ललितपुरको भीआईपी क्षेत्रमा भएको बीभत्स हत्याको एक वर्ष पूरा, प्रहरी अनुसन्धान शून्यमै

ललितपुरको भीआईपी क्षेत्रमा भएको बीभत्स हत्याको एक वर्ष पूरा, प्रहरी अनुसन्धान शून्यमै

A+ A A-

ललितपुरको भीआईपी क्षेत्र सानेपामा भारतीय नागरिकको बीभत्स हत्या भएको एक वर्ष पूरा हुँदा पनि प्रहरीले कुनै ‘क्लु’ फेला पार्न सकेको छैन । एक निजी कम्पनीको मार्केटिङसम्बन्धी काम गर्ने भारतीय नागरिक सत्यनारायण पारिकको २० असार २०७८ मा सानेपाको एक घरमा बीभत्स हत्या भएकाे अवस्थामा शव फेला परेकाे थियाे ।

तर, उनको शव फेला परेको वर्षदिन बित्दासमेत हत्यामा संलग्न कोही पनि पक्राउ परेका छैनन् । पछिल्लो समय ललितपुर प्रहरी र उपत्यका अपराध अनुसन्धान कार्यालयले पत्ता लगाउन नसकेपछि प्रहरीको केन्द्रीय अनुसन्धान ब्युरो (सीआईबी)ले समेत घटनाको अनुसन्धान थालेको थियो ।

तर, सीआईबीले पनि अनुसन्धान थालेको लामो समय हुँदासम्म कुनै नयाँ क्लु भने भेट्टाउन सकेको छैन । संघीय राजधानी काठमाडौं उपत्यकाभित्रकै एक घरमा भएको बीभत्स हत्याको अनुसन्धानमा प्रहरी असफल हुँदा प्रहरीको अनुसन्धानप्रति नै प्रश्न उठेको छ ।

पारिकको हत्या अनुसन्धानमा केही जटिलता देखिएपछि सीआईबीले अनुसन्धान थालेको तर, केही नयाँ क्लु नभेटिएको सीआईबीका एक अधिकारीको भनाइ छ ।

‘पारिकको हत्यामा सुरुदेखि नै अनुसन्धान गरेको अपराध अनुसन्धान कार्यालयसँग हामीले अहिले सहकार्य गरेर अनुसन्धान थालेको छौँ । ढिलोचाँडो अपराधीसम्म हामी पुग्छौँ नै,’ सीआईबीका एक अधिकारीले भने ।

प्रहरीको अनुसन्धानले पारिकको हत्यामा चार जनाको संलग्नता देखाए पनि त्योभन्दा अघि बढ्न भने सकेको छैन । अपराध अनुसन्धान कार्यालयको प्रहरी टोलीले पारिकको हत्या भएको घरनजिकैको सीसीटीभी फुटेजका आधामा हत्यामा चार जनाको संलग्नता देखिएको दाबी गरेको हो ।

पानी परिरहेको समयमा ती व्यक्तिहरू पारिकको घरभित्र छिरेको र अँध्यारोका कारण सीसीटीभी फुटेजमा देखिएका व्यक्तिको पहिचान हुन नसकेको प्रहरीको भनाइ छ । सत्यनारायणको योजनाबद्ध रूपमा हत्या गरिएको निष्कर्षमा प्रहरी पुगेको थियो ।

हत्याराले उनी सुत्ने कोठा र अन्य दुई कोठामा रहेको दराज फुटाएको अवस्थामा भेटिएको थियो । घरको मुख्य गेट बन्द थियो । तर, दोस्रो तलाको झ्यालको तारजाली भने च्यातिएको थियो । त्यही झ्यालबाट हत्याराहरू भित्र छिरेको प्रहरीले जनाएको छ ।

सत्यनारायण घरको दोस्रो तलामा बस्दै आएका थिए । उनको शव खाटमै सुतेको अवस्थामा घोप्टो परेको र रातो ब्ल्याङ्केटले छोपिएको अवस्थामा पाइएको थियो ।

शवसँगै फेला परेको सत्यनारायणको मोबाइल टुक्राटुक्रा हुने गरी फुटाइएको थियो । पारिकको हत्यामा उनैले काम गर्न राखेकी दुई महिलाको भूमिकामाथि पनि प्रहरीले आशंका गरेको थियो ।

तर, महिलामाथिको अनुसन्धानका क्रममा पनि उनीहरूको भूमिका बारे कुनै तथ्या फेला पार्न नसकिएको प्रहरीले जनाएको छ । अपराध अनुसन्धान कार्यालय प्रवक्ता एसपी कृष्ण कोइरालाले पारिक हत्याको अनुसन्धान अझै जारी रहेको बताए ।

‘हामी अनुसन्धानकै क्रममा छौँ । सुरुवाती अवस्थामा संकलन भएका केही प्रमाणहरू सीआईबीलाई पनि उपलब्ध गराएका छौँ । अहिले सीआईबीसँँगको सहकार्यमै थप अनुसन्धान र विश्लेषण गर्दैछौँ,’ एसपी कोइरालाले भने ।

प्रकाशित मिति: आइतबार, साउन २९, २०७९ १२:४५