चुनावमा एक लाख १८ हजार म्यादी प्रहरी आवश्यक, हतियार सेनासँग मागिने

A+ A A-

मंसिर ४ मा हुने प्रदेश र प्रतिनिधिसभाको चुनावका लागि प्रहरीलाई करिब एक हजार सात सय नयाँ गाडी र एक लाख १८ हजार म्यादी प्रहरी आवश्यक हुने भएको छ ।

प्रहरी प्रधान कार्यालयले गरेको आन्तरिक गृहकार्यले प्रहरीका लागि मात्रै एक हजार सात सय नयाँ गाडी र निर्वाचन सुरक्षाका लागि एक लाख १८ हजार म्यादी प्रहरी आवश्यक रहेको प्रहरी प्रधान कार्यालयले जनाएको छ ।

यसअघि स्थानीय चुनावका लागि प्रहरीले १२ सय गाडी भाडामा प्रयोग गर्नुका साथै एक लाख म्यादी प्रहरी भर्ना गरेको थियो । तर, संघ र प्रदेशको चुनावमा निर्वाचन केन्द्रहरू थपिने भएपछि म्यादीको संख्या पनि थप्नुपर्ने आवश्यकता भएको प्रहरी प्रवक्ता एवं डीआईजी टेकप्रसाद राईले बताए ।

त्योबाहेक प्रतिनिधि र प्रदेशसभाको निर्वाचनमा सबै कारागारमा मतदान केन्द्र रहने व्यवस्था निर्वाचन आयोगले गरेको छ ।प्रहरीको लागि आवश्यक जनशक्ति र साधनस्रोतका लागि प्रहरी प्रधान कार्यालयले गृह मन्त्रालयमा प्रस्ताव पठाउने तयारी गरेको छ ।

प्रहरीको प्रस्ताव गृह मन्त्रालयले अर्थ मन्त्रालयसँग सहमति माग्नु पर्ने हुन्छ । अर्थले स्वीकृति दिए प्रहरीले म्यादी भर्ना र नयाँ गाडी खरिद प्रक्रिया बढाउने छ । यसअघि स्थानीय तहको निर्वाचनमा खटिएका म्यादी प्रहरीलाई सोझै भर्ना गर्नेबारे पनि छलफल भइरहेको प्रहरी प्रधान कार्यालयले जनाएको छ । साधन स्रोतबाहेक प्रहरीसँग चुनावमा आवश्यक साना हतियारसमेत अभाव छ ।

स्थानीय चुनावमा प्रहरीले नेपाली सेनासँग २ हजार पेस्तोल भाडामा लिएकाे थियो । संघ र प्रदेशको चुनावमासमेत प्रहरीले सेनासँगै पेस्तोल माग्ने गृहकार्य भइरहेको एक प्रहरी अधिकारीले बताए । ‘छोटो समयमै हतियार खरिद गर्न सकिने अवस्था छैन । हामीसँग हतियार छैन । सेनाबाहेक अर्को विकल्प नै छैन । हामीले हतियार सेनासँग मागर्ने तयारी गर्दैछौँ,’ ती अधिकारीले भने ।

प्रहरी प्रधान कार्यालयको केन्द्रीय निर्वाचन सेलले ७७ वटै जिल्लामा आवश्यक पर्ने साधनस्रोतबारे प्रहरी प्रधान कार्यालयलाई जनाकारी गराउन पत्राचार गरेको छ । प्रहरी प्रधान कार्यालयले कार्यविभागका प्रमुख एआईजी सहकुल बहादुर थापाको नेतृत्वमा २५ जनाको केन्द्रीय निर्वाचन सेल गठन गरेको छ ।

प्रकाशित मिति: बिहीबार, साउन २६, २०७९ १३:१३