गठबन्धनसँग हार्ने मनोविज्ञानले एमाले मकवानपुरमा घटे उम्मेदवारका आकांक्षी

गठबन्धनसँग हार्ने मनोविज्ञानले एमाले मकवानपुरमा घटे उम्मेदवारका आकांक्षी

A+ A A-

३० वैशाख २०७९ मा भएको दोस्रो स्थानीय तह सदस्य निर्वाचनमा ठूलो धक्का लागेको नेकपा एमाले मकवानपुरमा आगामी निर्वाचनमा आकांक्षी घटेका छन् । आगामी ४ मंसिरका लागि प्रतिनिधिसभा र प्रदेशसभाको निर्वाचन घोषणा हुनुअगावै एमालेले मकवानपुरका १०वटै स्थानीय तहमा पार्टी सुदृढीकरण अभियान चलाउँदै आएको छ ।

निर्वाचनको तयारी गरिरहे पनि पार्टीभित्रै गठबन्धनसँग हार्ने मनोविज्ञानका कारण आकांक्षीहरू घटेको बताइएको छ । एमाले मकवानपुरमा आकांक्षीहरू नदेखिएको चर्चा हुन थालेको हो ।

गठबन्धनको नेपाली कांग्रेस, नेकपा माओवादी केन्द्र, नेकपा (एकीकृत समाजवादी)भित्र आगामी निर्वाचनका लागि आकांक्षीहरू देखिरहेका छन् । राजेन्द्र लिङ्देन नेतृत्वको राप्रपा र कमल थापा अध्यक्ष रहेको राप्रपा नेपालमा पनि आकांक्षीहरू खुल्न थालिसकेका छन् । तर, एमालेभित्र भने आकांक्षी नदेखिएको एक जिल्ला सदस्यले शिलापत्रलाई जानकारी दिए ।

२०७४ सालको निर्वाचनमा जिल्लाका १० पालिकामध्ये बहुमत स्थानीय तह र जिससमा एकल निर्वाचन जितेको एमाले हाल सानो उपलब्धिमा चित्त बुझाउन बाध्य छ । अघिल्लो निर्वाचनमा हेटौँडा उपमहानगरपालिका, मकवानपुरगढी, मनहरी, कैलाश, इन्द्रसरोबर र भीमफेदी गाउँपालिकामा एमालेबाट अध्यक्ष र उपाध्यक्ष नै जितेका थिए ।

हाल यी स्थानीय तहहरुमध्ये इन्द्रसरोबरमा एमालेका अध्यक्ष/उपाध्यक्ष मात्रै जितेका थिए भने भीमफेदीमा अध्यक्ष मात्रै विजयी भए । बाँकी स्थानीय तहमा एमाले पराजित भयाे । २०७४ मा बागमती र बकैया गाउँपालिकामा उपाध्यक्ष एमालेले जितेको थियो । त्यो उपलब्धि पनि एमालेले हाल गुमाएको छ ।

अघिल्लो निर्वाचनबाट एकल बहुमत बनाएको जिल्ला समन्वय समिति मकवानपुरमा एमालेले हाल पराजय व्यहोर्‍यो । नेपाली कांग्रेस, नेकपा माओवादी केन्द्र, नेकपा (एकीकृत समाजवादी), जनता समाजवादी पार्टीलगायतको गठबन्धनसँग एमाले साना दललाई साथमा लिएर निर्वाचनमा लडेको थियो । तर, एमालेले अपेक्षा गरेभन्दा फरक नतिजा आयो ।

३० वैशाखमा भएको स्थानीय तह निर्वाचनमा एमालेलाई उम्मेदवार टुंग्याउन हम्मेहम्मे परेको थियो । हेटौँडा उपमहानगरमा मात्रै ९ जनाले दाबी गरेका थिए । एमाले केन्द्रीय सदस्य तथा जिल्ला इञ्चार्ज रामेश्वर राना, जिसस मकवानपुरका निवर्तमान प्रमुख रघुनाथ खुलाल, पार्टी अध्यक्ष एकालाल श्रेष्ठलगायतले मेयरमा दाबी गरेका थिए । तर, आगामी प्रतिनिधिसभा र प्रदेशसभा निर्वाचनमा स्थानीय तहमा जसरी आकांक्षीहरु नदेखिने एक जिल्ला सदस्यले शिलापत्रलाई बताए ।

‘स्थानीय तह निर्वाचनमा उम्मेदवार छान्न धेरै गाह्रो भएको थियो । ठूलादेखि सानासम्म उम्मेदवार बन्न लाग्नु भएको थियो । अबको निर्वाचनमा यस्तो हुँदैन । अहिलेसम्म कसैले चासो देखाएको हामीलाई थाहा छैन्', उनले भने । एमाले मकवानपुरमा गठबन्धनसँग निर्वाचन लड्दा विजयी हुन नसक्ने मनोविज्ञानको असर आगामी प्रतिनिधिसभा र प्रदेशसभा निर्वाचनमा परेको आकलन छ ।

मकवानपुरमा वर्षौंदेखि एमालेबाट निर्वाचन जित्दै आएका प्रतिनिधिसभा क्षेत्र नम्बर १ का सांसद तथा अर्थ विकास समिति सभापति कृष्णप्रसाद दाहालले नै आगामी निर्वाचनमा सहभागी नहुने आफू निकटका नेताहरूलाई बताएका छन् । एमाले मकवानपुरका एक सचिवालय सदस्यका अनुसार दाहालले चुनाव लड्न अनिच्छा देखाएका हुन् । दाहाल १ नम्बर क्षेत्रका प्रभावशाली नेता हुन् । उनले अघिल्लो निर्वाचनमा राप्रपा नेपालका अध्यक्ष कमल थापालाई पराजित गरेका थिए ।

‘गठबन्धनसँग निर्वाचन हारिने डरले पनि हाम्रो पार्टीमा विगतमा जस्तो उम्मेदवारका आकांक्षीरू देखिएका छैनन् । पहिला निर्वाचन घोषणा भएपछि ठूलो हल्लाखल्ला हुन्थ्यो । अहिले सुनसान छ', ती जिल्ला सदस्यले भने । निर्वाचनमा ठूलै रकम खर्च गर्नुपर्ने अवस्था रहेको र जित्ने सम्भावना कम रहेकोले आकांक्षीहरू नदेखिएको उनले बताए ।

मकवानपुरको प्रतिनिधिसभा २ नम्बर क्षेत्रबाट एमाले बागमती प्रदेशका उपमहासचिव महेश बर्तौलाले दाबी गरिरहेका छन् । सम्भवतः आगामी निर्वाचनमा सार्वजनिक रूपमै एमालेबाट दाबी गर्ने बर्तौला पहिलो हुन् । हालसम्म एमालेका कुनै पनि नेताहरूले निर्वाचन लड्ने सार्वजनिक रूपमा घोषणा गरिसकेका छैनन् । बर्तौलाले पार्टीले विश्वास गरेर टिकट दिए उम्मेदवार बन्ने बताए । उनले पनि पार्टीभित्र पुराना नेताहरू आगामी निर्वाचनमा आकांक्षीका रूपमा अघि नसरेको बताए ।

एमाले केन्द्रीय सदस्य तथा जिल्ला इञ्चार्ज रामेश्वर राना भने आकांक्षी नदेखिएको विषयमा सत्यता नरहेको बताउँछन् । उनले पार्टी उम्मेदवार छनौटको प्रक्रियामै प्रवेश नगरेको र स्थानीय तहमा पार्टी सुदृढिकरण अभियान सञ्चालन भइरहेकोले आकांक्षीको विषयमा जानकारी नभएको बताए । ‘आकांक्षी नै नभएको विषय बजारको चर्चा र हल्ला हो । त्यसमा कुनै सत्यता छैन', रानाले भने । उनले एमाले बलियो ढंगले विजयी भावनाका साथ निर्वाचनमा अगाडि बढ्ने बताए ।

प्रकाशित मिति: बुधबार, भदौ १, २०७९ ०७:३९