एक्लै लडे चुनाव हार्ने कमल थापाको डरः गठबन्धनको आस, एमालेको छैन भर

A+ A A-

सरकारले ४ मंसिरमा प्रतिनिधिसभा र प्रदेशसभाको चुनावको मिति घोषणा गरेको छ । मिति घोषणासँगै नेताहरू चुनावी तयारीमा जुटिसकेका छन् । मकवनपुरका नेताहरू पनि चुनावी रणनीति बनाउन जुटेका छन् ।

त्यसको पहिलो नम्बरमा पर्छन्- राप्रपा नेपालका अध्यक्ष कमल थापा । थापा मकवानपुरबाट राष्ट्रिय राजनीतिमा प्रतिनिधित्व गर्ने उच्च तहका नेता हुन् । आगामी चुनावमा मकवानपुर- १ बाट प्रतिनिधिसभामा प्रतिस्पर्धा गर्ने थापाको तयारी छ । अघिल्लो चुनावमा उनी नेकपा एमालेका कृष्णप्रसाद दाहालसँग पराजित भएका थिए ।

अघिल्लो चुनावमा पराजित भएका थापालाई यसपटक पनि चुनाव जित्न त्यत्ति सजिलो छैन । तत्कालीन देउवा सरकारको उपप्रधान तथा ऊर्जामन्त्री रहेका थापाले एमाले र माओवादी केन्द्रका संयुक्त उम्मेदवार दहालसँग प्रतिस्पर्धा गरेका थिए । राप्रपा अध्यक्ष भएकै बेला कांग्रेसको साथ पाएर पनि उनी दहालसँग ५ हजार ७ सय ३ मतान्तरले पराजित भए । दाहालले ४० हजार ६ सय ३१ मत ल्याउँदा थापाले ३४ हजार ६ सय ५८ भोट पाएका थिए ।

त्यतिबेला सत्तापक्षसँग मिलेर पनि चुनाव जित्न नसकेका थापाले आगामी चुनावमा भने प्रमुख प्रतिपक्षी दल एमालेसँग मिल्ने कसरत गरेका छन् । तर, थापाले एमाले अध्यक्ष केपी शर्मा ओली र गठबन्धनका दुई शिर्ष नेता प्रधानमन्त्री शेरबहादुर देउवा र माओवादी अध्यक्ष पुष्पकलम दाहाल ‘प्रचण्ड’सँग सिट सुरक्षित गर्न लबिङ गरिरहेको राप्रपा नेपाल मकवानपुरका अध्यक्ष गुरुप्रसाद सापकोटाले जानकारी दिए ।

‘कमल दाई निर्वाचन उठ्नुहुन्छ । उहाँले एमाले र गठबन्धन दुवैसँग निर्वाचनमा कसरी जान सकिन्छ भनेर छलफल गरिरहनुभएको छ । दुवै तर्फबाट सकारात्मक कुरा आएको छ,’ सापकोटाले शिलापत्रसँग भने ।

एमालेको साथ पाउँदा पनि निर्वाचन जित्ने भर नदेखेपछि गठबन्धनबाटै टिकट फुत्काउने दाउमा थापा लागेको टिप्पणी मकवानपुरमा हुन थालेको छ । एमालेपभित्र बढ्दो असन्तुष्टि, अन्तरघातका कारण थापा सशंकित भएको राप्रपा नेपालका नेताहरू बताउँछन् ।

गठबन्धनबाट टिकट पाए सहजै जित्ने थापाको विश्लेषण रहेको बुझिन्छ । तर, उनलाई गठबन्धनले टिकट दिइहाल्ने सम्भावना कम रहेको माओवादी केन्द्रका एक नेताले शिलापत्रलाई बताए । गठबन्धनलाई आफ्नै नेताहरूको भागवण्डा मिलाउन सकस पर्ने स्थितिमा थापालाई च्याप्ने सम्भावना कम रहेको ती नेता बताउँछन् ।

मकवानपुर- २ बाट एकीकृत समाजवादीका नेता विरोध खतिवडा प्रतिनिधिसभामा उठ्ने तयारीमा छन् । कांग्रेस सहमहामन्त्री महालक्ष्मी उपाध्याय ‘डिना’को निर्वाचन क्षेत्र पनि त्यही हो । खतिवडालाई मिलाउँदा डिनाले १ नम्बर क्षेत्र दाबी गर्ने सम्भावना छ । क्षेत्र नम्बर १ मा कांग्रेस बागमतीका सभापति इन्द्रबहादुर बानियाँ पनि दाबेदार छन् । यो क्षेत्रमा माओवादी केन्द्रका प्रल्हाद लामिछाने र प्रेमबहादुर पुलामी पनि टिकट ल्याउने लबिङमा छन् ।

गठबन्धनको घञ्चमञ्चका बीच गठबन्धनबाटै टिकट फुत्काउन थापालाई त्यति सहज छैन । उता एमालेसँग मिल्दा पनि चुनाव जितिहालिन्छ भन्न सक्ने अवस्था छैन । ३० वैशाखको स्थानीय चुनावमा १ नम्बर क्षेत्रमा पर्ने बागमती गाउँपालिका, बकैया गाउँपालिका, मकवानपुरगढी गाउँपालिका र हेटौँडा उपमहानगरपालिकामा एमालेले प्रमुख र उपप्रमुखमा जित्न सकेन । ०७४ को स्थानीय चुनावमा भने बागमती र बकैयाको उपाध्यक्ष एमालेले जितेको थियो । मकवानपुरगढी र हेटौँडा उपमहानगरपालिकामा अध्यक्ष/मेयर, उपाध्यक्ष/उपमेयरसहित बहुमत वडा एमालेले जितेको थियो ।

प्रतिनिधिसभा चुनावमा एक्लै लड्ने अवस्थामा थापा नरहेको पार्टीका जिल्ला अध्यक्ष सापकोटा स्वीकार गर्छन् । एक्लै चुनाव लडे हार्ने निश्चित रहेको उनको भनाइ छ ।

मकवानपुर- १ मा राप्रपा नेपालको मत कति छ भन्ने यकिन भएको छैन । स्थानीय चुनावमा उम्मेदवार नउठाएका कारण वास्तविक मतबारे अनविज्ञ रहेको सापकोटाले बताए । उनका अनुसार थापाले एक्लै निर्वाचन लडे करिब १२ देखि १५ हजारसम्म मत ल्याउन सक्छन् । यो क्षेत्रमा चुनाव जित्न ४५ हजारको हाराहारीमा मत चाहिने जानकारहरू बताउँछन् ।

गठबन्धनबाट टिकट पाए र अन्तरघात नभए थापाले जित्ने सम्भावना बलियो रहन्छ । अघिल्लो चुनावसँग कांग्रेससँग मिलेर थापाले ३५ हजारभन्दा बढी मत ल्याएका थिए । यसपटक त्यसमा माओवादी केन्द्र र एकीकृत समाजवादीको पनि मत सकिन सक्छ । माओवादी केन्द्रको साथमा अघिल्लो चुनाव जितेको एमालेको भने यसपटक भने मत घट्ने देखिन्छ ।

मकवानपुर- १ मा बागमती, बकैयासहित मकवानपुरगढीको १, २, ३ र ४ नम्बर वडा, हेटौँडाको २, ४, ५, ६, ७, ८, ९, १०, १२, १३, १४, १५, १६, १७, १८ वडा छन् । २ नम्बर क्षेत्रमा थाहा नगरपालिका, मनहरी गाउँपालिका, राक्सिराङ गाउँपालिका, कैलाश गाउँपालिका, इन्द्रसरोबर गाउँपालिका भीमफेदी गाउँपालिका रमकवानपुरगढीको ५, ६, ७ र ८ नम्बर वडा पर्छन् । हेटौँडा उपमहानगरपालिकाको १, ११, ३ र १९ नम्बर वडा २ नम्बर क्षेत्रमा पर्छ ।

दीपक सिंहको डर

कुनै बेला एउटै रथका दुई पाङ्ग्राका रूपमा चिनिएका कमल थापा र दीपक सिंह अहिले दुई भिन्नै पार्टीमा छन् । तत्कालीन राप्रपा नेपाल र राप्रपा (एकतापछि) केन्द्रमा थापाले पार्टी हाँक्थे भने मकवानपुरमा सिंहले ।

दीपक सिंह

थापाका हितैषी सिंह अहिले राजेन्द्र लिङ्देन नेतृत्वको राप्रपाको केन्द्रीय सदस्य छन् । राप्रपाको अध्यक्षमा हारेपछि भाउन्निएका थापाका कारण सिंह केही समय ‘न्युट्रल’ थिए । ३० वैशाखको स्थानीय चुनावमा सिंह राप्रपाको तर्फबाट हेटौँडाको मेयर पदका उम्मेदवार बने । सिंहले मेयर पदमा ‘हाइज्याक’ हानेको भन्दै राप्रपाका तत्कालीन केन्द्रीय सदस्य मधु अधिकारी असन्तुष्ट भएर नेकपा (एकीकृत समाजवाजी) तिर लागिसकेका छन् । अधिकारी पनि कुनै बेला थापाका विश्वास पात्र थिए । थापाले गृहजिल्लामै एकपछि अर्को गर्दै राजनीतिक सहयोगी गुमाउँदै गएका छन् ।

एक्लै चुनाव लडे हार्ने लगभग निश्चित भएका थापालाई अन्य कुनै बलियो दलको सहारा लिनुपर्ने बाध्यता छ । अरुको फेरो समाउनु पर्ने बाध्यतामा रहेका थापालाई उनकै पुराना मित्र सिंह पनि टक्कर दिने तयारीमा छन् । यसकारण थपालाई सिंहको पनि डर रहेको राप्रपा नेपाल मकवानपुर अध्यक्ष सापकोटा बताउँछन् ।

‘कमल दाईलाई दीपक सिंहसँग डर छ,’ सापकोटाले छोटकरीमा थापाको समस्या सुनाए ।

सिंहले स्थानीय चुनावमा हेटौँडाको मेयर पदमा उल्लेख्य मत ल्याएका थिए । राजसी ठाँटका उद्योगपतिसमेत रहेका सिंहले २० हजार ५ सय ३१ मत ल्याएका थिए । उनको बढ्दो लोकप्रियताका कारण पनि भोट काट्न सक्ने आंकलन थापालाई छ । उनले सिंहलाई मिलाएर निर्वाचनमा जान सक्ने सापकोटा बताउँछन् ।

प्रकाशित मिति: बिहीबार, साउन २६, २०७९ १८:१६