काठमाडौं–५ मा गठबन्धनभन्दा एमाले बलियो, ईश्वर पोखरेललाई परिचित अनुहारकाे डर

काठमाडौं–५ मा गठबन्धनभन्दा एमाले बलियो, ईश्वर पोखरेललाई परिचित अनुहारकाे डर

A+ A A-

आगामी ४ मंसिरमा हुने प्रतिनिधिसभाकाे निर्वाचनमा काठमाडौं क्षेत्र नम्बर ५ बाट उम्मेदवार बन्न चाहनेहरूको सूची लामाे हुँदै गएकाे छ । बौद्धिक जमात बलियो रहेको मानिएको याे क्षेत्रमा २०७४ को निर्वाचनमा नेकपा एमाले वरिष्ठ उपाध्यक्ष ईश्वर पोखरेलले नेपाली कांग्रेसका नेता डा. प्रकाशशरण महतलाई पराजित गरेका थिए ।

अहिले पनि पोखरेलको आधार बलियो रहेको दाबी एमालेकाे छ । गत बैशाखकाे स्थानीय तह निर्वाचनले पनि एमालेकाे तुलनामा अन्य दल कमजोर देखाएका छन् । यद्यपि अबकाे चुनावमा गठबन्धनले कसलाई उम्मेदवार बनाउनेछन् त्यसले प्रतिस्पर्धाकाे निर्धारण हुनेछ । साेही क्षेत्रबाट २०७० को संविधानसभा निर्वाचनमा कांग्रेसका नरहरि आचार्यले ईश्वर पोखरेललाई पराजित गरेका थिए ।

स्थानीय तहको नतिजाले के भन्छ ?

काठमाडौं– ५ मा काठमाडौं महानगरपालिकाकाे वडा २, ३, ४ र ५, बूढानीलकण्ठ नगरपालिकाको वडा ३,४,५,६ र ७ का साथै टोखा नगरपालिकाको २,३,४,५, ६ र ७ वडा पर्छन् । यी तीनवटा नगरपालिकामा प्रमुखको नतिजा हेर्ने हो भने दुईवटा वडामा एमाले र एउटामा स्वतन्त्र उम्मेदवार विजयी भएका छन् । वडाध्यक्षको चुनावी परिणाम हेर्ने हाे भने पनि एमाले बलियो देखिन्छ । एमालेले ११ वटा वडा जितेको छ । कांग्रेसले तीनवटा र स्वतन्त्रले दुईवटा वडा जितेका छन् ।

वडाध्यक्ष पदमा प्राप्त मत

एमाले : १९ हजार ७ सय ३
कांग्रेस : १४ हजार ८ सय ५३
राप्रपा : २ हजार ८ सय २२
माओवादी : १ हजार ८ सय २७
नेकपा एस : १ हजार १ सय ६१
स्वतन्त्र : ७ सय ८१
अन्य : ४ सय ७१

दलका उम्मेदवारले एक्लाएक्लैले पाएकाे मतका आधारमा एमाले निकै बलियो छ । दोस्रो हुने कांग्रेससँगै तुलना गर्ने हो भने पनि एमालेले प्राप्त गरेकाे मत ५ हजारभन्दा बढी छ ।

गठबन्धनभन्दा पनि धेरै मत, एमाले, स्वतन्त्र र अन्यको मत

सत्तारुढ दलहरूले प्राप्त गरेकाे मतभन्दा पनि एमालेकाे मत ज्यादा छ । अहिलेकाे स्थिति ४ मंसिरमा दाेहाेरिँदा एमालेले चुनाव जित्न सक्छ । तर, निर्वाचनमा उम्मेदवार काे उठ्छ भन्नेले अर्थ राख्छ ।

एमाले : १९ हजार ७ सय ३
सत्ता गठबन्धन (कांग्रेस+एस+माओवादी‌+जसपा) : १७ हजार ९ सय ६
अन्य : ३ हजार २ सय ९३
स्वतन्त्र : ७ सय ८१

यो मतका आधारमा एमालेको गठबन्धनभन्दा २ हजारभन्दा बढी मत रहेको छ ।

ईश्वरसँग कसले गर्दैछ प्रतिस्पर्धा ?

स्थानीय तहको निर्वाचनको आधारमा स्पष्ट रूपमा एमाले बलियो देखिएको छ । वरिष्ठ उपाध्यक्ष ईश्वर पाेखरेलकाे क्षेत्र भएकाले एमालेले सम्भवतः उनैलाइ दाेहाेर्‍याउनेछ । तर, यसपटक कांग्रेस उम्मेदवारको आकर्षण अर्थपूर्ण रूपमा याे क्षेत्रमा देखिएकाे छ । कांग्रेसबाट डा. प्रकाशशरण महत, विश्‍वप्रकाश शर्मा, नैनसिंह महर र स्वर्णिम वाग्लेको नाम चर्चामा छ । धेरैका लागि भने यो क्षेत्र वैकल्पिक पनि मानिएको छ ।

अघिल्लो निर्वाचनमा पराजित भएका महतको मुख्य दाबी रहेको छ । तर, नेता व्यवस्थापन गर्ने सवालमा भने उनलाई नुवाकोटको पनि विकल्प देखाइएको छ । अघिल्लो निर्वाचनमा झापा १ बाट पराजित महामन्त्री विश्वप्रकाश शर्माका लागि पनि काठमाडौं– ५ वैकल्पिक निर्वाचन क्षेत्र हो । अहिले सत्ता गठबन्धनका कारण झापामा राम कार्की उठ्ने स्थितिमा शर्मा काठमाडाैं आउन सक्छन् । झापा १ नपाएको खण्डमा भने शर्मालाई यो क्षेत्रबाट उठाउने तयारी गरिएको छ ।

नेविसंघका पूर्वअध्यक्ष नैनसिंह महर पनि यसै क्षेत्रबाट निर्वाचन लड्न दबाब बढाइरहेका छन् । उनले कैलाली–४ माग गरिरहेका छन् तर त्यहाँ नपाए उनकाे राेजाइ काठमाडौं– ५ हाे ।

राष्ट्रिय योजना आयोगका पूर्वउपाध्यक्षसमेत रहेका डा स्वर्णिम वाग्ले पनि काठमाडौं– ५ मा आफूलाई योग्य देखिरहेका छन् । उनले काठमाडौं–५, चितवन वा गोरखामध्ये कुनै एक क्षेत्रबाट चुनाव लड्ने तयारी गरिरहेकाे बताएका छन् । एग्राे टुरिजम व्यवसायी विजय कँडेलले साेमबार मात्र उम्मेदवारी घाेषणा गरे ।

यस्तै, स्वतन्त्र उम्मेदवार रञ्जु दर्शनाले उम्मेदवारी घोषणा गरिसकेकी छन् । उनले २०७४ सालकाे स्थानीय तहकाे चुनावमा काठमाडाैं महानगरकाे मेयरमा प्रतिस्पर्धा गरेर २३ हजार बढी मत ल्याएकी थिइन् ।

काठमाडौं– ५ किन पर्छ रोजाइमा ?

मत विश्लेषण गर्ने हो भने काठमाडौं–५ एमालेका लागि सुरक्षित क्षेत्र मानिन्छ । तर, कांग्रेसका नेताहरूसहित परिचित अनुहार पनि यो क्षेत्रबाट लड्ने तयारी गरिरहेका छन् । यहाँबाट संविधानसभाको निर्वाचनमा दुवैपटक नरहरि आचार्य विजयी भएका थिए । त्यसपछिकाे चुनावमा भने एमालेका ईश्वर पोखरेल विजयी भए ।

यो क्षेत्रमा उम्मेदवारकाे आकर्षण बढी हुनुको कारण विवेकको मत बढी आउँछ कि भन्ने अनुमानले काम गरेकाे बताउँछन् राजनीतिक विश्लेषक गेजा शर्मा वाग्ले । 'काठमाडाैं–५ लाई बाैद्धिक मतदाता बढी भएको क्षेत्रका रूपमा लिइन्छ । योग्य र बौद्धिक उम्मेदवारले आफ्नो एजेन्डा राखेर सहज मत लिन सक्ने क्षेत्र पनि मानिने भएको कारण आकर्षण बढेकाे हुन सक्छ', उनी भन्छन् ।

प्रकाशित मिति: सोमबार, साउन ३०, २०७९ १३:५७