पटेल दाजुभाइको अपराध : बहिनीका प्रेमीको हत्यापछि रक्सौलको रेलस्टेसन पुर्‍याए शव

पटेल दाजुभाइको अपराध : बहिनीका प्रेमीको हत्यापछि रक्सौलको रेलस्टेसन पुर्‍याए शव

A+ A A-

सधैँ ट्युसन कक्षा जाने राजकुमार ठाकुर २४ साउनमा पनि सदाझै बिहानै ट्युसन सेन्टर जान घरबाट साइकलमा निस्के । स्कुल भने राजकुमार आफ्नो घरछेउकै मेरा माविमा जान्थे । पर्साबाट ट्युसन सकेर घर फर्किने राजकुमार त्यो दिन भने घर फर्किएनन् ।

बारा विश्रामपुरका २३ वर्षीय राजकुमार ठाकुर कक्षा ९ का विद्यार्थी हुन् । उनी स्कुलको कक्षा सुरु हुनुपूर्व वीरगञ्ज महानगरपालिका–१६, नगवामा रहेको एक ट्युसन सेन्टरमा क्लास लिन्थे ।

सधैँ ट्युसन सकेर घर पर्किने छोरा नर्फिएपछि राजकुमारका वुबा मोतिलाल ठाकुरको मनमा चिसो पस्यो । उनी जिल्ला प्रहरी कार्यालय पर्सा पुगे । २४ साउनमै साझँ मोतिलालले छोरा हराएको र खोजतलास गरिपाउँभन्दै प्रहरीलाई निवेदन दिएर फर्किए ।

तर, राजकुमारबारे प्रहरीले समेत पत्तो लगाउन सकेन । राजकुमार हराएको तीन दिनपछि २७ साउनमा भारत रक्सौलहुँदै मुजफ्फरपुर चल्ने ट्रेनको शौचालयको खाली ठाउँमा उनको शव फेला पर्‍याे ।

भारतीय प्रहरीले फेला पारेको शवको सूचना पर्सा प्रहरीलाई दिइएको थियो । सोही सूचनापछि पर्सा प्रहरीले राजकुमारको शव हुन सक्ने आशंका गर्दै उनका बुबा मोतिलाल ठाकुरसहित प्रहरी वरिष्ठ नायब निरीक्षक विनोदकुमार सिंहको कमाण्डमा प्रहरी शव भेटिएको स्थान पुग्यो ।

मोतिलालले शव आफ्नै छोरा राजकुमारको हो भन्ने पुष्टि गरेपछि प्रहरीले शव बुझेर पर्सा ल्यायो र हत्या अनुसन्धान थाल्यो । घटनाबारे अनुसन्धान थालेको पर्सा प्रहरीले राजकुमारको हत्या आरोपमा दुई जनालाई पक्राउ गर्न सफल भएको छ ।

जिल्ला प्रहरी कार्यालय पर्साका प्रवक्ता डीएसपी प्रह्लाद कार्कीका अनुसार राजकुमारको हत्या अभियोगमा उनकै छिमेकी बारा बिश्रामपुर गाउँपालिका–५ का उत्तर पटेल र उनकै सहोदर दाइ ३० वर्षका प्रितम पटेल पक्राउ परेका छन् ।

उनीहरू दाजुभाइले पर्सामा टेलर सञ्चालन गरेका थिए । उनीहरूमाथि अपहरण, शरीर बन्धक गरी हत्या गरेको आरोपमा पर्सा प्रहरीले थप अनुसन्धान जारी राखेको छ ।

बहिनीको प्रेमी रहेको आशंकापछि हत्या

पर्सा प्रहरीले पक्राउ गरेका पटेल दाजुभाइले राजकुमारको हत्या आफूहरूले गरेको साविती बयान प्रहरीलाई दिएका छन् । प्रहरीको प्रारम्भिक अनुसन्धानमा उनीहरूले राजकुमारले आफ्नी १५ वर्षीया बहिनीसँग प्रेम सम्बन्ध रहेको शङ्कापछि हत्या गरेको बताएका छन् ।

उनीहरूले राजकुमारलाई काम छ, भनेर वीरगञ्ज–१६ नगवास्थित आफ्नै टेलर पसलमा बोलाएर २४ साउनको १० बजे नै हत्या गरेको खुलेको डीएसपी कार्कीले बताए ।

‘पटेल दाजुभाइले २४ साउनमै आफ्नै पसलमा बोलाएर राजकुमारको हत्यापछि बोरामा प्याक गरेर रक्सौलस्थित मुजफ्फरपुर जाने ट्रेनको शौचालयमा फालेका रहेछन्,’ डीएसपी कार्कीले भने ।

उनका अनुसार शव रक्सौल पुर्‍याउन उनीहरूले ना३८प ४३९५ नम्बरको सुपर स्प्लेण्डर मोटरसाइकल प्रयोग गरेका थिए । शव व्यवस्थापन गर्दा प्रहरीको चेकिङबाट बच्न उनीहरू दुवै दाजुभाइले बोल बमकाे टिर्सट लगाएर शव व्यवस्थापन गरको खुलेको छ ।

प्रकाशित मिति: आइतबार, साउन २९, २०७९ १६:०३