लुम्बिनी प्रदेश सरकारका प्रवक्ता भन्छन्- संघीयता कार्यान्वयन गराउन आन्दोलनमै लाग्नुपर्ने भयो

लुम्बिनी प्रदेश सरकारका प्रवक्ता भन्छन्- संघीयता कार्यान्वयन गराउन आन्दोलनमै लाग्नुपर्ने भयो

A+ A A-

कुलप्रसाद केसी लुम्बिनी प्रदेशको मुख्यमन्त्री भएको १ वर्ष पुगेको छ । प्रदेश सरकारले १ वर्ष पूरा गरेको अवसरमा जानकारी दिन आइतबार पत्रकार सम्मेलन गरिएको थियो ।

कार्यक्रममा सरकारका प्रवक्ता एवं सञ्चारमन्त्री तिलकराम शर्माले संघीयता कार्यान्वयन हुन नसकेको कुरामा जोड दिएर बोल्न थाले । उनले लुम्बिनी प्रदेश सरकारले पनि मधेश प्रदेश सरकारले सुरु गरेको आन्दोलनमा ऐक्यबद्धता जनाउनुपर्ने अवस्था आएको बताए ।

मन्त्री शर्माले संघीयता कार्यान्वयन हुन नसकेकै कारण प्रदेश सरकारले सशक्त रूपमा काम गर्न नसकेको बताए । संविधानमा उल्लेख भएका अधिकार नदिए मधेश प्रदेशले सुरु गरेको आन्दोलनमा ऐक्यबद्धता जनाउने उनको चेतावनी थियो । प्रदेशहरूलाई संघले अधिकार नदिए अदालतको ढोका ढकढकाउन बाध्य हुने उनले बताए ।

गठबन्धनका शीर्ष नेताहरूलाई भेटेर प्रदेशलाई संविधानले दिएका अधिकार कार्यान्वयन गर्नका लागि ध्यानाकर्षण गराएको शर्माको भनाइ थियो । संघ सरकारभन्दा प्रदेश सरकारले बजेटको कार्यान्वयन गर्न सक्षम रहेको उनको दाबी छ । पूर्ण अधिकारसहित काम गर्न पाए संघ सरकारले भन्दा राम्रो काम गर्ने उनको दाबी थियो ।

संघीयता कुनै व्यक्तिको चाहनाले नआएको तर्क गर्दे शर्माले नेपालको आवश्यकताले संघीयता आएको र विभिन्न बाहानाबाट प्रदेशलाई कमजोर बनाउने काम भएको टिप्पणी गरे ।

५२ मुख्य उपलब्धी

पाँच दलीय गठबन्धनबाट मुख्यमन्त्री कुलप्रसाद केसीको नेतृत्वमा प्रदेश सरकार गठन भएको एक वर्षमा ५२ वटा उपलब्धी हासिल गरेको प्रदेश सरकारले दाबी गरेको छ ।

गत आर्थिक वर्षको असोजमा प्रतिस्थापना बजेट ल्याई ७४.२० प्रतिशत बजेट कार्यान्वयन गरी ५.६३ प्रतिशत आर्थिक वृद्धिदर र १ हजार १ सय ३ यूएस डलर प्रतिव्यक्ति आय र राष्ट्रिय कुल गार्हस्थ उत्पादनमा १४.१ प्रतिशत योगदान दिएको प्रदेश सरकारले जनाएको छ ।

यस्तै सिकल सेलको निदान र उपचारको लागि तराईका ६ वटै जिल्लाका ८ ओटा अस्पतालमा सिकल सेल कर्नरको स्थापना गरिएको सरकारले जनाएको छ ।

गत वर्ष साउन २८ गते पाँच दलीय गठबन्धनको नेतृत्व गर्दै नेकपा माओवादी केन्द्र संसदीय दलका नेता कुलप्रसाद केसी लुम्बिनी प्रदेशको मुख्यमन्त्री पदमा नियुक्त भएका थिए ।

प्रकाशित मिति: आइतबार, साउन २९, २०७९ १९:११