छवि–शिल्पा सम्बन्ध, समाज र सन्देश

A+ A A-

निर्देशक छवि ओझा र नायिका शिल्पा पोखरेलको दम्पत्यले नयाँ मोड लिएको छ ।

सम्पत्तिको लोभमा अर्काको घर बिगार्न खोज्ने नायिका शिल्पा पोखरेल र श्रीमती बटुल्दै हिँड्ने निर्देशक छवि ओझा प्रतिकूल पात्र हुन् । उनीहरु पात्र मात्रै होइनन्, यो समाजको प्रवृत्ति पनि हुन् ।

पछिल्लो एक महिना छवि र शिल्पाको सम्बन्ध एवं सम्बन्ध विच्छेदको विषयले सामाजिक सञ्जाल तात्यो । उनीहरुको सम्बन्धलाई धेरैले धेरै कोणबाट विश्लेषण गरे ।

कसैले शिल्पालाई दोष दिए, कसैले छविलाई । कतिले दुवै जनालाई । कतिले मझ धारबाट प्रतिक्रिया दिए ।

छवि र शिल्पाले जसरी आपसमा दोषारोपण गरे, त्यो सही थिएन किनकि परिणामबारे उनीहरु जानकार हुनुपथ्र्यो । गलत कर्मको परिणाम गलत निस्किएको मात्रै हो, सम्बन्ध विच्छेदको प्रसंग ।

हरेक परिणामका पछाडि थुप्रै कारण हुन्छन् । र, परिणाम पनि अर्को परिणामका लागि कारण बन्छ । यसर्थ, छवि–शिल्पाको सम्बन्ध बिग्रनुमा कारण प्रधान छ । कारणको बीजारोपण नै गलत छ ।

तीन जनासँग सम्बन्ध बिग्रिएका छविलाई प्रचार र पैसाको लोभमा शिल्पाले रोज्नुपर्ने कारण सही थिएन । छविले ‘छोरी उमेर’की शिल्पालाई दयाले श्रीमती बनाएका थिएनन् ।

सम्बन्ध जोडिने र टिक्ने समझदारीले नै हो, प्रेमले हो, विश्वासले हो र समर्पणले हो । जुन उनीहरुमा थिएन । उनीहरुको सम्बन्धमा स्वार्थ मात्रै थियो । जब स्वार्थ मिलेन वा पूरा हुने छाँट देखिएन, सम्बन्धमा दरार आयो । त्यसैको परिणाम हो, अहिलेको स्थिति ।

शिल्पाका अनुसार बिहेको एक महिनापछि नै छविले हिंसा गर्दै आएका थिए । हिंसा उत्कर्षमा पुगेपछि सम्बन्ध विच्छेदको निष्कर्षमा पुगेको उनको भनाइ छ । पहिला पोषण र पछि शोषण भएको शिल्पाको अभिव्यक्ति थियो । जुन कुरा उनी आफैंले पहिल्यै बुझ्नुपथ्र्यो ।

छविले शिल्पाको आरोपको खण्डन गर्दै सामान्य घर झगडालाई ठूलो रुपमा प्रस्तुत गरेको भने । शिल्पालाई फकाएर फकाईदिन निकटतमसित आग्रह गरे । यसले छवि ‘गलेको’ आभास हुन्छ ।
तर, विरोधाभासबीच कथाले फेरि अर्को मोड लिएको छ ।

छविकी पहिलो श्रीमती हेमा ओझाले महानगरीय प्रहरी वृत्त गौशालामा छवि–शिल्पाविरुद्ध बहुविवाहको उजुरी दर्ता गरिन् । छविले हेमासँग २०४० सालमा विवाह गरेका थिए ।
छविलाई नजिकबाट बुझ्नेहरु भन्छन्, ‘सेलिबे्रटी गीताञ्जली र रेखा थापासँगको सम्बन्धमा मौन बसेकी हेमा शिल्पासँगको सम्बन्धलाई लिएर प्रहरीकहाँ पुग्नु रहस्यमय छ । यो छविले सम्पत्ति जोगाउन रचेको नाटक हो ।’

प्रचलित मुलुकी फौजदारी संहिताअनुसार बहुविवाहको मुद्दामा ५ वर्षसम्म जेल सजाय हुनेछ ।

त्यस्तै, शिल्पाले ३५ वर्ष पछि हेमाले उजुरी हाल्नुलाई षड्यन्त्रका रूपमा बुझेकी छन् । रेखासँग राम्रो सम्बन्ध रहेका वकिलले हेमाको पक्षबाट मुद्दा हाल्दा कतै रेखाले नै हेमालाई उक्साएको त हैन भन्ने पनि छन् ।

छवि र शिल्पाको सम्बन्ध एउटा प्रतिनिधि घटना मात्रै हो । यो हाम्रो समाजको बिम्ब हो । यथार्थ हो । प्रवृत्ति हो ।

सम्पत्ति वा चर्चाको लोभमा विवाहजस्तो पवित्र सम्बन्धलाई विकृत बनाउनु अपराध हो । यसप्रति छवि र शिल्पा मात्रै होइनन्, सबै सचेत हुन जरुरी छ ।

प्रकाशित मिति: शनिबार, साउन ११, २०७६ १६:३५