कतार र मलेसियाको हारसँगै बढ्यो नेपालको विश्वकप सम्भावना

A+ A A-

नेपाली क्रिकेट टिम दोस्रोपटक टी–२० विश्वकप खेल्ने सपना पूरा गर्न अहिले सिंगापुरमा छ । प्रतियोगिता जित्दै विश्वकपको ग्लोबल छनोट खेल्ने फेभरेट टिमका रुपमा सहभागी भएको नेपाल पहिलो खेलमा कतारसँग अप्रत्याशित रुपमा पराजित भएको थियो ।

पराजयसँगै नेपालको विश्वकप समीकरण फेरि नेट रनरेटको गणितीय हिसाबमा झुन्डिन पुग्यो ।

एसिया छनोटमा सहभागी ५ देशले आफ्ना २–२ खेल खेलिसक्दा नेपाल तेस्रो स्थानमा थियो । यद्यपि, गणितीय सम्भावना भने नेपालकै बढी देखिन्थ्यो ।

त्यसका लागि नेपाललाई दुई खेलका नतिजाले साथ दिन आवश्यक थियो । शुक्रबार हुने पहिलो खेलमा कुवेतले कतार तथा सिंगापुरले मलेसियालाई पराजित गर्नुपर्थ्याे ।

क्रिकेटमा जब नेट रनरेटको हिसाब सुरु हुन्छ, नेपाल सधैं भाग्यमानी साबित हुने गरेको छ । यसपटक पनि त्यस्तै भयो । कतार र मलेसिया दुवै पराजित भए । अब विश्वकप खेल्न नेपालले जिते पुग्छ ।

नेपालका अझै दुई खेल बाँकी छन् । एउटा कुवेत र अर्को सिंगापुरसँग । सिंगापुर र कुवेत अंक तालिकामा क्रमशः पहिलो र दोस्रो स्थानमा छन् ।

पहिलो स्थानमा रहेको सिंगापुरको ३ खेलमा ५ अंक छ भने कुवेतले ३ खेलमा ३ अंक जोडेको छ । २ खेल खेलेको नेपालको भने २ अंक छ । कतार र मलेसियाको पराजय पछि नेपालले बाँकी २ खेल जित्दै स्पष्ट ६ अंक जोडेमा विश्वकपको ग्लोबल छनोट खेल्ने मौका पाउनेछ ।

अंक तालिकामा आफूभन्दा माथि रहेका टिमसँग खेल बाँकी रहेकाले नेपाललाई प्रतियोगितामा रणनीतिक फाइदा भएको छ । नेपालको एक मात्र चुनौती भनेको आफ्ना दुवै खेलमा जित हात पार्नु हो । सिंगापुरलाई घरेलु मैदानको फाइदा छ भने कुवेत टी–२० अन्तर्राष्ट्रिय मान्यता पाएयता गरेको प्रदर्शनले मनोबल उच्च बनाएर बसेको छ ।

सधैंझैं नेपालको विश्वकप छनोटमा बलिङले नै महत्त्वपूर्ण भूमिका खेल्ने निश्चित छ । नेपालको ब्याटिङ सधैं समस्याका रुपमा रहिआएको छ । मलेसियाविरुद्ध ओभर घटाइएको खेलमा बाहेक नेपालका ब्याट्सम्यानले जितेको खेलमा पनि सन्तोषजनक प्रदर्शन गर्न सकेका छैनन् ।

कप्तान पारस खड्काको चोट नेपालका लागि थप टाउको दुखाइको विषय बनेको छ । उनी बाँकी खेल खेल्न असमर्थ भएमा नेपाललाई जित निकाल्न हम्मेहम्मे पर्नेछ । उनको अनुपस्थितिमा दीपेन्द्रसिंह ऐरी र रोहित पौडेलले मध्यक्रमबाट नेपालको इनिङ सम्हाल्नुपर्ने हुन्छ ।

मलेसियाविरुद्ध मौका पाएका प्रदीप ऐरी अनुभवी र घरेलु क्रिकेटका आक्रामक खेलाडी भए पनि अन्तर्राष्ट्रिय प्रतियोगितामा उनले सधैं निराश मात्र बनाएका छन् ।

उनको विकल्पका रुपमा पवन सर्राफलाई खेलाउनु उपयुक्त हुन सक्छ । लामो इनिङ नखेले पनि उनीबाट उच्च स्ट्राइक रेटमा विस्फाेटक इनिङको अपेक्षा गर्न सकिन्छ । उनले क्लोज क्याम्पमा पनि ओपनिङ ब्याट्सम्यानका रुपमा खेल्ने अभ्यास गरेकाले उनी उत्तम विकल्प हुन सक्छन् ।

कुवेत टी–२० मा विस्फाेटक ब्याटिङ गर्दै लामा सट खेल्नका लागि परिचित छन् । जसका कारण, कुवेतविरुद्धको बलरलाई खेलमा पर्याप्त स्पेस दिन ब्याट्सम्यानले राम्रो स्कोर गर्न अत्यावश्यक छ । कतारविरुद्ध नेपालले ५ जना मात्र ब्याट्सम्यान खेलाएको थियो ।

कुवेतविरुद्ध त्यो गल्ती दोहोर्‍याउनुहुँदैन । सकेसम्म धेरै अलराउन्डरलाई टिममा स्थान दिएर नेपालले ब्याटिङ लाइन अप बलियो बनाएमा मात्र विश्वकप खेल्न सक्छ ।

नेपालले भोलि कुवेतको सामना गर्नेछ भने आइतबार सिंगापुरविरुद्ध खेल्नेछ । यी दुवै खेलमा नेपालसँग जितको विकल्प छैन । पानी परेर वा अन्य कुनै कारण नेपालले अंक बाँड्नुपरेमा विश्वकप सम्भावनामा पूर्णविराम लाग्नेछ ।

प्रकाशित मिति: शनिबार, साउन ११, २०७६ ०१:३६