‘विमान सुरक्षामा कम्प्रोमाइज हुँदैन, उपाय भेटिए प्याराग्लाइडिङ उड्छ’

A+ A A-

पर्यटन मन्त्रालयले सन् २०२३ देखि २०३३ सम्मलाई नेपाल भ्रमण दशक घोषणा गरेका छौँ । घोषणासँगै पर्यटन क्षेत्रको नीति निर्माणका कुरा, पूर्वाधार र जनशक्ति व्यवस्थापनको काम अघि बढ्ने छ । पर्यटन क्षेत्रलाई नेपालको समृद्धिको आधारका रूपमा स्थापित गर्न सकिन्छ भन्ने विश्वास गरेका छौँ ।

७४ बुँदाको पर्यटन पुनरुत्थान कार्ययोजना घोषणा गर्दा देशमा सञ्चालनमा नभएका विमानस्थललाई वैकल्पिक व्यवस्था गर्ने भनेका छौँ । पर्यटनमा आधारित साहसिक गतिविधिलाई विकास गर्ने भन्ने नीतिगत निर्णय र फ्लाइङ स्कुल सञ्चालन गर्ने कुरा ल्याएका छौँ । जुन अहिले सञ्चालनमा रहेको विमानस्थल छ यसलाई के गर्ने भन्ने निर्णय गरिसकेका छैनौँ ।

विमानस्थलको ९८ प्रतिशत काम सकिएको प्राविधिक रिपोर्ट छ । रिट्ठेपानी डाँडा कटान तत्काल प्रक्रिया अगाडि बढाउने कुरामा लागेका छौँ । जनवरी १ नै किन भनेका छौँ भने उडान सुरु गर्नअघि प्राविधिक कुरा हुन्छन् । परीक्षण (क्यालिब्रेसन) उडान गर्नुपर्ने, त्यो गरेको निश्चित महिनापछि नियमित उडान गर्न सक्ने आधार रहेछन् ।

अन्तर्राष्ट्रिय विमानस्थल पोखराको पर्यटन क्षेत्रमा महत्त्वपूर्ण भूमिका खेल्ने एयरपोर्ट हो । विभिन्न देशसँग हवाई सम्बन्ध जोड्ने योजनासहित काम गर्दैछौँ । विमानस्थल क्षेत्रमा चराहरू भएको र बर्ड हजार्डका कुरा पनि छन् । अहिले आएका प्रविधि प्रयोग गरेर समस्या सुल्झाएर विमानस्थल सञ्चालनको अवस्थासम्म पुर्‍याउँछौँ । प्रकृतिलाई संरक्षण गर्ने, चराचुरुङ्गी र विविधतालाई ध्यान दिने कुरा हुने नै छ ।

प्याराग्लाइडिङ र पर्यटन व्यवसायीले प्याराग्लाइडिङ पोखराको ब्राण्ड भइसक्यो, यसलाई कसरी हुन्छ संरक्षण गर्नुपर्‍यो भन्ने माग गर्नुभएको छ । अन्तर्राष्ट्रिय विमानस्थल पनि पोखरेलीकै माग र चाहनाअनुसार निर्माण भएको हो । विमान सुरक्षाको कुरामा हामीले कम्प्रोमाइज गर्न मिल्दैन । तर, सुरक्षामा कुनै पनि ढंगले असर नपर्ने गरी प्याराग्लाइडिङलाई कायम गर्न सक्ने स्थिति हुँदासम्म कायम गर्नुपर्छ भन्ने मान्यता मैले राखेको छु । यसका लागि प्राविधिक दृष्टिकोणबाट छलफल गर्छौं र कुनै उपाय छन् भने त्यहीअनुसार संरक्षण गर्छौं ।

पोखरालाई पर्यटकीय राजधानी बनाउने विषय पनि आएको छ । पोखराको मेयर'साबले निवेदन पनि दिनुभएको छ । पर्यटकीय राजधानी घोषणा गर्ने आधारबारे हामी छलफल गरिरहेका छौँ र त्यो सकेपछि प्रस्ताव मन्त्रिपरिषद्‌मा लैजान्छौँ ।

-पर्यटनमन्त्री श्रेष्ठले गत बुधबार पोखरामा पत्रकार भेटघाटमा व्यक्त गरेको विचार ।

प्रकाशित मिति: शुक्रबार, साउन २७, २०७९ १६:२७