाउने गरी अर्थसँग म्यादी प्रहरी भर्नाबारे छलफल गर्दैछौँ । सकेसम्म १ लाख २० हजार नै भर्ना गर्ने भन्ने हाम्रो प्रयास छ,’ भट्टराईले भने ।

जनशक्ति र सवारीसाधनबाहेक प्रहरीलाई चुनावका लागि प्रयोग गर्न साना हतियारको समेत अभाव छ । स्थानीय चुनावमा प्रहरीले नेपाली सेनासँग २ हजार पेस्तोल भाडामा लिएको थियो । संघ र प्रदेशको चुनावमा समेत प्रहरीले पेस्तोल सेनाबाट नै माग्ने जनाएको छ ।

हतियार खरिद प्रक्रिया झन्झटिलो भएका कारण हतियार भने सेनासँगै मान्ने तयारी प्रहरीले गरेको हो । प्रहरी प्रधान कार्यालयको केन्द्रीय निर्वाचन सेलले ७७ वटै जिल्लामा आवश्यक पर्ने साधनस्रोतबारे प्रहरी प्रधान कार्यालयलाई जानकारी गराउन पत्राचार गरेको छ ।

केन्द्रीय निर्वाचन सेलका लागि प्रहरी प्रधान कार्यालयले कार्यविभागका प्रमुख एआईजी सहकुलबहादुर थापालाई जिम्मा दिएको छ ।

प्रकाशित मिति: बिहीबार, भदौ २, २०७९ १७:१०