मृत भेटिएका छोराछोरीसहित गीताको अन्त्येष्टि, श्रीमान्‌विरुद्ध आत्महत्या दुरुत्साहनको जाहेरी

मृत भेटिएका छोराछोरीसहित गीताको अन्त्येष्टि, श्रीमान्‌विरुद्ध आत्महत्या दुरुत्साहनको जाहेरी

A+ A A-

बुधबार बिहान बझाङमा एकै घरका तीन जना मृत फेला परे । जिल्लाको बुङ्गल नगरपालिका- ९ रारुमा एकै परिवारका आमा, छोरा र छोरी बुधबार बिहान मृत फेला परेका हुन् ।

प्रहरीका अनुसार २३ वर्षीया गीता पार्की, उनकी पाँच वर्षीया छोरी भूमिका र तीन वर्षीय छोरा मोहित पार्की झुण्डिएको अवस्थामा भेटिएका थिए ।

तीनै जना एउटै रुखमा झुन्डिएको अवस्थामा भेटिएको जिल्ला प्रहरी कार्यालय बझाङका प्रहरी निरीक्षक रमेश अवस्थीले बताए । मङ्गलबार मृतक गीताका श्रीमान् पुष्कर पार्की भारतबाट घर फर्किएका थिए ।

गीता र छोराछोरी मृत फेला परेपछि उनका श्रीमान्‌लाई प्रहरीले पक्राउ गरेको छ । पक्राउ परेका श्रीमान्‌ले गीतालाई सधैँ शङ्का र ‘टर्चर’ गर्ने गरेपछि उनले सहन नसकेर आत्महत्या गरेको प्रारम्भिक अनुसन्धानबाट खुलेको प्रहरीले जानकारी दिएको छ ।

श्रीमान् घरमा नभएको बेला एक वर्ष पहिले ती महिलामाथि बलात्कार भएको प्रहरीले बताएको छ । स्थानीय झलक नेपालीमाथि उनलाई बलात्कार गरेको आरोप छ । नेपाली अहिले पुर्पक्षका लागि बझाङ कारागारमा छन् ।

उक्त घटनापछि श्रीमान्‌ले हेला गर्न थालेपछि उनले सहन नसकेर आत्महत्या गरेको प्रहरीको अनुसन्धानले देखाएको छ । गत मङ्गलबार घर फर्किएका पुष्कर र गीताबीच त्यही विषयलाई लिएर विवाद भएको बताइएको छ ।

विवाद भएपछि आफू खाना खाएर सुतेको र बिहान घरमा छोराछोरी र श्रीमती नदेखेपछि खोज्दै जाँदा सबै मृत फेला पारेको बयान पुष्करले प्रहरीलाई दिएका छन् । प्रहरीका अनुसार राति खाना खाएर सुतेको र बिहान मात्रै श्रीमती र छोराछोरी घरमा नभएको थाहा पाएको पुष्करले बयान दिएका छन् ।

मृतकका माइती पक्षले भने श्रीमान्‌ले नै आत्महत्या गर्न बाध्य बनाएको दाबी गरेका छन् । मृतक गीताका काका गगन विकले आत्महत्या दुरुत्साहनमा जाहेरी दिएको प्रहरी निरीक्षक अवस्थीले बताए ।

माइती पक्षले जिल्ला अस्पताल चैनपुरमा पोस्टमार्टम सकेर शुक्रबार तीनै जनाको दाहसंस्कार गरिसकेका छन् । पुष्करलाई प्रहरीले नियन्त्रणमा लिएर थप अनुसन्धान गरिरहेको छ ।

प्रकाशित मिति: शुक्रबार, साउन २७, २०७९ १९:११