ओमिक्रोनको सबभेरियन्ट गर्भवती र बालबालिकामा बढी संक्रमण (भिडियो)

A+ A A-

कोरोना भाइरसले निम्त्याएको स्वास्थ्य तथा आर्थिक संकटले विश्व नै प्रभावित छ । खासगरी कोरोनाको ‘डेल्टा भेरियन्ट’ले जनस्वास्थ्यमा गहिरो सङ्कट निम्त्यायो ।

बेलाबेलामा कोरोनाको भेरियन्ट बदलिएसँगै यसको असर कस्तो हुने हो भन्ने चिन्ता विश्वव्यापी रूपमा छ । सबैभन्दा बढी प्रभाव पारेको डेल्टा भेरियन्ट खोपको विकाससँगै केही हदसम्म नियन्त्रणमा आयो । डेल्टापछि ओमिक्रोन भेरियन्ट देखापर्‍यो । त्यसपछि पनि ओमिक्रोन ‘म्युटेसन’ अर्थात् चारित्रिक परिवर्तन क्षमताका साथ अर्को भेरियन्ट देखापर्‍यो ।

एकपछि अर्को भेरियन्टको विज्ञता हासिल गर्दै कोरोनाको उपचार गर्नुपर्ने बाध्यतामा स्वास्थ्य क्षेत्र छ । खासगरी प्रयोगमा ल्याइएका खोपका क्षमतालाई परिवर्तित भेरियन्टहरूले के कस्तो प्रभाव पार्न सक्छन् भन्ने चासो सर्वत्र छ ।

हाल कोरोनाको ओमिक्रोन म्युटेसनअन्तर्गतकै सबभेरियन्टका कारण विश्वका विभिन्न देशहुँदै नेपालमा पनि कोरोनाको चौथो लहर भित्रिएको विज्ञहरूको भनाइ छ ।

पाटन स्वास्थ्य विज्ञान प्रतिष्ठानका मेडिकल डाइरेक्टर डा. युवराज शर्माका अनुसार कोभिड १९ का विभिन्न भेरियन्टहरूको तुलना गर्दा डेल्टा भेरियन्ट सबैभन्दा जटिल थियो । किनकि यो भेरियन्टले मानिसको फोक्सोमा आक्रमण गर्थ्यो । जसले गर्दा डेल्टा भेरियन्टको संक्रमण फैलिएको बेला अक्सिजनको धेरै आवश्यकता परेको हो ।

श्वासप्रश्वास प्रणालीमा असर गर्ने हुनाले डेल्टा भेरियन्टले ज्वरो आउने, खोकी लाग्ग्ने र एकैचोटि फोक्सोमा निमोनिया हुने गर्थ्यो । सोही कारण यो भेरियन्टको समयमा मृत्यदर समेत उच्च रहेको शर्मा बताउँछन् ।

डेल्टा भेरियन्टपछि देखा परेको ओमिक्रोन भेरियन्टमा भने डेल्टाको जस्तो जटिल अवस्था नदेखिएको डा. शर्मा बताउँछन् । उनी भन्छन्, ‘डेल्टा भेरियन्टमा जिउ दुख्ने, ज्वरो आउने, खान मन नलाग्ने, कमजोरी हुनेजस्ता समस्या देखिएका छन् ।’

तर, डा. शर्माका अनुसार यो भेरियन्टको संक्रमणदर भने निकै उच्च छ । यसको संक्रामक अवस्थालाई मध्यनजर गर्दै अहिले पाटन स्वास्थ्य विज्ञान प्रतिष्ठानमा कोभिडका बिरामीलाई लक्षित गरी २२ वटा आईसीयू र ३ सय शय्या छुट्याइएको शर्मा बताउँछन् ।

विगत ६ महिनामा भने ओमिक्रोनको संक्रमण सामान्य बन्दै गएको थियो । सोही कारण पाटन अस्पतालमा पनि कोरोना संक्रमितको सङ्ख्या शून्यमा झरेको थियो ।

तर, एक महिनायता भने गर्भवती महिला तथा बालबालिकालगायतमा फाट्टफुट्ट संक्रमण देखा परेको डा. शर्माले बताए । अहिले भने संक्रमितको सङ्ख्या ह्वात्तै बढेको छ । यो भेरियन्टमा भने गर्भवती, बालबालिकासँगै वृद्धवृद्धा, दीर्घरोगी तथा भ्याक्सिन नलगाएका व्यक्तिहरू बढी प्रभावित देखिएको डा. शर्माको भनाइ छ ।

अहिले पाटन अस्पतालमा दुई जना बिरामी बालबालिकाको भेन्टिलेटरमा, ११ जनाको एचडीयूमा राखेर उपचार भइरहेको छ ।

डा. शर्माका अनुसार हाल पाटन अस्पतालमा १७ जना कोरोना संक्रमितको उपचार भइरहेको छ । उनी भन्छन्, ‘कोरोना जाँच गराउनेमध्ये ५० प्रतिशतमा कोरोना पोजिटिभ देखिएको छ ।’

हेर्नुस्, डा. शर्मासँगको कुराकानीका आधारमा तयार पारिएको भिडियोः