प्याराग्लाइडिङ विधा मात्रै होइन, करिअर पनि हो

A+ A A-

पोखरा आउने ७०-८० प्रतिशत पर्यटकले प्याराग्लाइडिङको रमाइलो लिनुहुन्छ । पोखरामै किन राख्नुपर्ने ? पहिलो कुरा सुन्दरता हो । हामी फेवातालमाथि उडेर हिमाल हेर्न सक्छौँ । दोस्रो कुरा प्याराग्लाइडिङसँग आबद्ध रोजगारी हो । राजस्व पनि धेरै उठ्छ । प्याराग्लाइडिङ आजभन्दा ५-७ वर्षअगाडि पोखराकै एक नम्बर करदाता भएको थियो ।

पोखराबाट प्याराग्लाइडिङलाई विस्थापन होइन, व्यवस्थापन गर्न जरुरत छ । प्याराग्लाइडिङ पोखरामै कसरी राख्ने भनेर आन्तरिक गृहकार्य गरिरहेका छौँ । पोखरालाई अन्तर्राष्ट्रिय विमानस्थल महत्त्वपूर्ण छ । त्यसको ठूलो लागत छ । त्यतिभन्दा भन्दै पनि पोखरासँगै नेपाल चिनाउने प्याराग्लाइडिङलाई यसै विस्थापित गर्न मिल्दैन ।

पोखरामा व्यवस्थापन हुन नसकेको प्याराग्लाइडिङ नेपालमा कहीँ पनि हुन सक्दैन । ठूलो रुख काटेपछि त्यसको हाँगा, जराले काम गर्दैन । प्याराग्लाइडिङ बचाउन राज्यले नै पहल गर्नुपर्छ । राज्यकै प्रतिष्ठा जोगाएको विषय हो प्याराग्लाइडिङ । यसलाई जोगाउन के गर्न सकिन्छ, समूहमा कसरी काम गर्न सकिन्छ, के कार्यविधि बनाउन सक्छौँ, स्थलगत अवस्था के छ त्यसबारे जाँच गरेर प्याराग्लाइडिङ बचाउन सकिन्छ कि भन्ने लाग्छ ।

हाल सञ्चालित आन्तरिक विमानस्थल उत्तर–पश्चिम धावनमार्ग भएको छ । अहिले बनेको अन्तर्राष्ट्रिय विमानस्थल पूर्व-दक्षिण छ । ठूला वा आन्तरिक उडान भर्ने जहाज अवतरण हुन सकेन भने त्यो फेवातालमाथि आउने रहेछ । त्यहीँ हाम्रा प्याराग्लाइडिङ उड्छन् । खास त्यो प्लेनलाई स्याङ्जातिर घुमाउने पर्ने हो । रेखाङ्कन गर्दा माछापुच्छ्रे हिमालतिर गरियो । अवतरण हुन नसके जहाँ जान सकिन्छ, जहाँ डाँडाकाँडा छैन त्यता लैजान पर्ने हो । उडान रेखाङ्कनमा जहाँ ठूला–ठूला हिमाल छन् त्यता किन घुमाइयो ? त्यसमा अचम्म लागेको छ ।

प्याराग्लाइडिङ जहाँ खेलिन्छ त्यहाँभन्दा धेरैमाथि जहाज उड्ने हो । त्यसैले तलपट्टि प्याराग्लाइडिङ गर्दा ठूलो समस्या पार्छजस्तो लाग्दैन । प्याराग्लाइडिङ भनेको उचाइबाट उडेर तल झर्दै आउने हो । सराङकोटबाटै प्याराग्लाइडिङ दिनुपर्छ र हामी एउटा सिस्टममा निश्चित ठाउँमा रहेर निश्चित समयमा हामी उडान गर्छौं । प्याराग्लाइडिङ सधैँ हुने होइन । हावाको बहाबबाट चल्ने बिना इन्जिनको ग्लाइडर (इन्धनले नभई हातले चल्ने सानो विमान) हो । भनेजस्तो मौसन नभए उड्न सकिँदैन ।

म पाइलट भएको १०-१५ वर्षको अनुभवअनुसार बोल्दा हामी डाँडाको आसपास पनि खेल्न सक्छौँ । माथितिर नगई तल झरेर पनि हामीसँग उड्ने पर्यटकलाई मज्जा दिन सक्छौँ । प्याराग्लाइडिङ गर्दा उचाइमै जानुपर्छ भन्ने छैन । निश्चित उचाइमा बसेर हामी रमाइलो दिन सक्छौँ ।

वास्तवमा प्याराग्लाइडिङ विधामात्रै होइन, करिअर पनि हो । आफूसँगै परिवार पाल्ने माध्यम हो । हामीसँग ६० वटा कम्पनी सञ्चालनमा छन् । प्रत्येक कम्पनीसँग ३ देखि ६ जनासम्म पाइलट हुन्छन् । त्यसबाहेक कम्पनीसँग आबद्ध, अफिसियल, गाडी चालक, उनीहरूको परिवार र हामी पाइलटको परिवार पनि छ । त्यसरी हेर्दा एक हजार जना जति हामी प्रत्यक्ष निर्भर छौँ ।