सुत्केरीको मृत्युपछि झडप, प्रहरीसहित ८ घाइते

A+ A A-

पोखराको पृथ्वीचोकस्थित पश्चिमाञ्चल सामुदायिक अस्पतालमा सुत्केरीको मृत्यु भएपछि तनाव उत्पन्न भएको छ ।

कास्कीको अन्नपूर्ण गाउँपालिका-७, लान्द्रुक घर भई पोखरा-१४, चाउथे बस्दै आएकी ३३ वर्षीया निशाकुमारी थापाकाे शुक्रबार बिहान मृत्यु भएपछि आक्रोशित भएका आफन्त र सुरक्षार्थ खटिएका प्रहरीबीच अस्पताल परिसरमै झडप भएको छ ।

सुत्केरीको रक्तस्राव भइरहेको जानकारी हुँदा हुँदै उपचारमा संलग्न डाक्टर र नर्सले लापरवाही गरेकाले उचित कारवाही र क्षतिपूर्तिको माग राखेर आन्दोलनमा उत्रिएका मृतकका आफन्त र प्रहरीबीच झडप भएको हो ।

सुत्केरीको मृत्युपछि आफन्तले अस्पतालको लापरवाहीले सुत्केरीको मृत्यु भएको आरोप लगाउँदै नाराबाजी गरेको र भीडबाट ढुंगा प्रहार भएपछि प्रहरीले रोक्ने प्रयास गर्दा झडप भएको जिल्ला प्रहरी कार्यालय कास्कीका प्रहरी प्रमुख एपी दानबहादुर कार्कीले बताए ।

‘आफन्त र अस्पतालबीच वार्ताको प्रयास हुँदै थियो । त्यसै क्रममा ढुंगा प्रहार भएपछि झडप भएको हो,’ उनले भने । झडपमा परी पाँच प्रहरीसहित ८ जना घाइते भएका छन् ।

प्रहरी निरीक्षक विजय भण्डारी, हबल्दार मीनबहादुर पाण्डे, प्रहरीहरु रुपा परियार र डोलराज नेपाली घाइते भएका छन् । त्यसैगरी, मृतकका आफ्न्तहरु शोभाकर पौडेल, नरबहादुर थापा र रेशम थापा घाइते भएका छन् ।

यसरी भयो घटना

निशाले गर्भवती भएदेखि नै तोकिएको समयमा यसै अस्पतालमा आएर नियमित स्वास्थ्य परीक्षण गराउँदै आएकी थिइन् । चिकित्सकले सुत्केरी हुन तोकेको मितिमा उनी त्यसै अस्पताल पुगेर बिहीबार पनि चिकित्सकसँग सल्लाह लिइन् ।

निशा बच्चा जन्माउन बिहीबार बिहानैबाट अस्पतालमा भर्ना भइन् । साँझ पौने ८ बजेतिर उनले बिना अप्रेसन बच्चा जन्माएकी थिइन् । बच्चा (छोरा) जन्मेपछि निरन्तर रक्तस्राव भइरहेको मृतककी बहिनी ताराकुमारी थापाले बताइन् ।

‘बच्चा जन्मेपछि रक्तस्राव निरन्तर भइरह्यो, हामीले डाक्टरलाई भन्यौं । डाक्टरले हेरेर मात्रै गए,’ उनले भनिन्, ‘नर्सलाई पटक–पटक रक्तस्राव भइरहेको जानकारी गरायाैं तर समयमै आवश्यक उपचार नगरिदिएकाले दिदीको मृत्यु भयो ।’

अस्पतालका अनुसार वरिष्ठ स्त्री तथा प्रसूति रोग विशेषज्ञ डाक्टर छममाया पुनको टोलीले निशाको उपचार गरेको थियो । बच्चाको स्वास्थ्य अवस्था भने सामान्य नै रहेको अस्पतालले जानकारी दिएको छ ।

मृतक निशाका भाइ वसन्त थापाले सुत्केरी भएपछि रगत नबग्ने औषधि गर्नुपर्ने तर डाक्टरले औषधि नगरी अप्रेसन गरेका कारण दिदीको ज्यान गएको आरोप लगाए ।

प्रकाशित मिति: शनिबार, साउन ११, २०७६ ०४:०७