जग्गा कब्जा गरेको पाँच वर्षपछि प्रचण्डका भाञ्जाले पाए रक्सी उद्योगकाे लाइसेन्स

जग्गा कब्जा गरेको पाँच वर्षपछि प्रचण्डका भाञ्जाले पाए रक्सी उद्योगकाे लाइसेन्स

A+ A A-

राजनीतिक पहुँचको फाइदा उठाउँदै उत्पादन अनुमति नै नलिई उद्योग सञ्चालनका लागि जग्गा भाडामा लिएका व्यवसायी गोकुल भण्डारीले रक्सी उद्योग खोल्ने अनुमति पाएका छन् ।

माओवादी केन्द्रका अध्यक्ष पुष्पकमल दाहाल ‘प्रचण्ड’का भाञ्जासमेत रहेका भण्डारीले हेटौँडा औद्योगिक क्षेत्रमा कानुनविपरीत वर्षौंदेखि जग्गा कब्जा गर्दै आएका थिए । चितवनका भण्डारीले हेटौँडा औद्योगिक क्षेत्रमा साउथ एसियन ब्रुअरी इन्डस्ट्रिज प्रालिको नाममा १०५ रोपनी जग्गा भाडामा लिएका थिए ।

२०७३ सालमा भण्डारी सञ्चालक रहेको साउथ एसियन ब्रुअरी इन्डस्ट्रिज प्रालिले बियर उत्पादन गर्ने भन्दै जग्गा सम्झौता गरेको थियो । जग्गाको भाडा नियमित तिर्दै आए पनि कानुनतः एक वर्षभित्र उद्योग सञ्चालनमा ल्याइसक्नु पर्छ । तर, भण्डारीले राजनीतिक पहुँचका आधारमा उद्योग सञ्चालन नै नगरी जग्गा कब्जा गरेर राखेका थिए ।

भण्डारीले रक्सी उत्पादन गर्ने अनुमति (लाइसेन्स) नपाएका कारण जग्गा लामो समयसम्म कब्जा गरेर राखेका थिए ।

प्रचण्डका आफन्तदेखि कांग्रेस बागमती सभापतिको कब्जामा हेटौँडा औद्योगिक क्षेत्रको सयौं रोपनी जग्गा

अन्ततः आफ्नै पार्टी नेकपा माओवादी केन्द्र सत्तामा रहेको मौका छोप्दै भण्डारीले रक्सी उत्पादन गर्ने अनुमति लिएका छन् । करिब हप्ता दिनअघि मात्रै हेटौँडा आएर औद्योगिक क्षेत्रको वस्तु स्थिति बुझेर गएका उद्योग वाणिज्य तथा आपूर्तिमन्त्री दिलेन्द्र प्रसाद बडूले रक्सी उद्योगको लाइसेन्स बाँडेका हुन् । करिब ८ वर्षदेखि रक्सीको लाइसेन्स रोकिए पनि त्यसलाई तोड्दै मन्त्री बडूले आफू अध्यक्ष रहने उद्योग तथा लगानी प्रवर्द्धन बोर्डमार्फत अनुमति दिएका हुन् ।

बडूले भण्डारीसहित शंकर ग्रुपको जगदम्बा अल्को वेभ प्रालिलाई पनि लाइसेन्स दिने निर्णय गरेका छन् । भण्डारीले ठूलो क्षेत्रफलमा जग्गा कब्जा गरेर नयाँ उद्योगहरू आउन नदिए पनि उनलाई कारबाही गर्नुको सट्टा उल्टै उपहार दिएका हुन् ।

३ हजार २ सय २८ रोपनी क्षेत्रफलमा फैलिएको हेटौँडा औद्योगिक क्षेत्रमा नयाँ उद्योगका लागि जग्गा अभाव छ । तर, नेतादेखि तिनका आफन्तले भने नियमविपरीत सयौँ रोपनी जग्गा कब्जा गरेर राखेको हेटौँडा औद्योगिक क्षेत्र व्यवस्थापन कार्यालयको रेकर्डमा छ ।

हेटौँडाको औद्योगिक क्षेत्र व्यवस्थापन कार्यालयले औद्योगिक क्षेत्र व्यवस्थापन लिमिटेड, काठमाडौंलाई जग्गा फिर्ताको प्रक्रियाबारे पत्राचार गरे पनि लिमिटेडले १ वर्षको समय थप गरेर पठाएको थियो । यसअघि प्रशस्त समय हुँदा पनि काम नगरेको साउथ एसियन ब्रुअरीलाई लिमिटेडले २०७९ असार मसान्तसम्मको समय थप गरेको हो ।

प्रकाशित मिति: सोमबार, साउन २३, २०७९ २०:३६